1Iga Qotei aqa areq di uliesonam a na iga taqatgeqnu. A gaigai iga siŋgilatgeqnu. A gago jojomq di sosiqa gulbe batieqnaqa a na iga aqaryaigeqnu.2Deqa gulbe bei bqas di iga ulaqasai. Mimiŋ dosim mandam reŋgiŋyim mana kokba naŋgi yuwalq aiyeleŋqab di uŋgum. Iga ulaqasai.3Jagwa tulaŋ koba tigelosim yuwal korkortosim mana utru reŋgiŋyqas di dego uŋgum. Iga ulaqasai.4Qotei Goge Koba a na aqa segi qure bole Jerusalem giltej. Aqa atra tal qure dia unu. Qure ambleq di ya kobaquja unu. Tamo uŋgasari naŋgi ya deqa tulaŋ areboleboleinjreqnu.5Qotei a qure dia unu. Deqa qure di a padalqa keresai. Bati gaigai nebeoqnimqa Qotei na qure di aqaryaiyoqnqas.6A leleŋeqnaqa mandam a niñaqoqnsiq ya buleqnu. Sawa bei beiq dia mandor kokba naŋgi minjiŋ oqetnjreqnaqa qoto tigelteqnabqa Qotei na naŋgi buŋnjreqnu. Deqa naŋgi padaleqnub.7Tamo Koba Qotei a qoto tamo naŋgo gate koba. A iga ombla unum. Jekop aqa Qotei a tal siŋgila koba bul unu deqa iga aqa areq di ulieqnum.8Niŋgi bosib maŋwa kalil Tamo Koba Qotei a babteqnu qaji di uniy. Gulbe kalil Qotei a qariŋyonaq mandamq aiyej qaji di niŋgi uniy.9Sawa sawa kalilq dia Qotei a qoto koboteqnu. A na serie ti qaja ti kalil paraparaiyoqnsiqa qoto tamo naŋgo dumu koiteleŋeqnu.10A endegsi mareqnu, “Niŋgi olo bunu qotoqnaib. Niŋgi e qa geregere qalieoiy. E segi Qotei bole. E tulaŋ goge kobaq di unum deqa sawa bei bei qaji naŋgi ijo ñam soqtoqnqab. Od, mandamq endia tamo uŋgasari kalil naŋgi ijo ñam soqtoqnqab.” Qotei a degsi mareqnu.11Tamo Koba Qotei a qoto tamo naŋgo gate koba. A iga ombla unum. Jekop aqa Qotei a tal siŋgila koba bul unu deqa iga aqa areq di ulieqnum.