Yɛsɑ̃ɑ̃39tbz_sim

Wèè fɛ̃́ũ̀rì ò bɑ̀ɑ́mmɛ̀ Kuyie

1Bɛdèmbɛ̀ kóo kótì dìèmmɛ̀ Dɑfiti yɛ̀nfɛ̀ Yedutunni kpɛ́í.
2N yɛ̀mmɛ̀ do dò n yó ndɑkɛmu n dɔɔ̀rìmɛ̀ kpɛ́í,kɛ bɑ́ɑ́ bɛ́i ntìmɑtì kɛ́yetɛ́,kɛ́mmuti tɑ́u oyɛiwe ììkɛ̀.3Mɛm̀mɛ kɛ̀ nni ndò nyúóó kɛ dò nkɑ́rɛ́ kɛ í mmɔkɛ diwɛ̀ì,kɛ̀ n fɛ̃́ṹtímɛ̀ nɛ́ dɔkɛ dɛukɛ.4Kɛ̀ dɛ̀ n cɔ́ú m miɛkɛ,kɛ̀ iyɛntotíi n tùɔ̀ nkɛ dò mmuhɑ̃ɑ̃́,kɛ̀ n dentɛnɛ̀ m bo bɛ́immɛ̀.
5N Yiɛ̀ nKuyie n nɑ́kɛ́ n fòmmu mɑmɛ̀,n nɑ́kɛ́ n we kpɑɑ́ yɛ̀dɛ̀,kɛ̀ m bɑntɛ́ n yí kpeńnìmɛ̀.6A n duɔ́ mmùù fòmmu mɑ̀nnɛ̀ tɛnɔ̀ùtɛ̀ pɛ̃kùmɛ̀ mmɛ,n we í tùɔ̀kɛ dɛ̀mɑrɛ̀ ɑ ììkɛ̀,ɑ borɛ̀ onìtì dò mmuyɑɑ́ mmu.7Onìtì dònnɛ̀ mɛdɛ́ɛ̀ mmɛ kɛ firì,ò ɑ̀rìmu kɛ dò mmuyɑɑ́kɛ wɑɑ̀ ntikpɑ̀tì ò mɛ nyí yɛ̃́ wèè yóó tì tiekɛ.
8N Yiɛ̀ nKuyie, n kémmú we?Fɔ̃́ nwe m búɔ́mɛ̀.9N dɛɛtɛ́nɛ̀ n yɛi,bɑ́ɑ́ yóu kɛ̀ tiyɛìntì nni ndɑú.10M muti tɑ́u nwe,n yí nɑ́ɑ́ nkɛ́yɛ̃́ dɛ̀ bonímɛ̀ fɔ̃́ɔ̃̀ borɛ̀.11N yóu tiyɛ̃ĩti,ɑ m puotì kɛ̀ n duòmu.12A ɔ̃ mpuotì onìtì koò tiè nho yɛi nkpɛ́í nkɛ,kɛ dò nyibiɛ́ kɛ cɑɑ̀ri ò dɔ́ dɛ̀ mɛdiɛ̀.Onìtì dò mmuyɑɑ́ mmu.
13N Yiɛ̀ nKuyie nkéntɛ́ m bɑ́ɑmmìi nɛ̀ n sɑ́útìi,m bɑ́ nkuɔ̀ nkɑ̀ɑ cĩ̀ɛ̃́kɛ́,n tú opɔ̀ɔ̀ nwe ɑ borɛ̀ kɛ yóó pɛ̃ɛ̃tɛ́ n yɛmbɛ̀ kɔ̃mɛ.
14N yóu kɛ̀ nh om̀pɛ̀ kɛ̀ n yɛ̀mmɛ̀ɛ nɑrikɛkɛ̀ n nɛ́ nɑ kɛ́kpɑɑkɛ.
expand_more
Search