Sam39ntu_wbt

Nzlukr Leplz Mrbcnepwz Apule Nzyrplaokr Nrc Kxesz'

Nabz ne Devet.

Nzlu-krnge Mrbcnepwz

1Yawe, pnzpe drtwrnge kx namnc-lrpitxpwo, a' bzkq alex alwx mz nzlctr-krbz drtwrnge bam mz nzkxpu-krngeng.Murde kxdrka'-ngrng lcng tzmnc-aepztrpqng bange, ma tzxtrnga-ngrdr nzlqngi-krm.2X kxmule-esz' trycmnewxu,A' nzkxpu-krngeng etunepx zvz, delc tqtalvzongr nabznge.3X mz nzaotikr drtwrnge nzkxpu-krngeng, nztalvzokr nabznge mrilvzole ninge.X mzli kc tqrblxm bange nzmnc-lrpi-krnge, sc tqrpipebo bam kx,4“Yawe, nzlu-krnge mrbcnepwz. ?Memule tqpxlavxpx-ngrbzme nzkxpu-krnge??Myx mzli kx naesakingr trnzmnc-zpwx-krpwc'u lc?”5Murde nim kx amrbctrp nzlu-krnge. X mzli kx lutix ngi da txne mz nzobq-krm.Nzlukr leplz mrbcnepwz apule nzyrplaokr nrc kxesz'.

Bzkq Ayrplatipx-zvzq Ninge

6Nzwz-katongr ngi brmrdakr apule nounc kc trpnzngr nrade.X mz nzbzkr leplz trpnzngr dztudrng kx natwzlr.7?Kxetu nike naobqtipxx mz nzmnc-krnge lc tqngi brmrda?Mwx namrlz nzbrti-zvzkr drtwrnge nim.8Murde na-arlapxq ninge mz alwx rngeng amrlx,X kxnzlukurnrng ma tzyrpalelvzlr ninge.9Mzli ka, dcpxpe mz drtwrnge kx vz-rbrx nzlctr-krbz drtwrnge bam mz nzkxpu-krngeng.Murde tubq nzayrplapx-krm ninge mz alwx rngeng.10A' bzkq ayrplatipx-zvzq ninge,Murde ycpe pipz nzbztr-krbo mz mqm.11Mz nzayrplapx-krm leplz, odatibzme dztudrng kcng tqmrlzbz badr.Apusr-ngrbzmeleng da kx yrti ninr,Murde nakrlzlr kx nzvz-rbrng mz nzobq-krm.Nzlukr leplz mrbcnepwz apule nzyrplaokr nrc kxesz'.
12Yawe, xlrm nzkrka'-krnge x nzyrni-krnge.Murde nzmrbckr nzmncngr mz nrlc apunepwzle nzwoukr betepu.13Ayrkrtxpx nzetqkr drtqnge x aotxpxbz drtqnge,Murde mwx na-abrtztx-kaix mzli kxpipz x ninge kc tqbz ate.
expand_more
Search