Nɨawari37hch_wb2
Rawiri nɨawarieya.
1Pepɨka'a'iyaritɨaka Kakayari memɨka'ayexeiya kememɨteyuriekɨ,meta pepɨkatihiwe'erieka tita memɨtehexeiya heitseriemekɨ yamemɨkatekahu,2yapauka mɨtiyɨnarekɨ tupiriya hepaɨ,yapauka mepɨtiwauke 'ɨxa mɨtsitsiɨrawi hepaɨ.3'Ekɨ Yawé hetsie ketinewiyani, 'aixɨa ketineyurieneni,kwiepa keneuyeikani meta 'aixɨa ketinekamieni.4Yawé 'anaki'eriya keneyetuiri,mɨkɨ pɨmetiyetuirieni tita pemɨreuyehɨwa 'a'iyarikɨ.5Yawé 'ahuye kenehɨritɨaka,hetsiena ketinewiyani, mɨkɨta yapɨtiyurieni 'ahetsiemieme.6Mɨpaɨ kepauka pemɨtaxanetsieni 'aixɨa mɨti'ane 'ahetsie pɨhekɨariwieximeni,keheitserie pemɨrexeiya pɨhekɨaka tuka hepaɨ.7Kayuwatɨ pekaniukixietɨ keneuyeikani Yawé hɨxie,petiuka'eniwatɨ hetsienamieme ketinetakwewieka,Pepɨka'ahɨaweni hipatɨ kememɨte'ukaxexeiya wahetsiemieme,kememɨteku'eriwa 'axamemɨteyurie wahepaɨ.8Ketineuhayewa peha'atɨ, keneuku'eiri haxɨa,pepɨka'utaweranareni, mɨkɨ 'axamɨ'anetsie katiniyu'iniwani.9Karikɨ Kakaɨyari memɨka'ayexeiya mekanakumaweriyariekuni,matsi kemɨ'ane Yawé hetsiemieme memɨtetakwewie, kwie mekaniyetuiriyariekuni.10'Apɨkareutereri 'axateyuruwamete memɨka'u'uwanikɨ,tsepa 'aheyemekɨ pemɨwarutiwau pepɨkawataxeiya.11Peru kemɨ'ane kayuwatɨ memu'uwa kwie mekanimikiekuni,yu'iyarikɨ 'aixɨa mekateniu'uwakuni.12'Axateyuruwamete 'aixɨa memɨte'u'uwa mepɨwaheka,yutamete mekaniutixikautekeni wahetsiemieme.13Matsi Yawé kaniutanaweni 'axateyuruwamete wahetsiemieme,timaitɨ watukari maye'aximekɨ.14'Axateyuruwamete yu'ixipara mekanewatihapanani, yutupi mekanahapanani,tixaɨtɨ mɨkarexeiya meta mɨreuyehɨwa memɨwaratixɨrienikɨ,'aixɨa memɨte'u'uwa memɨwakwinikɨ.15Wa'ixiparatɨtɨ wa'iyaritsie kaniuyekemɨkɨ,watupi kanitimurixɨamɨkɨ.16'Aixɨa pɨ'ane kemɨ'ane 'aixɨa mɨtiuka'iyari 'etsiwa xeikɨa rexeiyatɨ,keyuri 'axateyuruwamete waɨkawa kememɨtehexeiya,17matsi Kakaɨyari memɨka'ayexeiya watɨrɨkariya kaneutiparitɨariemɨkɨ,peru Yawé heitserie memexeiya kaniwaparewimɨkɨ.18Yawé 'aixɨa memɨte'u'uwa watukari kani'ɨwiyani,tita memɨteyetuiriyarieni pɨtiwahetsiemiemetɨni yuheyemekɨ.19Kepauka 'uximatɨarika tukariyari maye'ani mepɨtekaxeiya,haakaxa tukariyaritsie waɨkawa mepɨtehexeiyani.20'Axateyuruwamete, Yawé memaye'unie,mekanikumawerikuni kepauka memeuyehɨiyani.Mekanikumawerikuni tuturi yeuta mieme hepaɨ,kɨtsi kemɨtitaparike mɨpaɨ mekaniyɨkuni.21'Axamemɨte'u'iyari mekaniyuniɨrɨweni, peru mepɨkateyutuarita,matsi heitserie memexeiya mepɨteyumikwa 'aixɨa 'anemekɨ.22Yawé 'aixɨa mɨwayurie, kwie mekaniyetuiriyariekuni,peru kemɨ'ane mɨkɨ 'axamɨwayurie mekanikumaweriyariekuni.23Yawé tewi kaniheitseritɨaka 'aixɨa 'anemekɨ mumienikɨ,kepauka minake kemɨtiuyeikanikɨ,24tsepa metiwitsei pɨkahekaweni,Yawé yumamakɨ miwiyakɨ.25Ne temaikɨ nepatɨa, hikɨri nepu'ukiratsi,peru hatsuaku heitserie memexeiya haweri mɨraku'ane nepɨkawaxeiyawe,meta waniwema paa hawaikɨ mepɨkahewauka.26Yuheyemekɨ meyutemamawietɨ 'aixɨa 'anemekɨ mepɨtewaniɨtɨa,waniwema wahekɨ 'aixɨa mepɨ'itɨarie hipatɨ.27'Axapetiyurienetɨ ketineuhayewa, 'aixɨa pɨta ketineyurieneni,'ana yuheyemekɨ mana pepuyeikani hakewa pemekani.28Karikɨ Yawé 'aixɨa mɨti'ane katininaki'erieka,meta pɨkawanutuita kemɨ'ane yu'iyarikɨ meminaki'erie.Yawé kaniwa'ɨwiyakamɨkɨ yuhemekɨ,peru 'axateyuruwamete wanuiwari kaniwarakumaweriyamɨkɨ.29Heitserie memexeiya kwie mepɨyetuiriyarieni,yuheyemekɨ mana mepu'uwani.30Heitserie mexeiya kemɨtimaiwe pɨtikuxata,niukieya tita mɨtihetserie puweiya.31Kakaɨyari 'aitsikaya 'iyarieyatsie kaniyekani,hatsuaku mepɨkahekaxɨrɨwe.32'Axamemɨte'u'iyari 'aixɨa memɨte'u'iyari,mekaniwakuhupiwani mewakwikutɨ.33Peru Yawé pɨkawapitɨani yamemɨwayurienikɨ,meta yapɨkaretanaki'erieni memanutaxɨriyanitsie.34Peru 'ekɨ, Yawé hetsie timieme ketinetakwewieka,meta yaketineuyeikani kemɨtinake,mɨkɨ kamenetemawieritɨamɨkɨ kwie pemɨyetuiriyarienikɨ.Kepauka 'axateyuruwamete memɨka'unarieni,'ekɨ pekaniwaxeiyamɨkɨ.35Ne nepixei 'axatiyuruwame mariweme,kariuxa hepaɨ ranukaime.36Matsi kaniukumawere,nemitiwau nepɨka'itaxeiri.37Kwi keniwaruxeiyata 'aixɨa memɨtekahu:tukari 'upamie kayuwatɨ memɨkuwautɨwe wahetsiemieme.38Peru yunaitɨ 'axateyuruwamete mekanikumaweriyariekuni,tukari 'umamie 'axateyuruwamete wahetsiemieme memeuyehɨiyani tukariyari kanihɨkɨtɨni.39Heitserie memexeiya wawikweitsitɨarika Yawé hetsie kanayeneikani,mɨkɨ mɨwatɨrɨkariya kanihɨkɨtɨni kepauka memɨte'uka'eniwatsie.40Yawé kaniwaparewieka meta kaniwaxɨnani,'axateyuruwamete wahetsie kaniwaxɨnani meta kaniwawikweitsitɨaka,mɨkɨ hetsie mekaneuwawaɨreni.