Nɨawari35hch_wb2
Rawiri nɨawarieya.
1Yawé, nepumieriene, nehetsie keneutanua,keniwarutakuya kemɨ'ane memɨnetsimietɨwe.2Tepɨa kamixayari kenanakatɨtɨ meta tepɨa 'amɨyewakene'akuha'aritɨaka nehetsɨa kenenua pemɨnetsiparewienikɨ.3'Apitsika keneutikwe'i meta 'ahatsa,memɨnetsi'uweiya wahɨxie keneukexi.Mɨpaɨ keneutayɨki:«Ne 'awikweitsitɨwame nepɨhɨkɨ».4Meke'uhɨxiyani meke'uyutitetewiyakemɨ'ane memɨnetsimieku,meke'ukunuaxɨani meyutetewiyatɨ'axamemɨnetsiyuriku.5'Ɨxa hepaɨ mekehe'enitsitɨarieni,niuki tuayame Yawé hetsɨa mieme wakwinekaku,6wahuyeta ke'uyɨwini meta ke'uharuanini,niuki tuayame Yawé hetsɨa mieme waruweiyakaku.7Nitixaɨtɨ wahetsiemieme nekarayexeiyakaku memɨnetsi'uwiniyaxɨkɨ,nitixaɨtɨ wahetsiemieme nekarayexeiyakaku nehetsiemieme meputi'inixɨ,8haweri me'anenetɨ 'uxa'atɨniwarie meke'akɨne,yuwiniyarita mekeheukaxɨrieni,putsu memitawewita.9Mɨpaɨ ne'iyari pɨtiyutemawieka Yawé hetsie,puyutemawieka mutawikweitsitɨariekɨ,10'ana mɨpaɨ yemekɨ nepɨtayɨni:«Xewitɨ pumawe 'ahepaɨ 'anetɨ Yawé.'Ekɨ pepɨwawikweitsitɨa haweri memɨyɨa memɨtɨrɨkawi wahetsɨa,haweri memɨ'anene meta tixaɨtɨ memɨkateheuxeiya pepɨwawikweitsitɨamemɨtewa'uximayatsitɨa wahetsɨa».11Mete'itawatɨ menetsitaxanetake mepɨ'axe,menetsita'iwawiyake tita 'atsinemɨkatimatekɨ.12Ne newanenimayakaku 'axa'anemekɨ mepɨnete'akapitɨwa,mɨkɨkɨ pɨnetsihekukukuine ne'iyaritsie,13metsɨ kepauka mɨkɨ memɨtekukuyenine hiwerika kamixayari nepanakatɨkɨkai,nenutuixietɨ nepayeikakai nepɨnetihakiwakai.Ne matsi nepɨnenenewiekai ne pɨta nemɨtikuyenikɨ.14Ne hiwerika kamixayari nepanakatɨkɨkai,nehamiku hetsiemieme hepaɨ, yatɨni ne'iwa hetsiemieme hepaɨ.Nenutuixietɨ nepakatutsitakai,nemaama hetsiemieme nemutatsuakani hepaɨ ne'anetɨ.15Peru kepauka ne nemekawe, mɨkɨ mepuyukatemamawi,mepuyukuxeɨri nehepaɨtsita metekuxatatɨ.Teɨteri ne nemɨkawamatekai,mekaneniuyeheka nehepaɨtsita meniukixietɨ mekatehayewatɨ mekanakɨne.16Waɨkawa mepɨnetsimariutakai, mepɨnetsinanaimakai,nehepaɨtsita yutamete meputixikautekekai.17Ti'aitame, ¿kepaukake 'ikɨ 'aixɨa pepɨtiyurieni?Netukari keneutawikweitsitɨa, netukari muyuxewi,mayetsi mepɨnetsitakwaixime.18Ne pamɨpariyutsi nepɨmetsipitɨani yumɨireme wahɨxie,yuwaɨkawame wahɨxie nepɨmetsitanɨawa.19Pepɨkawapitɨaka memɨnetsiyuriyanikɨ,memɨnetsi'aye'unie meteyukwamanatɨ.Memɨnetsinanaimaka pepɨkawapitɨaka'atsinekawayurienekaku.20'Aixɨa metekuxatatɨ mepɨka'u'uwa,matsi 'itarika mepɨwewie'ikɨ kwieyaritsie 'aixɨa memɨte'u'uwa wahepaɨtsita.21Karima meputinawe, meta mɨpaɨ meputiyuane:«Neuxeitsɨkuta yaranuyetɨa».22Yawé, 'ekɨ naime 'ikɨ pepɨtixeiya,matsi pepɨkaranukanaka.Ti'aitame, pepɨkanetsi'uku'e'eiriwani.23Kenanutanieri, kenanukukexi nekakaɨyari.Nehetsiemieme 'aixɨa ketineuyuri Ti'aitame, nehetsie keneutanua.24Nehetsiemieme 'aixɨa ketineuyuri heitserie kepemɨrexeiya, Yawé nekakaɨyari,memɨnetsinanaimaka pepɨkawapitɨaka.25Pepɨkawapitɨaka mɨpaɨ memɨteku'eriwanikɨ:«Mɨpaɨ tepɨteheixeiyakukai».Mɨpaɨta memɨtiyuani pepɨkawapitɨaka:«Tepenukaxɨ yemekɨ 'ayeniereme».26Meke'uyutitetewiya meta meke'u'iyɨrieniyunaitɨ kemɨ'ane memuyutemamawie nemekawekɨ,meke'utixani'eriwa mekeheutewiyariekayunaitɨ kemɨ'ane tixaɨtɨ memɨkanete'erie.27Peru meke'utihiwa temawierikakɨkemɨ'ane memɨnetsiparewie,meta mɨpaɨ yuheyemekɨ meke'utiyuaneni: «Yawé 'aixɨa ketikuxaxatsiwani,'iparewiwame 'aixɨa mɨtiuyeika minakekɨ».28Ne ke'aixɨa pemɨtiuka'iyari nepukuxataneni,tukari mɨyehane 'ahetsiemieme kwikari nepukwikani.