Lulanga lwa33shr_buk
Olwimbo lw’obukulu n’obuhashe bwa Nyamuzinda
1Mushaguluke muli Nyakasane, mwe bashinganyanya: ab’omurhima gushingânîne bakwânîne bamukuze.2Muhindire Nyakasane, mumuzihire enzenze, mumuzihire olulanga lwa bikanyi ikumi.3Mumuyimbire olwimbo lurhasâg’iyimbirwa wundi, muyimbe bwinjà muhirekwo n’emishekera.4Kulya kubà ngasi kanwa Nnâmahanga aderha erhi kanakubûsire, na ngasi mukolo ajira erhi gunali gwa nkwîra.5Arhahimwa kurhonya ebishingânîne n’ebiringânîne, igulu lyoshi liyunjwîre ngalo za Nyakasane.6Amalunga luderho lwâge lwagajiraga, n’engabo z’emalunga mûka g’ekanwa kâge gwazijiraga.7Amîshi g’omu nyanja yêne wagagushaga haguma nka kulya bagarhulira omu kabindi, n’amîshi gahulula yêne agarhulira aha gabêra.8Mushâna igulu lyoshi liyobôhe Nyakasane, abayûbaka okw’igulu boshi bamurhînye.9Bulyâla yêhe àdesire kwône byanabà, arhegeka byanabâho.10Nyakasane ye twîra ab’emahanga omu myanzi, ye bulabuza emirâli y’ab’ekulî.11Emihigo ya Nyakasane ecibêra kadundu-ntashugulwa, enkengêro z’omurhima gwâge zirhahuligana, oku biguma byahira ebindi byahirûka.12Ishanja lishizire Nyamuzinda liri ly’iragi, lwo lulya lubaga yêne acîshogaga mpu lubè lwâge lwa mwîmo.13Nyakasane anabè ali empingu erhi analika isù, anakaz’ibona ngasi boshi babusirwe n’abantu.14Anabè ali omu ndâro yâge erhi anali ebulâbi: anakaz’ilâba ngasi yêshi oyûbaka okw’igulu.15Yêne ye wabumbaga emirhima y’abantu yoshi, yêne ye nakaz’ilola ebi abantu bajira byoshi.16Mwâmi arhahimira kuluza ngabo, Omulwî arharhabâlukira kuluza misî.17Endogomi erhahimwa kurhebana omu malwa, arhali okuluza emisî kwâyo kwo kugalukira omuntu.18Lâba oku amasù ga Nyakasane garharhenga oku bantu bamuyôboha, garharhenga oku bantu bacîkubagira oburhabâle bwâge.19Kulinga mpu akûle amaroho gâbo omu lufù, anabayikuze amango bashalisire.20Omûka gwîrhu Nyakasane yêne gwâlolakwo: Yêne ye ntabâza orhurhabâla, yêne ye mpenzi yîrhu.21Omurhima gwîrhu gubâge gwacîtakîraye, izîno lyâge litagatîfu lyo rhuhizirekwo omurhima.22Nyakasane olukogo lwâwe lurhujâgekwo, nk’oku rhucîkwikubagîre.