Sam
33
/
ntu_wbt
Angrlvzku Yawe Mz Nabz Kxyrlvi
Nabz ne Devet.
Nabz Kxmrna
1
Naelalvzku Yawe, nigu kx nztubqng.
Murde mrlzvxi nzglqpx-krgu nide.
2
Na-angrlvzku nide mz nabz kx yrlvi mz nzawingr,
X mz nzayrni-krgu gita x ukzlele.
3
Nangr-ngrbzku bade nabz kxmrna,
Mz nzmalqlvz-krgu nide.
4
Murde natqdeng amrlx tubq-esz'ngr,
X da amrlx kcng tqaletileng takitrde nzbrtikr drtwrgu.
5
Mrlz bade da kx mrlz x tubq.
X mz nrlc tulvzo nzaodukr Yawe tqvzpe tqvzpe.
Kxrpalz
6
Yawe wz-ngrde bongavz mz natq kx kapxle,
X nepi, temz, x vri amrlx mz nzycmne-krde.
7
Ata-lxblrtrle dcpwe me esz',
X yrlqbzle bz ngr prla amrlx.
8
Nigu leplz amrlx mz nrlc, ncblo, olvz, x doa kxnztopwzng,
Na-amrlueku x na-amatqku Yawe, Kxrpalz.
9
Murde wz-ngrde nrlc mz nzycmne-krde,
X mz nzrkapx-krde natq dekc tqycngr.
10
Yawe atrkatile drtwr kx nzyrlq leplz,
X ngi-batrpzle trnzngidati-kru mrkc tqpnz drtwrdr.
11
A' drtwr kx yrlqleng ngidati zvz,
X nqmq nr nabzde tqvzpe tqvzpe.
12
Sa namrlzbz mz lr drtqbr kcng tzangiolr Yawe murde nide Gct rdr.
Murde leplz kcng tqmcpxle kx nangi nedeng nzabrtz-zvzng.
Lr Nrlc
13
Yawe obqom mrkc tqwxbuo-ngrmle mz tron nyzde Heven,
Mz nzmco-krmle leplz amrlx mz nrlc ka.
15
Ngi batrpzle nzao-krdr drtwrdr,
X krlzle da amrlx kcng tzalelrng.
16
King traovxiou mz nzxplrkr ami nede.
X ncblo ngr vea tr-rlapx-kzu mz nzxplr-krde x hcsi nede.
Kxarlapx Kxokatr
18
A' Yawe kc tqaclvele krkcng tzamatqlr nide,
X nzbrti drtwrdr nzaodu-zvz-krde nidr.
19
Arlapxle nidr mz nzbzngr,
X axplrle nidr mz mzli r dzbi.
20
Mnc-xgleku Yawe nzokatr-krde nigu.
Murde nide temz ngr lomrgu kc tqyrputrngr nipna.
21
Abrtzlvzku nide,
X drtwrgu abrtrpzku mz drtqde kxtr.
22
Krka'ku kx Yawe na-aodu-zvzle nigu
Mz nzbrtikr drtwrgu nide.
Powered by Seed Bible API
expand_more
Search
All books
Old Testament
New Testament
chevron_left
Previous Chapter
Books
search
Search
explore
Discover
share
Share
chevron_right
Next Chapter