Nɨawari31hch_wb2
Teyuitɨwamete wa'ukiyari. Rawiri nɨawarieya.
1Yawé, 'ahetsɨa nepiwaune yu'awiwietame,pepɨkanetsipitɨaka nemɨtiyutewinɨakakɨ,heitserie pemexeiyakɨ, keneneuxɨna.2Kwi yemekɨ keneneu'eni,yapauka penetsiparewienike kene'axeni.'Ekɨ neterɨ 'amuyeyewa kenehɨkɨtɨni,netɨrɨkariya netsiwikweitsitɨwame kenehɨkɨtɨni.3Keneneuwitɨximeni, 'ekɨtsɨ nehetsie nunuwame pekanihɨkɨtɨni meta pemɨnetsikurarutɨiya,keneneuwitɨximeni mɨkɨkɨ 'ahepaɨtsita 'aixɨa mɨraniuwanikɨ.4Keneneɨxɨna memɨnetsi'aye'unie mepɨnetsi'uwiniyaxɨ,'ekɨ nehetsie nunuwame pemɨhɨkɨkɨ.5'Amamatsie ne'iyari nepɨyetua,Yawé, keneneutawikweitsitɨa, yuri Kakaɨyari.6Nepɨwaxani'erie kakaɨyarixi memɨwarayexeiya,ne 'aku, 'ahetsie nepɨtiwiya, Yawé.7Nepɨnetemawie yemekɨ 'anaki'eriyatsie,'ekɨ ne'uximatɨarika pemuxeikɨmeta ne'iyari 'uximatɨarikaya pemɨmatekɨ.8Pepɨkanetsiyetua mɨnetsi'aye'unie hetsɨa,matsi pɨta xaɨtsie pepɨnetsi'atɨa 'a'akuyeukaku.9Yawé, kenenenenimayaka, nepɨ'uximatɨarie,nehɨxite pɨtixɨxime kukuiniyakɨ,meta ne'iyari, metatsiere newaiyari.10Tukarikɨ yanepɨtiuka'eniwa,wiiyari panuyekɨka tsuarikɨ xeikɨa,nutuixiya netɨrɨkariya pɨtixɨtɨaxime,ne'umeyari pɨtiweranaxime.11Memɨnetsi'aye'unie wahetsiemieme mɨyane'anekaku,'atsieriwame nekanihɨkɨtɨni ne'aurie memutetɨka wahetsiemieme,Nehamikuma mekanenimakaka,kepauka kiekaritsie nemɨyeyeika mekanitananautsani.12Mekanenatɨmaiya, nemumɨni hepaɨ,xari mutatarixɨ hepaɨ nekani'aneni.13Yuwaɨkawatɨ 'axamekatenikuxatani nehetsiemieme:«Nekanimaka naitsarie».'Axeikɨa metiyaxeka kememɨnetemienikɨ mekateniutaxata,mekanenimiekuni mekaniutiyuaneni.14Yawé, netsietɨ 'ahetsie nekatiniwiyani,mɨpaɨ nekaniutaineni: «'Ekɨ pepɨnekakaɨyari».15Naitɨ netukari 'ahetsie katini'aneni,memɨnetsi'aye'unie meta memɨnetsi'uweiya wahetsɨa keneneuxɨna.16Meti'uximayatsiriwame hetsie keyuhekɨare ke'aixɨa pemɨtiuka'iyari,waɨkawa pemɨtiuyukanaki'eriekɨ, keneneutawikweitsitɨa.17Yawé, pepɨkawapitɨaka memɨnetsitewinɨanikɨ,'ekɨ nemetsihahiwiwakɨ pemɨnetsiparewienikɨ.Mɨkɨ pɨta mekete'uyutewinɨani 'axateyuruwamete,teukiyapa keniwareukaxɨri.18Memɨte'itawa wateni kayuwatɨ keneupitɨa,'aixɨa memɨte'u'iyari wahepaɨtsita memeuniukakɨmeyutemamawietɨ, 'axame'utiyuatɨ.19Pɨmariwe ke'aixɨa pemɨtiuka'iyari,witsipepɨtiwaxeiya kemɨ'ane memɨmatsi'ayemakaxe,teɨteri wahɨxie 'aixɨa pepɨwayuriekemɨ'ane 'ahetsɨa memuyu'awieta.20'Ahɨxie me'u'uwakaku pepɨwa'ɨwiyateɨteri 'axamemɨwayuriekɨ,'Akiita pe'ayekaitɨ pepɨwa'ɨwiya'axamemutiyuane wahepaɨtsita.21'Aixɨa ke'itɨarieka Yawé,nehetsiemieme yunaki'eriya mɨmariwe mɨyetuakɨkepauka kiekari 'anutinamiekaku nemuyeikakaitsie.22Kepauka nemɨhɨxiyakaitsie mɨpaɨ neputayɨ:«'Ari 'ahɨxie ne'uyeikatɨ nepɨwayehɨiya».Peru pepɨnetsi'u'eni 'ekɨ kenemetiwawiriekaikepauka parewiya nemetsi'utawawiri.23Yawé xekenenaki'erieka, yunaitɨ xemei'enie,mɨkɨ kaniwa'ɨwiyani kemɨ'ane 'aixɨa mɨtiwamate,kemɨ'aneta memuyuti'ɨre tita mɨtiwahetsiemieme yakatiniwarakapitɨwani.24Xekeneyuwaɨriyani, xekeneyukuha'aritɨa xemɨyɨwawenikɨ,yunaitɨ kemɨ'ane Yawé hetsiemieme xemɨtetakwewie.