Sam23ntu_wbt
Kxaclve Sip
Nabz ne Devet.
1Yawe, aclve-zvzq ninge apux sip nem.X trtxpnzngr da kx mnctxpx-ngrne.2Mailz-zvzq ninge me ycngr lue x dakxnzng,Murde na-amax mrkc tqycngr nrwx.3Amrnaq nzlu-krnge.X aelwa-zvz-ngrme lrpzki kxtubq, murde drtqm tr zlwz.4Nctoko scm tzmle nzti bange.X bz scm abrmle drtwrnge mz da kx prtz.Kxmule-esz' vztrx mz nzlo,a' trtxpnzngr dakx namwxlrtix.Murde nim Yawe, kc tqmncme bange.5Alebzme nange dakxnzng,Mz mzlir enqmi rngeng.Aelubzme narnge tolo,X drtwrnge elalzm.6Krlz-angidrx kx sa naka-zvzme bange zmrlz ngrm x nivz lrm,X sa namnc-zvzx ma nyzm.