Omunkwa gwa mwâmi Daudi
1Gwârhi omukulu w’abimbiza. Lwa Daudi, mwambali wa Nyamuzinda, àyimbiraga Nyakasane ebinwa by’olu lwimbo amango Nnâmahanga àmulîkuzagya omu maboko g’abanzi bâge n’aga Saulu.2Anaciderha, erhi: Nkusîma Nyamuzinda, we misî yâni;3Nyakasane, we lwâla nsimikirakwo, we lugerêro lwâni, we mufungizi wâni. Nyamuzinda Nnâhamwîrhu, we lwâla nyâkiramwo; we mpenzi yâni, w’ihembe ly’obucire bwâni, we lugerêro lwâni.4Nalakîre Nyamuzinda, olya okayagirwa! andîkûza oku bashombanyi bâni.5Emigozi y’olufù yanziriringa, enyîshi z’omu kuzimu zanyôbohya.6Emigozi y’omu kuzimu yanzunguluka, emirhego y’olufù yangorha.7Omu malibuko gâni nalakira Nyakasane, nàyambaza Nyamuzinda Nnâhamwîrhu; àyumva izù lyâni omu bwâmi bwâge n’omulenge gwâni gwahika omu marhwiri gâge.8Igulu lyanacidirhimana lyàgeramwo omusisi, ensimikiro y’entondo yàdundagana, yàdirhimana kulya kubà anakunîre.9Omugî gwatumbûka omu mazûlu gâge, engulumira y’omuliro omu kanwa kâge, amakala g’amasèsè gàmurhengamwo.10Anaciyûnamya amalunga, àyandagala, ecitù ciru ciru aha magulu gâge.11Ashonerakwo kerubi, àbalala, ajà alembêra oku byûbi by’empûsi.12Anacijira omwizimya gwàshuba cishûli câge, ecirâlo câge gwo mwizimya gw’amîshi n’ebitù bîru bîru.13Obulangashane bwamoleka embere zâge, n’ebitù byàhirigirha, byàrhenga-mwo olubula n’amakala g’amasèsè.14Obwo Nyamuzinda anacilaza emalunga, n’izù ly’Ow’enyanya lyàyumvikana15Anacilasha emyampi yâge, àbashandabanya, àlîka emilazô yâge, àbalibisa.16Okuhandi enshôko z’amîshi zàbonekana, n’ebiriba igulu lisimikirakwo byàfûnuka, erhi mirongwè yâwe erhuma, Yâgirwa Nyakasane, erhi mûka gw’obukunizi gw’omu izûlu lyâwe gurhuma.17Anacilambûla okuboko kwâge kurhenga enyanya, angwârha, ankûla aha amîshi gazungulira.18Anciza omu maboko g’omushombanyi mudârhi, andîkûza oku banzi bâni bandusha misî.19Bantêra olusiku lw’obuhanya, ci Nyakasane ashuba lwegemero lwâni.20Anfumya, àmpêka ahagalihire; ànciza, bulya kurhonya antonya.21Nyakasane anjirire nk’oku obushinganyanya bwâni bukwânîne, ampembera obucêse bw’amaboko gâni.22Bulyâla nashimbire enjira za Nyakasane, ntanahemukaga nti ngomere Nnâhamwîrhu Nyamuzinda.23Amarhegeko gâge goshi gayôrha gamba ebusù, n’obulonza bwâge ntaleka kwabujira.24Mbà mwimâna embere zâge, nnancîlanga oku kubî.25Naye Nyakasane anjirire nk’oku obushinganyanya bwâni bunakwânîne. angerera oku bucêse bw’amaboko gâni omu masù gâge.26N’omuntu mwinjà ôbà mwinjà, n’omwimâna ôbà mwimâna.27Ôbà mwêru-kwêru n’omwêru-kwêru, ci endyâlya kuyengehula oyiyengehula.28Nêci we ciza olubaga lw’abîrhôhye, onahonye amasù g’abacîbona.29We kamole kâni, Yâgirwa Nyakasane, Nnâhamwîrhu Nyamuzinda ye molekera omwizimya gw’amasù gâni.30Bulya n’oburhabâle bwâwe nangere omu lugamba lw’abanzi! na nka rhuli rhwêne Nnâhamwîrhu Nyamuzinda nambalale olugurhu.31Enjira ya Nyamuzinda ebà nyimâna, n’akanwa ka Nyakasane karhabâmwo kubirhi; abà mpenzi ya ngasi omuyâkiraho.32Ndigi oli Nyamuzinda aha nyuma za Nyakasane, Ndi oli lwâla aha nyuma za Nnâhamwîrhu Nyamuzinda?33Ye Nyamuzinda onzibuhya, ye yumanyanya enjira yâni.34Ye lembuhya amagulu gâni nk’ag’enshagarhi, ananyimanze omu malunga.35Ye yigîriza enfune zâni okulwa, n’amaboko gâni okufôla omuherho gw’amarhale.36Wàmpîre empenzi yâwe eciza, wanangwârha n’okuboko kwâwe kulyo; wankuza n’okubukombêzi bwâwe.37Olugendo lwâni walugalihiza enjira, n’amagulu gâni garhajajâba.38Nashimbulula abashombanyi bâni, mbagwanyanye ntâgaluke ntajibahungumula.39Nabashûrha bayabîrwe kuyimanga, bâhirima aha magulu gâni40Wanzibuhize omu ntambala, engabo zàli zintezire wazifunyira omu masù gâni.41Abashombanyi bâni wabayandûkakwo, bàmpindulira omugongo; abanzi bâni nabaherêrekeza42Banacihamagala, ci barhabonaga owankabaciza; bàyâkûza Nyakasane, àrhabashuzagya!43Nabatuntuma nka katulo kayehulwa n’empûsi, nabakandagira nka bajondo b’omu njira.44Wancizize obugoma bw’olubaga, wananyîmika mwâmi w’amashanja, abantu ntàli nyishigi bànshiga.45Abâna b’abantu b’ihanga bàndimîriza, bakayumva akanwa kâni ho na halya banakajira.46Abâna b’abantu b’ihanga bahirimire, barhenga omu birâlo bâli bayàkiremwo erhi badwîrhe bajuguma.47Ayâgirwe Nyakasane, luyagirwe Olwâla lwâni, aj’irenge Nyamuzinda, Muciza wâni.48Nyamuzinda ompôlera, ye lambika amashanja g’abantu aha magulu gâni.49We ndîkûza oku babisha bâni, onarhume nahima engabo zintêzire; onandîkûze oku muntu w’ebikanyâli.50Nêci, nâni nakâderha irenge lyâwe omu mashanja, Nyakasane, nâkayimba izîno lyâwe.51We rhuma mwâmi wâwe ahima okusômerîne, onarhonya omushîgwa amavurha wâwe, ye Daudi n’iburha lyâge omu myâka n’emyâka.