Yaru Divariri18kpr_tbl
David Gitofu De Sosighi E Rurusira Da Yaruri.
1Arie Bajari, ni dubo ererurena.Nanda sorega a fakina mutari kato nimori.2Bajari mo, nu nanda sorega mutari katori.Numokena tere fetono, na gagara arira.Nanda God mo, sorega mutari kato bekári.A nu nanda sonemba kato fakinagori.Na numokena junge feteraena.Nanda bere mo, numori, a fakina nune futurureari jebuga eraena.3Bajari dae sakai resena.Na numokena kori seteno, na gitofuda ungoda ava sonembusira.4Ambari da fakina evagoimi na kosege birurughedo afurugusira.5Ambari da fakina aimi namoa kosege jimbe birurughedo, namoa ivasi fiti bari dae kato usira.6Na nanda dara jokáda irise, Bajari dae kori siseni.Nanda God kena sonemba dae soraraghae kori seteno,nunda kambo kakara jokáda irise, nanda beka niningusira.7Amingetiri, enda javi use daradaraghiri, doriri susu javi javi use, ginoginoghusira.Ainda beká mo, God janje ekoko usira.8Imbosi nunda mendo tokáda gubighiri, nunda bekada avaraka buburaghae oeno veverago ava buvurutusira.9Utu jighi torere afigedo, foroga ingago nunda ata duruda fiti ainghae vose fusira.10Nu nunda Serubim aminda anumbetiri, yauraimi bu ghufusira.11Numo tumba jokáda afuregedo, borija da foroga ingagoimi doghusira.12Usasa nunda dombukena jaragheraira aminda ghedo biria avaraka buburago avavagai tarighiri,borija dombu eni yaurago tamo ghamanago, foroga ingago jokáda ghe beje buvurutusira.13Aminguse, Bajari Iká Bekáda nunda beka duka utuda ghe gururu didiviri nininguseri.14Nunda feva da goroba aimi afetiri, nunda gitofu sisigaga useri. Nu setiri biria tarighiri, ne oju e sufuseri.15Arie Bajari, ninda gitofu dombuda sise, kovionoghae koko seteso,eva kafuru da duru saghe fasedo enda susu isagha usira.16Bajari nu ikáda ghe sirige, na karaje kafuruda ghe jumbarigetiri vivituseni.17Nanda fakina dadabetiri, na nanda gitofu fakina kakato da ungoda ireno, God na saghimbe rurusira.18Dara ainda sifoda, ne na dari dae sufusera, avata Bajari na gagara usira.19Bajari nandae riria eraira aindae, nune sonembedo na budo jebuga vasada fitiri jebuguseni.20Na ari dambu use irá gheraena, aindae, Bajari nandae mino eveva muturaira.Namokena kosasa jo tambaeri, ágido na esimbugusira.21Na Bajari da Agho Dari rea resira ava useni.Na nanda God kena jo ari eko eni edo, gukai mutaeri.22Na nunda Agho Dari rea resira isambu kaifa useni. Na nunda sari eni jo kosasaghaeri.23Na ari eko eni jo ae eraena amo, nu kasamari.Amo na tofo ari sembae ari ava reeta eraena.24Na ari dambu use irá gheraena aindae, nu nandae mino eveva muturaira.Ai resira amo, na dara jo ae eraena, nu kasamari.25Arie Bajari, evetu genembo mave ni tumonduse irá gheraera, nemokena ninda beka gajari ava eraesa.Nimokena mave bekáda bekáda use, irá gheraera aikena, veka eveva eraesa.26Mave da irari forosogo beká ava irarira aikena, ni kavevera beká eraesa.O genembo mave aito eko fugeraira aikena mo, ni aito fugari eko beká eoso itatama eraira.27Ni tumbari embo ava sonemberaesa,o ivuga use totofo sakai seraera amo, eoso tumberaera.28Arie Bajari, nine nanda tumba emo jighi tonenembedo, nanda usasa muturaesa.29Gitofo nanjogo irera, ava daono dae sise, fakina nine muturaesa. Kotugo, gitofu da furu jarigari da fakina barago, nine muturaesa.30God emo nu rea eraira amo, dambugo bekári!Nu rea seraira, ainda beká siroreraira.Mave numokena junge feteraera, ainda bere mo, numori.31Bajari nusukako numoa God ri, eni tefori.Namondeda sorega mutari kato, God nusuka numori.32God nune eari, na fakina eraena.Nune eari, na emboroda kotae kotae ya foa gheraena.33Nune eari, na ata fete simbugeraena.Nune kaifa urureari na doririda jebuga deingheraena.34Isoro tataya aono dae sedo, nune na ijugeraira.Feva auri ari ava jighi otombedo goroba afari da aito ava ijugeraira.35Arie Bajari, nine gagara use, na sonembusesi.Na kaifa eso, binode edo irena. Ninda fakina tomanakoimi namoa kosegiri irena.36Na ondi kosege sandaetera ava, nine tavo eso, na jo gofae useni.37Nanda gitofu ondi sandi bambu tefo edo, isambu deteno sirivu useri, eni jo doyono jebuga yae usira.38Nane ne deteno du fafasusera amo, sekago jo erae arera.Nanda dombuda du ambu fafasedo irera.39Nine isoro ari da fakina ava, namokena futusesa aimi, gitofu de atai fati fefetuseni.40Nine eoso, nanda gitofu na do sumburaera.Mave na imboe gambue usera ava,nane de sosighi useni.41Ne sonembadae koko siseri, avata mave jo sonembari jebugae useri.Bajari kena kori siseri, avata nu jo ningae usira.42Ne fati jaseteno, kau fonja yauraimi fuseari ya dadaberaira, ainda kaugo useri.Ne, kau emboroda tauya fatiraera, aminga ava useni.43Evetu genembo gogore kakato eredo, namoa dari dae kotisera ainde isoro eno, na sonembeteso jebuguseni.Nine seteso na oro mendeni mendeni da bajari edo irena.Evetu genembo na berefoá isambu nanda sari ava eraera.44Teana embo nandae igheghi edo, nanda dombuda tumoi bainghuse, nane rea seraena, ava eraera.45Ne rojedo, ungo ata dadara garuse, nenda jungari vasa do buvuraera.46Bajari evovo dae irira, nanda sorega mutari katodae sakai saore!God namo sonembeari jebugeraena, ainda binó ava sakai sise, nunda javo jighono ikáda erare!47God nandae gitofu de atai fati fetari da fakina ava muturaira.Oro mendeni mendeni nune fitiari vosedo, nanda ata duruda irá gheraera.48Nune namoa gitofu kena sonembeari jebugeraena.Arie Bajari, nine na gagara urureaso, nanda gitofu janje ekoko ari kakato de atai fati feteraena.49Ava sedo, Bajari, na oro mendeni mendeni jokáda irise, nindae sakai seraena.Yaruimi didivuse ninda javo jighi eono ereraira.50God nune de atai fati fetari da fakina ava nunda kini dae muturaira.Kotugo nunda dubo bari ava,Kini David edo nunda imendi gamendikena evovodae ijugudo yarira.