SAM18cth_bcf
Lathueng Poung rungngangkung Cathut
Kathutkung: Devit, Bawipa e san, Devit ni Sawl koehoi taran kut dawk hoi, hloutsaknae hawinae coe torei teh, BAWIPA hmalah sak e la
1Oe ka thaonae BAWIPA,nang teh na lungpataw han.2BAWIPA teh kaie lungsong,kaie rapan, kaie rungngangkung lah ao.Kaie Cathut, ka thaonae,ka kâuep e bahling hoi ka rungngangnae ki hoi ka rapanim lah ao.3Pholen kamcu BAWIPA teh ka kaw vaiteh,ka tarannaw um hoi rungngang lah ka o han.4Due patawnae ni na kalup,Cathut takihoehnae tuikalen ni na taki sak.5Sheol lungmathoenae ni na kalup teh,duenae tangkam ni na kangdue sin.6Kângairu kecu dawk BAWIPA ka kaw teh,ka Cathut koe ka hram.A Bawkim koehoi na thai pouh teh,a hmalah ka hramnae hah a hnâ koe a pha.7Hottelah, talai a kâhuet teh a pâyaw.A lungkhuek dawkvah, mondunaw totouh a pâyaw teh,a kâhuet awh.8A hnawng dawk hoi hmaikhu a luen takhang teh,a pahni dawk hoi ka tâcawt e hmai ni, koung a kak awh teh,hote e niyah hmaisaan a kaman sak.9Ama ni kalvan a kamkuisak teh, a kum cathuk.A khok rahim vah hmonae teh ao.10Cherub a kâcui teh a kamleng.Kahlî rathei van vah a kamleng.11Hmonae teh ka dungpoung e hmuen lah a coung sak.Tui hmonae hoi kathapoung e kalvan tâmai hahama kangangkung lah ao.12A hmalae angnae ni, kathapoung e tâmai a kâhin sak teh,roun hoi hmaisaan a bo.13BAWIPA ni kalvan hoi khoparit sak,A Lathueng Poung Cathut ni a lawk a tâcosak.14A lipala hah a pathui teh, a taran hah a pâyaw sak.Sumpa a palik sak teh, koung a tâ.15Oe BAWIPA, na yuenae hoi na hnawng dawk e kâha ni a hmu dawkvah,talî laheipadin teh koung a kamnue teh,talaivan e dunaw teh a kamnue awh.16Lathueng hoi na kut na dâw teh,moikapap e tui thung hoi na rasa toe.17A thakaawmpounge ka taran kut dawk hoi na rungngang teh,na ka hmuhma ni teh athakaawmpounge naw koehoihaiyah na rungngang.18Ahnimouh ni runae ka kâhmo navah, na kangdue sin awh.Hatei, BAWIPA teh ka kâuep e doeh.19A hmuen kaw poung koe kai hah na thak.Kai dawk a lunghawi dawkvah, na rungngang.20BAWIPA ni, ka lannae patetlah aphu na poe.Ka kut a thoung e patetlah na patho toe.21Bangkongtetpawiteh, BAWIPA e lamthung hah ka pâkuem teh,ka Cathut teh kahawihoeh lahoi ka cettakhai boihoeh.22Bangkongtetpawiteh, a lawkcengnae pueng teh ka hmalah ao teh,a coungnae hah ka tâkhawng boihoeh.23A hmaitung toun awm laipalah ka o teh,payonnae hah ka roun.24Hatdawkvah, BAWIPA ni ka lannae patetlah na patho.A mithmu ka thoungnae patetlah na patho.25Tami ka pahren e koe pahrennae na kamnue sak vaiteh,tamikalan koe lannae hah na kamnue sak han.26Tami kathoung koe na thoungnae na kamnue sak vaiteh,tami ka taran e koe tarannae hah na kamnue sak han.27Bangkongtetpawiteh, kârahnoumnaw hah,na rungngang teh, kâoupnaw hah na pabo han.28Ka hmaiim hah na ang sak teh,BAWIPA ka Cathut ni kaie hmonae hah a ang sak han.29Nang pawlawk lahoi ransahu hah ka raphoe han.Ka Cathut pawlawk lahoi khorapan ka kawi thai han.30Cathut e lamthung teh a kuep.BAWIPA e lawk teh a thoung dawkvah,Ama kâuep e tami pueng hanelah bahling lah ao.31Bangkongtetpawiteh, BAWIPA laipateh,bangpatet e Cathut alouke maw kaawm.32Thaonae hoi na kapathoupkung teh Cathut doeh.Ka lamthung hai a kuep sak.33Ama ni ka khok heh sayuk khok patetlah a sak teh,a hmuen rasangnae koe na o sak.34Ka kut heh tarantuknae a cangkhai.Hatdawkvah, ka kut ni rahum licung patenghai a sawn thai.35Na rungngangnae bahling hai na poe toe.Aranglae kut hoi na kuet,na panguepnae ni na tawmdawm.36Ka ceinae lamthung na kaw sak dawkvah,tâlaw laipalah ka o.37Ka taran ka pâlei teh ka pha.Koung ka raphoe hoehroukrak ka ban takhai boihoeh.38Bout a thaw thai hoeh nahanelah, hmâ ka paca teh,ka khok rahim koung a rawp awh.39Tarantuk hanelah na pathoup toung dawkvah,na katarankung teh ka rahim vah tâ lah ao.40Ka taran teh na yawng sak.Hottelah na kahmuhmanaw heh ka raphoe.41Ahnimouh teh a hram awh.Hatei, ahnimouh rungngangkung awm hoeh.BAWIPA koe a hram awh ei, pato hoeh.42Hottelah, vaiphu kahlî ni a palek e patetlahdikkaneng lah ka nep teh,lamthung dawk e songnawng patetlah ka tâkhawng.43Ka yonnaw thung hoi na rungngang teh,miphunnaw e lû lah na coung sak.Ka panue hoeh e naw ni ka thaw a tawk awh han.44Ka lawk a thai awh tahma vah, a tarawi awh teh,ramlouk taminaw hai kai koe a kâhei awh.45Ramlouk taminaw teh koung a yawng awh teh,a kâhronae hmuen koehoi, taki laihoi a tâco awh.46BAWIPA teh a hring.Kaie lungsong teh pholen lah awm seh.Kaie rungngangnae Cathut teh tawm lah awm seh.47Cathut teh moipathung pouh kung lah ao teh,ka rahim e taminaw katâkung lah ao.48Ka tarannaw koehoi na rungngang teh,na katarankungnaw lathueng vah, na tawm.Rektapnaw kut dawk hoi na rungngang.49Hatdawkvah BAWIPA, Jentelnaw rahak vah,nang koe lunghawilawk ka dei vaiteh,na min pholen hoi la ka sak han.50A siangpahrang koevah, ka len e hloutnae a poe teh,satui awi e Devit hoi, a catounnaw lathueng vah,a yungyoe hoi a lungmanae a kamnue sak.