1Angraeng to saphaw oh. Vannawk hoiah Angraeng to saphaw oh; anih to ranui koek ah saphaw oh.2Angmah ih vankaminawk boih, anih to saphaw oh; angmah ih van misatuh kaminawk boih, anih to saphaw oh.3Ni hoi khrahnawk, anih to saphaw oh; nangcae aanghaih tawn cakaehnawk boih, anih to saphaw oh.4Nangcae vannawk ih vannawk, vannawk nui ih tuinawk, anih to saphaw oh.5Anih mah lokpaek naah, hmuennawk to angcoeng o pongah, Angraeng ih ahmin to saphaw o nasoe.6Anih mah to hmuennawk to dungzan khoek to caksak moe, amro han ai ah lok a paek.7Long ah kaom tuipui thung ih moinawk hoi kathuk tuinawk boih;8hmai hoi qaetuinawk, dantui hoi tamainawk, a lok tahngai takhi saenawk;9maenawk hoi maesomnawk boih; kathai thingnawk hoi sidar thingnawk;10kasan moinawk hoi im ah pacah ih moinawk; zok hoi kavak moinawk hoi kazawk tavaanawk;11long siangpahrangnawk hoi kaminawk boih, angraeng ih caanawk hoi long lokcaekkungnawk boih;12thendoengnawk hoi tanglanawk, mitongnawk hoi nawktanawk; Angraeng to saphaw oh.13Anih ih ahmin khue ni hoih; a lensawkhaih loe long hoi van nuiah oh.14Anih loe angmah ih kaminawk to taki tacawtsak moe, angmah ih kaciim kaminawk boih saphawhaih, angmah hoi anghnai koekah kaom, Israel caanawk saphawhaih doeh anih mah ni sak pae. Angraeng to saphaw oh.