Yawe Amrlzle Nigu Leplz Nedeng Mz Zmatq Ngrde
Yawe Rngisc Zmatq Kx Xplr
1Naglqlzku Yawe!Mrlzvxitx nzangrlvz-krgu Gct rgu.Brngzvxitx x takitrde nzglqlz-krgu nide.2Yawe yrlq-zpwx-moule Jerusalem,Mz nzvzmi-kr-mople lr Israel kcng tzlolvzting enqmi rdrng.3Rka-mopwz nzabrtzngr mz leplz lcng drtwrdr tqtalvzo,Mz nzawxo-krbzle drtwrdr apule kx pnutibzle kxsqki rdr.4Krlzle me krlzbz nzkqlukr vri,X yrlqtibzle drtqdrng amrlx.5Yawe etu-esz'ngr x rngisc zmatq kx xplr.X trpnzngr kx rkrlzlzbz nzyrplapx-krde.6Atubxlzle kxnzobqszong,A' rnzbrtiole kxdrka'-ngrng mz drtc'.Mnc-xgleku Zmatq Rde
7Nangr-ngrgu nabz kx yrlvi mz nzayrni-krbzku gita mz Yawe,Mz nzawi-krbzku bade.8Murde yrlqtibzle dcbz mz bongavz x adco-ngrmle tewa nalrprngr drtc',Murde nalutingr nabr kxvo mz nra.9Rkabz dakxnzng mz animol amrlx,X aputrle nei utc amrlx mz nzyrni-krbzlr bade mz dale ngr nelzdr.10Delc trmrlz-ngrpwzleu mz Yawe nzabrtr-ngrbzku drtwrgu mz nzxplrkr hcsi ngr vea negung,X nzaovxiokr ncblo ngr vea negung.11A' mrlzbz bade krkcng tzamrluelr nide,X tzmnc-xglelr nzaodu-zvz-krde nidr.Zmatq Ngr Natqde
12Nigu lr Jerusalem kcng tzangiolr Yawe mz Newz Saeon,Naglqlzku nide, kc tqngi Gct rgu.13Murde amqngitibzle naonrx ngr Jerusalem x bz ngr mrnyzgr.Amrlz-zvzle lr mzteadau nyzde,X amnc-zpwxle nigu leplz nedeng amrlxMz nzrka-krmle bagu da kxmrlzting.15Mzli kc tqycmnepx-ngrdeDalr nrlc nzvz-nqblq-anilr natqde.16Mz mzli r zbao, sncu prlxlvztxde drtc' apule lrpz kxprki.X dcbz vzom mz nrlc apule zsikapu.17X muli-aes rlxom mrkcng amrlx.Murde da amrlx lcng nayclzbzng mz zmatq ngr zbao.18A' mz nzycmne-mou-krde, nrlc kc tqpqpe,X nzwqkr nenq kxpq ayrle-mouleng lue kcng tqngi aes.19X natq lc tqmatq tqpim Yawe bagu, nigu leplz nedeng,Murde nayrlq-angidrku nzalvztr-krdeng x Loukxtr scde.20Trpipxpwzleu lou scdeng mz lr mrkzbleng,A' nigu txpwz, mz nzngini-krgu leplz nedeng.Naglqlzku Yawe.