Yɛsɑ̃ɑ̃139tbz_sim
N Yiɛ̀ nKuyie nhɑ yɛ̃́mu n kpɛti timɔu
1Bɛdèmbɛ̀ kóo kótì dìèmmɛ̀ Dɑfiti yɛ̀nfɛ̀.N Yiɛ̀ nKuyie nhɑ n wúómu kɛ n yɛ̃́.2Kɛ̀ n kɑ̀ri ɑ yɛ̃́mu, kɛ̀ ǹ yìtɛ́ ɑ yɛ̃́mu,n yɛntotí ɔ̃ nkpɑɑ́ díɛtirì kɑ̀ɑ ì yɛ̃́mu.3Kɛ̀ m bo kupɔ̀ɔ̀kù ɑ yɛ̃́mu, kɛ̀ n duɔ́ ɑ yɛ̃́mu,ɑ í biinnìnɛ̀ n kó kucɛ mɑkù.4Tinɑ́ɑǹtì ɔ̃ɔ̃ í nyɛ̀nní n nùù,n Yiɛ̀ nKuyie nkɑ̀ɑ pɑ̃̀nkɛ ti yɛ̃́mu timɔu.5A bomu n fɔ̃nkúò, kɛ bo n yììkɛ̀,kɛ̀ m bo ɑ nɔ̀ùtɛ̀ miɛkɛ.6A n yɛ̃́ kɛ̀ dɛ̀ tontɛ́mu,m bɑ́ɑ́ nɑ kɛ́bɑntɛ́ ɑ n yɛ̃́ kɛ̀ dɛ̀ mɑ̀mɛ̀,dɛ̀ pɛ̃ɛ̃tɛ́mu n ciì.7M bo kɔtɛ kɛ kɛ dɑ dɛ́tɛ́nɛ̀?M bo cokɛ́ kɛ́cuó nkɛ kɑ̀ɑ í nni nyɑ̀?8Kɛ̀ n dèkɛ kɛĩ́nkɛ̀ ɑ kɛ̀ bomu,kɛ̀ n tɑ kudɔnkù ɑ kɛ̀ bomu.9Bɑ́ kɛ̀ m pùu kɛ kɔ̀tɛ diyiè yìɛ̀ní kɛ̀,bɑ́ kɛ̀ n sèńtɛ́ dɑ̀mɛ́ɛ̀rì yɑ́ɑ̀ ɑ kɛ̀ bomu.10A nɔ̀ùtɛ̀ tɛɛ̀ bɑɑ yó nni nni,kɑ̀ɑ nɔ̀ùtɛ̀ youtɛ m pĩ́.11Kɛ̀ n yĩ di mmɔ̀nnì dibiìnnì nɛ́ ǹ dɑ̀tínnɛ́mudibiìnnì dìì n fitɛ́ dìi nɑɑ́nko kuwenniku.12A borɛ̀ dibiìnnì í tú dibiìnnì,ɑ borɛ̀ kɛyènkɛ̀ dò nkuyie nku,ɑ borɛ̀ dibiìnnì nɛ̀ kuwenniku dɛmɑ́ɑ̀ ndi.13Fɔ̃́ɔ̃̀ n dɔ̀ɔ̀,fɔ̃́ɔ̃̀ m pìítɛ́ n yɔ̃ pɔutì miɛkɛ.14N dɑ sɑ̃ntímu, ɑ n dɔ̀ɔ̀ kɛ̀ m mɛ̀nkɛ wennimu mɛdiɛ̀,ɑ tɔ̃mmú dɛumu kɛ̀ n tì yɛ̃́ mɛsɑ̀ɑ̀.15N kṹɔ̃̀ do í dɑ biìnninɛ̀,ɑ do n dɔɔri dìì mɔ̀nnì disɔ̀rì,ɑ do m pìítɛ́ dìì mɔ̀nnì n yɔ̃ pɔutì miɛkɛ.16N do ketírí n yɔ̃ pɔutì miɛkɛ, kɑ̀ɑ n wùómu,kɛ wɑ̃̀ri ɑ pɑ́tíri miɛkɛ yɛwe ɑ n duɔ́ nyɛ̀,bɑ́ dìmɑrì mu nyí ketɛ́.17Kuyie nhɑ yɛntotí í dò n yì nìntɛ,ì mɛ̀nkɛ dɛumu.18Kɛ̀ n tú m bo ì kɑ̀ɑ m bɑ́ɑ́ deè,ì sũnɛ̀mu mubirímú,bɑ́ dìì yiè nh ɔ̃ɔ̃ entɛní kɛ nsɔ̃́ m bonɛ̀ fɔ̃́ nwe.19Áú Kuyie! Kɑ̀ɑ bo yie nhɑ́ kuɔ bɛyɛibɛ,kɛ̀ dɛ̀ bo yie nhɑ dɛ́tinnɛ bɛnitikɔ̀ùbɛ̀.20Bɛ̀ yu ɑ yètìrì nɛ̀ siyɑ́ɑ̀bìsí nsi,bɛ̀ tɔ ɑ yètìrì dɛtetìrɛ̀ ndɛ bɛmbɛ ɑ dùɔ̀ntɔbɛ̀.21Ti Yiɛ̀ nKuyie mbɛ̀ɛ̀ dɑ níí, n yí bɛ̀ dɔ́,bɛ̀ɛ̀ í dɔ́ ɑ kpɛti bɛ̀ n dò nyisíɛ́ nyi.22M mɛ̀nkɛ bɛ̀ nìímmu timɔ́mmɔnti,bɛ̀ tu n dootitɔbɛ̀ mbɛ.23Kuyie! Á n wéntɛ́ nɛ̀ n yɛ̀mmɛ̀ miɛkoo,ɑ́ n yɑ́ɑ́kɛ́ kɛ́yɑ n yɛntotí dòmmɛ̀.24N wéntɛ́ mɛsɑ̀ɑ̀ kɛ̀ m bɑ́ ntũ nkucɛ yɛiku mɑkù,kɑ̀ɑ n niitɛ́ kucɛ kùù í ceeri ku miɛkɛ.