Israel naŋgi Qotei na jeu tamo naŋgi padaltnjrqajqa deqa pailyeqnub
1O Israel, ni endegsi mare, “E aŋgro wala sonamqa jeu tamo naŋgi na e ugetboqneb. Ariya naŋgi na e buŋbosaioqneb.3Naŋgi bu toqoŋ na e kumbaiŋbeqnabqa bu toqoŋ dena ijo jejamu ugeugeiyeqnaqa ijo qoreq di yu kokba bumbraŋyoqneb. Tamo a iŋgi wauq di mandam qamsim bulyqas dego kere.4Tamo Koba Qotei a bole tiŋtiŋ unu deqa a na e aqaryaibosiqa tamo uge naŋgo baŋq na e taqal waibej. A degyej deqa e olo naŋgo sorgomq di sosai.” O Israel, ni degsi mare.5O Abu Qotei, ni na tamo kalil Saion qure jeuteqnub qaji naŋgi winjre. Ni degyqam di naŋgi tulaŋ jemainjrim ni uratmosib isaq gilqab.6Ni na naŋgi urur moiyotnjrime. Ni degyqam di naŋgi ñiŋ bul sqab. Iga qalie, ñiŋ a tal gogeq di brantoqnsiq oqosaisosiq urur qaŋgraŋeqnu.7Ñiŋ di torei ugeqo deqa tamo bei na koroiyosim aqa talq di atqa keresai.8Deqa tamo qudei naŋgi gamq di a turosib endegsib minjqa keresai, “Tamo Koba Qotei na ni boletmeme. Ni Qotei aqa ñam na bole soqnime.” Degsib minjqa keresai.