Gct Ayzlu-zvz-ngrbzle Natq Leplz Nedeng
Nzawingr
1Na-awi-ngrbzku mz Yawe nzmrlz-esz'ngr-krde.Murde aodu-zvzle nigu.2Naglqlz-zvzku nide,Murde arlapxbzle nigu mz mq enqmi rgung,3Mz nzkapx-krmle nigu mrkzbleng mz nrlc tulvzo.Murde nayrlwr-lxblrku mz drtc' nyzde.Kxnzayoneng Lzke
4Kzdung nigu nzayoneng lzke,Me trpnzngr lrpzki kx narmcti-ngrdr mztea kx namnc-ngrdr.5Kztegu lcng nzbrtale-zlwzng, nzbrlxkz-zlwzng,X mztr tclvrting.6Zbz sc tzkqlepelr Yawe,Kc tqkatxpxpebzle nzkxpu-krdr.7Mailzle nidr mz lrpzki kxtubq,Vz, vz nzkrlzbzlr mztea kx namnc-zpwx-ngrdr.8Rkabz lue mz kxnzbrlxkzng,X dakxnzng kxmrlzting mz kxnzbrtaleng.“Awi Yawe, mz nivz lrm kc tqyc tqyc, eu.Okatr-zvzq nigr. Awi Yawe, mz nivz lrm.”Kxnzmncng Mz Presin
10Kzdung nigu nzatolva-ngrng mz presin,Mz nzmncpx-krmlr me tungr nzlo.11Murde nzrnzlvzolr lou sc Gct kc tqmyatxlz-esz'ngr,X drtqdr sa kz nzrlolvzngr nzalvztr-krdeng.12Delc tqngi-batr-ngrbzle nzetqkr drtqdr mz nzwz-kato-krdr.X nzyangrngapeng, a' trpnzngr kx naokatrle nidr.13Zbz sc tzkqlepelr Yawe,Kc tqkatxpxpebzle nzkxpu-krdr.14Aopxbzle drtqdr mz da kc tzatolva-ngrdr,X vzmipxmleng mz nabz nzlo mz zyzlr.15Zmatq ngrde myaszpxle naonrx ngr presin,Mz nzodati-atwrnr-krdele.“Awi Yawe, mz nivz lrm kc tqyc tqyc, eu.Okatr-zvzq nigr. Awi Yawe, mz nivz lrm.”Kxnzyagoxng
17Kzdung nigu nzpxtxpx-ngrdr Yawe mz nzngqngu-krdr,X ayrplapxle nidr mz alwx ngrdrng mz nzbatr-krbzle nzyagox-zlwz-krdr.18Mzli lc nzpxpe-ngrdr nzmungr,X nabzpeng.19Zbz sc tzkqlepelr Yawe,Kc tqkatxpxpebzle nzkxpu-krdr.20Yawe amrlzle nrkrdrtqdr mz zyagox lcng mz nzycmnetx-krpwzle.Delc tzrlapx-ngrdr mz nzbzngr.21“Awi Yawe, mz nivz lrm kc tqyc tqyc, eu.Okatr-zvzq nigr. Awi Yawe, mz nivz lrm.22Abrtz-zlwz-ngrgr nim nzkatxpx-krbzmeNzkxpu-krgrngq. Abrtz-zlwz-ngrgr nim.Naglqpx-zvzkr nim mz nzngr-krgr nabz,X mz nzale-krgr blz. Naglqpx-zvzkr nim.”Kxnzalilvcneng Mz Lcsu
23Kzdung nigu nzalilvcneng mz lcsu prla,Murde nzrtrngztibzlr nzmabz-krdr elr.24Kztegu lcng nzmclr zmatq ngr Yawe,Mz da kx aleting dcpwe.25Mzli kc tqycmneti-ngrdr nenq, x trlipu r nenq kc tqwqpe.X batrpzle nzvzdz-krm ebio wq.26Ebio lc glqtxlzle lcsu scdr wq.X twzo-moule mrbrobz mz mzlirdr mz kztedeng.Trlipu lc avzdzmle nelzdr x alibzle drtwrdr.27Dea-ngrdr tqvzne x nztaneng nzapulr ncblo kxnzrmnqng.X trpengr da kx nakrlzlr kx nartrngztibzlr.28Zbz sc tzkqlepelr Yawe,Kc tqkatxpxpebzle nzkxpu-krdr.29Ycmnebz mz nenq x sc tqamaope,Mz ebio x nrwx kc tqvope.30Kztegu lcng nzabrtztx-zlwz-ngrdr nzvopekr nrwx,X sc tqmailztrpeng Gct mz nabzn kc naokitrlr.31“Awi Yawe, mz nivz lrm kc tqyc tqyc, eu.Okatr-zvzq nigr. Awi Yawe, mz nivz lrm.32Napipxbzkr nimq mz mz lrtzlvzng,X mz leplz amrlx. Napipxbzkr nimq.”?Nzayrplapxngr O Nzamrlzngr?
33Yawe apztx-atwrnr-ngrde lue kxnzetuting,X aesakile nzyrlelz-krm aulzng,34X apiz-kzle drtc' murde trpnzngr da kx nalvcpu mrlcde,Mz nzayrplapx-krde kxdrka'-ngrng kcng tzmncng elr.35A' me ngi drta'ngr ngi nabzdeng kx lrngr lue,X drtc' kx mingrting yrlelz-ngrm aulzng.36Murde navzmimle melrmqgung kxnzbrtaleng namncng mrlcde,Mz nzwz-krdr mztea nyzdr kx namnc-ngrdr.37Nzrwz-ngrng nrlanc x nzpetilr nounc,X nzrnginanqng dakxnzng x nranc kxkqlu.38Amrlz-zvzle nidr x ngi-batrpzle nzrmika-krdr doa kxkqlu,X nzkqlunepxkr animol nedrng.?Kxnzyrplapxng O Kxdrka'-ngrng?
39Mzli kznike leplz nzobqszo-ngrdr niguMz nzatalvzo-krbzlr drtwrgu x nzaetq-zlwz-krbzlr drtqgu,40Gct kc tqobqszo-ngrde kxnzetung kxnzglqpx-lzbqng,X batrpzle nzayone-krdr nzapulr kx trpnzngr me tutrngr nzvzne-krdr.41A' katxpxbzle nzkxpu-krgu, nigu leplz txneng,X aclvele nigu mz nzapu-krgu sip nedeng.42Kxnztubqng nzmclr nqmq krde x nzabrtz-zlwz-ngrdr.A' kxdrka'-ngrng nzwx-nabu-txpwzng.43Krkcng tzyrplapxng nakrlzlr da lcngMz nzaotikr drtwrdr nzetukr nzaodukr Yawe nigu.