Anduane Homogo ibu bayale gibiore biaga kagonaga mini mo yaraga henego ogo
1Anduane Homogo ibugua inahondo baya gibi dege bigi biaga ka.Ibugua ina gubalini haho wiaaboore haga kagoni.Ibugua ani biaga kagonaga iname ibuhondo ka̱i̱ lolene nga.2Ala tínaga waitigi hearunaga gime tí minu yaniho heariaAnduane Homogohanda gingila mialu haru dai bini kamirutígua i̱na larodagua dege laluina haru Anduane Homogonaga mini mo yaraga hami̱ya.3Tí dindi haluni taraha hemiria ibugua haru dai biyagoni.Dindi tara tara ni tagira ibiragohayagibi ni paliragohayagibiuyurahayagibi unurahayagibi dindi uruni bibahendeni hemiriaibugua tí haru dai biai hayagoni.4Wali agali maru dindi ko wali agali nahaga wiagoha pupe halu pene.Piyago puwa hariga nawiaha pu lulu yuwawali agali pale andahe mbira nawiaha iraga howa pu taluaho hene.5Pu taluaho howa hina gari gibiore bialuiba noa howa hége lebolaho daga hayagolaai tongoore lole ogonida lo manda bini.6Tini darabi ogonibiore howa Anduane Homogo olayagolaibugua ti biamogo bigi bialugenda yu hearuni yamuwa mo wahaga bini.7Ani bialu ibugua ti hariga tigabini pelo haru pialutano mbira ti holene winiyagoria haru pu helene.8Anduane Homogohanda ti gubalini haho wiaabo halutinaga mbirale baya gibi turubini hangu bia haga bialu hayagonagatigua Anduane Homogohondo ka̱i̱ore lolene nga.9Wali agali iba noa howa hége yobu karu iba nelo ibugua miragolati iba karulapeore nowa dungulo helo miaga ka.Wali agali tomo noaho karu nelo tomo dewaore miragolati haruore nowa tombe to̱lo haga kagoni.10Wali agali maru arumaore dumbiliniha howapu senime gi ge minu hubabu wiagolagarabayaore howa gendaho hene.11Ti ogonibiha henedagoni iranetinime Ngode Datagaliwabe Hongo Haiheore kagomeogoale bibe nabibe lalu laga biyagolatigua ibunaga bi erembira mialu piyagome tini ogonibiha pu hene.12Pu howa ti erekui biabe biadege bialuhongo bibahende pirilipe hai hayagola hene.Hongo bibahende ereba hai halu dindini pilo ibira haga biyagolati gi mulene mbirali nahene.13Tini darabi ogonibiore howa Anduane Homogo olayagolaibugua ti biamogo bigi bialu genda yu hearuni yamuwa mo wahaga bini.14Anduane Homogohanda ti arumaha mini burugule ogoniha heariapu seni biaru hadape haluti garabaya hayago lone hodai nabilo golope halu pelene.15Anduane Homogohanda ti gubalini haho wiaabo halutinaga mbirale baya gibi turubini hangu bia haga bialu hayagonagatigua Anduane Homogohondo ka̱i̱ore lolene nga.16Ibugua aeane hongohe mini boronosime panga payadaruni duanialuaeaneme garabaya anda hobanda karuni podo gingirulo bagabu ibira ibira bile laga ka.17Wali agali maru ti kedange howa tinime mana ko tara tara dewa bigi biyagomewarago balu tandaga nalu hene.18Ti tomo noa nahe magu gibi halu tomoore de handaya haga biyagolatongolo mialu dai bigi bini.19Tini darabi ogonibiore howa Anduane Homogo olayagolaibugua ti biamogo bigi bialu genda yu hearuni yamuwa mo wahaga bini.20Anduane Homogo ibunaga bime ogoale bia layagolatinaga tingini biaruni lone mo dabiho dai bialuhomalihaore anda pole biyariaibugua ti gililo mu yudai bigi biyagoni.21Anduane Homogohanda ti gubalini haho wiaabo halutinaga mbirale baya gibi turubini hangu bia haga bialu hayagonagatigua Anduane Homogohondo ka̱i̱ore lolene nga.22Tigua Anduane Homogohondo ka̱i̱ lalumbirale ibuhondo bo lomabu mulene nga.Tigua iba gana turu halu lalu wali agali maru karu hale heloAnduane Homogohanda mana bayaore bigi biyarunaga mo yaraga halu lamiaga bulene nga.23Agali maru ti iba sibini palu howaiba solowara angeni gago taguape hama ibaga bialudindi ngagoha ibaga biai halutinde muni biabe ogoni biaga hene.24Agali iba sibini biabe bialu haga uruni tiguabiAnduane Homogohanda bigi biyago handaga bini.Anduane Homogo ibugua iba solowarani mbirale bayaore bigi biyago handaga bini.25Anduane Homogo ibugua ani bia layagolapuyabu hongoheore pu lalu iba solowara yaribu gibiore bini.26Ani biyagome iba sibiru uyura daligaore mo baraga halulone unura mo baraliore haga bini.Hiriribi ogonidagua bigi biyago handayagolaagali iba sibini biabe biaga biarumeaiore áyu homarimadagoni manda buwa gi timbuniore ho hene.27Tinaga mini bibahende puguai halu homolene anda ibiyagolalulu iba nowa mini ereba howa sibaga lo haradaguati iba sibi biagoriani ibagabu hene.28Tini darabi ogonibiore howa Anduane Homogo olayagolaibugua ti biamogo bigi bialugenda yu hearuni yamuwa mo wahaga bini.29Anduane Homogo ibugua puyabu hongohe pu layagoni pulairi helaluiba yaribu gibiore biyagoni mo hundia haluiba solowara ema nabi bayale berelene.30Iba solowarame ema nabi bayaore birape hayago hondowaagali biaru ti turuore halu hene.Anduane Homogo ibugua ti bayuwa haru pialuiba sibi anda pu wiaga wiagoria ubandaho ngelene.31Anduane Homogohanda ti gubalini haho wiaabo halutinaga mbirale baya gibi turubini hangu bia haga bialu hayagonagatigua Anduane Homogohondo ka̱i̱ore lolene nga.32Uruni tigua Ngode Datagaliwabenaga wali agali mandagi ngoaiho bedagoriaAnduane Homogo ibu daligaore gibi kagoni lalubibahende hale hai helo lope holene nga.Agali haguane dege dege ngoaiho bedarubi hale hai heloogoriani ibunaga mini laraga holene nga.33Anduane Homogo ibugua iba poraruni hundilai helaluiba dindiha howa dugualu karuni bibahende hundi tege lelaga hene.34Dindi bene bere mbirale anda holene ngaruni mo beregedowambirale mbira anda habe nahe koore ibi dindi kuni panaho ngelaga hene.Ogonidagua biaganego irane wali agali dindi ogoriani hearume ko gibiore biyagolati genda ogoni yilo Anduane Homogo ibugua miaga hene.35Dindi ko mbirale mbira anda nahaga ngarunaga iba goroyane tagira íbu berelaludindi yobu dagahe ngarunaga iba dugutagi helaga bini.36Ibugua dindi bene bere ogoriani wali agali ala tomo nolene nawi buru palu haga hearudindi ogoriani haru ibalu tigua anda bu hene.37Ti ogoriani hope ho howa ti mabuni tomo hangalupu mbira lini daga mini gerebi dewa hongo wini.Hongowa tomo dewaore ti mabuni bu ngaria bialugerebi lini dewaorebi daga hene.38Anduane Homogo ibugua ibunaga wali agalihondo baya gibiore bialuti mo gumbila hayagolatinaga waneigini dewaore hene.Ibugua tinaga nogo tara tara hearubi dewaore ho dame bilene.39Anduane Homogonaga wali agali biaru tinaga waitigi hearume bo hengedalumo taga hayagola tandaga nalu dindihaore darabi hearia hondowa40ibugua ibunaga wali agali biaru bope haga agali haguane hearu mo habane nabulene helaluti dindi ko hariga nawi wiagoha luluyu ibagabu helo helene.41Ani biyagoyu wali agali yagibano darabi ha ko howa hearuibunime ti biamogo bigi bini.Tinaga waneigini dewaore nogo sibi ale tagira íbu helo biamogo bini.42Wali agali mini tigabiwi karumeAnduane Homogohanda baya turubi urunibi bigi biaga kago hondowati turuore halu miniha dunguore lo haga ka.Wali agali mini kowi karu tinaga bi mbira lolenego nawioredagolati bame ne hambu ndibu lowa hama pedagoni.43Anigo ai wali agali mini gigabiwi karume bi o laruruni damenego bibahendeorebaya hangu mitangi biai helo hameledo.Anduane Homogo ibugua ti gubalini gibiore haho wiaabo haga kagoogoninaga laluore maru karu hale hai helo hameledo.