Zabuli104kdc_pbt

ZABULI YA 104

1Gweye moyo wangu mtogole Mndewa Imulungu.Gweye Mndewa Imulungu, Imulungu wangu,gweye kwa mkulu ng'hani,gweye kuivaza ukulu na nhogolwa.2Kuvala mulenge kamba kiwalo,kuukunzula ulanga kamba panziya.3Kazenga ukazi wake uchanha ya mazi ga kuulanga.Kagatenda mawingu kamba mtuka wake,kazumha uchanha ya mabawa ga beho.4Kaditenda beho diwe msenga wake,moto na milambi ya moto iwe wasang'hanaji wake.
5Kuisimika isi uchanha ya chandusilo chake,sikuitigisike siku zose na milele.6Kuigubika isi kwa bahali kamba kiwalo,na mazi gavigubika vigongo.7Kukomhoka na mazi gakimbila,kwa sauti ya ng'huwa mazi gakilima.8Gakilima kulawa kuvigongo na gahumuluka kubonde,mbaka hanhu haulondile.9Kuchaga imbaka sikugabite,na sikugabwele kuigubika isi yose.
10Kogala nzasa kubonde,zobita hagati ya vigongo,11zomng'weza kila mng'onyo wa kubonde,mhunda luwala kokanha ng'hilu.12Kumgwazo okala ndege wa kuulanga,hagati ya matambi olava sauti zao.
13Kulawa kuulanga wako koving'weza vigongo,isi iguta ndiya ya sang'hano yako.14Koyoteza mijani mbuli ya ng'ombe,minoga mbuli ya munhu,ili yapate ndiya kulawa mwiisi ayo,15na divai imsamhuse munhu,na mavuta yaking'aze kihanga chake,na gate dimtende munhu yawe mgima.
16Mibiki ya Mndewa Imulungu nayo ishiba,mielezi ya Lebanoni ayo ihandigwe.17Mumo ndege ozenga mvulu zao,na nyamkuta kazenga kae mdibiki.18Kuvigongo vitali kuko kuweli mbuzi luwala,mmihango mumo oifisaga ndezi.
19Kuilumba mbalamwezi mbuli ya vipindi,zuwa dojuwa saa ya kwingila.20Gweye kogala ziza na yokuwa ikilo,abaho kila mnyama wa kumuhulo kolawa kunze.21Wana simba ong'ula ozahila ndiya,ozahila ndiya yao kulawa kwa Mndewa Imulungu.22Zuwa dahalawa olawanya,na otambalala mmihango yao.23Munhu kolawa kochola kuisang'hano,na kosang'hana mbaka ichungulo.
24Gweye Mndewa Imulungu,lola vizili nyingi sang'hano zako,kwa ubala kuvitenda vose.Isi yose imema viumbe vako.25Bahali ya kuko ng'hulu na ina ugazi,mumo vili vitembelaga havidahika kupetwa,viumbe vili na ugima vidodo na vikulu.26Mumo zibita meli ng'hulu,mumo yokala somba mkulu yokemigwa Lewiasani,kumulumba yadambwae mumo.
27Awo wose okubeta gweye,uwagwelele ndiya yao mkipindi chao.28Wahawagwelela, hewo okidondola,wahaugolosa mkono wako,hewo oshiba ganogile.29Wahakifisa kihanga chako,hewo ogwaya,wahaisegesa mhumuzi yao odanganika,na odibwelela timbwisi jao.30Wahagala loho yako olumbigwa,na gweye kokibweza kabili kihanga cha isi.
31Ukulu wa Mndewa Imulungu osigala milele.Mndewa Imulungu yaideng'helele sang'hano yake.32Heyo koilola isi, nayo yogwaya,kovikwasa vigongo, navo volava yosi.
33Nomwimbila Mndewa Imulungu ugima wangu wose,nomtambikila Imulungu wangu vivino vinili mgima.34Go Mndewa Imulungu, unogezwe na kugesa kwangu,kwavija niye nodeng'helela kukujuwa gweye.35Wanhu wene nzambi wasegeswe mwiisi,wanhu otenda gehile sikuwoneke kabili.Gweye moyo wangu mtogole Mndewa Imulungu.Mtogoleni Mndewa Imulungu.
expand_more
Search