Temaiwawemete8hch_wb2

Kemɨti'inie mɨtimaiwenikɨ mɨ'ayumieme

1Mɨtimaiwenikɨ mɨ'ayumieme 'uka hepaɨ kani'inieka.Mɨtiuyemaikakɨ mɨ'ayumieme waɨkawa kanahiwani.2Mɨtimaiwenikɨ mɨ'ayumieme wapaitɨ kanakekani,meta huye 'utɨa kaniutakekani teɨteri wahamatɨa tikuxatatɨ, meta huye manuyunanaketsie.3Kiekari kitenieyaritsie 'utakekatɨ,karima kanahiwani mɨpaɨ 'utaitɨ:4«Xeme teɨteri, nekatinixekɨhɨaweni,nekanixehahɨaweni xeyunaime teɨteri.5Xeme 'atsixemɨkatemate, xetemaiwawetɨ xekenayuyeitɨa.Xeme xemɨkayuwaɨriya xemɨteyɨ'ɨkitɨakakɨ, xeheitimaitɨkɨkatɨ xekenakɨni.6Xekeneneu'eni, waɨkawa tita mɨreuyewetse nepɨtitaxata,nepɨtitaxata kemɨtiheitserie.7Ne netetakɨ tita mɨtiyuri xeikɨa nepɨtikuxata,yaxeikɨa neteni 'itarika kanixani'erieka.8Niuki neteta mayeneika naitɨ 'aixɨa pɨ'anene,nitixaɨtɨ 'axamɨti'ane pɨkatinɨ'ɨ ninanaimarika.9Kanihekɨaka neniuki memɨtemaiwawe wahetsiemieme,meta kaniyuritɨni memɨtemate wahepaɨtsita.10Ne'ɨkitsika pɨta xekeneutanaki'eri pɨrata pɨkatixaɨ,kenemɨtimaiwe xekeneutanaki'eri pɨkatixaɨ huru.11Mɨtimaiwenikɨ mɨ'ayumieme matsi waɨkawa katinaye'aka keyuri tetexi witsimɨ'anene,tsepa tita witsimɨti'ane hepaɨna pɨka'ane.
12»Ne, mɨtimaiwenikɨ, nemɨ'ayumieme mɨtiuyematekɨ hamatɨa nekaniuyeikani,kepauka yɨkɨnemɨtiyurieni nekanine'iyaritɨaka meri.13Kemɨ'ane Yawé mayemakaxe, mɨkɨ 'axamɨti'ane pɨtixani'erie,ne muyuta'ɨrenikɨ nekani'uxieka meta nanaimarika,'aixɨa 'anemekɨ mɨka'uyeika meta niuki 'axamanɨyɨtɨka.14'Ɨkitɨarika nehetsie kanayeneikani meta tita mɨtiheitserie,nehetsie kanayeneikani petimaiwetɨ pemayanikɨ meta pemɨtɨrɨkaɨyenikɨ.15Newaparewiekaku te'aitamete mekateni'aitanimeta kuwexinaruritsixi 'aitsika 'aixɨa 'aneneme mekanitiwewiwani.16Te'aitamete mexɨakate nekɨmana mepɨteha'aitameta 'itsɨkate naitsarie kwiepa nepuwaranuka'uitɨwa.17Kemɨ'ane memɨnetsinaki'erie, neta nekaniwanaki'erieka,kemɨ'ane memɨnetsikuwautɨwe, ne nematsiɨkɨme nepaneyeitɨwa.18Nehetsɨa waɨkawa mɨrexeiyanikɨ kanixuaweni meta 'aixɨa pemɨramamatiwanikɨ,waɨkawa pepɨtiukaxexeiyani meta 'atiteriwemekɨ pepɨrexeiyani.19Pemɨtimaiwenikɨ mɨ'ayumieme yanematipitɨakaku matsi 'ikwaxi 'aixɨa mɨ'ane kanihɨkɨtɨni keyuri huru,ne'iwarika matsi 'aixɨa pɨ'ane keyuri pɨrata.20Tita mɨtiheitserie hetsie nekaniumieni,'aixɨa mɨti'ane hetsie nekananiukani,21waɨkawa nepɨtiyetuirie kemɨ'ane mɨnetsinaki'erie,meta waɨkawa mɨrexeiyanikɨ.
22»Yawé pɨnetsi'utawewi mexɨakame wewiyaya nemayanikɨ,matsi meripaitɨ timieme 'akuxi hipame katitiwewiwetɨ.23Ne matsi yemekɨ meripaitɨ nekaniunetɨarieni,meripaitɨ kwie 'akuxi kanetɨariewekaku.24Kepauka nemunetɨarietsie haramara mumariwe pumawekai,meta 'ana haixa pumawekai waɨkawa 'uhanetɨ.25Nekaniutinuiwa meripaitɨ 'akuxi yemurite kanetɨariewekaku,meta hɨri tsutɨmeyari 'umawekaku,26meripaitɨ mɨkɨ kwie kanetɨariewekaku meta mana witsikemutiu'anemetatsiere 'akuxi kwie tumuanariyari mexɨakame kanetɨariewekaku.27Ne nepunierixɨ kepauka Kakaɨyari muyuawi 'amuyematsie,meta haramara heima ketewa 'atɨ muyuxeiyanɨa muka'inɨaritaxɨtsie,ne 'ana nepɨtanierekai.28Kepauka muyuawitsie haiwitɨri muyeye,meta haixate tɨrɨkawime metinetɨaxɨa haramara 'ameukatewatsie,29kepauka haramara mupitɨa hakewa meye'atɨkani,meta 'aitsikaya meu'eniekakɨ,kepauka kwie tsutɨmeyari mukayatsaxɨtsie,30ne 'ana nepɨnierekai, 'uximayatsikaya 'aixɨa nepɨyuriekai.Tukari mɨyehane ne waɨkawa nepɨnetemawiekai,temawierika nepexeiyakai hɨxiena ne'uyeikatɨ,31kwie mɨkɨ mutawewikɨ nepɨnetemawiekai,meta teɨteri memunetɨariekɨ nepɨnetemawiekai.
32»Hikɨ 'ayumieme, temari 'aku, xekeneneu'eni:'aixɨa mepɨ'itɨarieni kemɨ'ane nehuye 'utɨa memuhuni.33Ne'ɨxatsi xekeneu'eni meta xeketenemaiwaweni,hawaikɨ xepɨka'itawe'erieka temaiwawemete wa'ɨkitsika.34'Aixɨa mepɨ'itɨarieni kemɨ'ane memɨnetsi'enie,kemɨ'ane nekitenie memutatei tukarikɨ meta'enanatɨ,mɨranutakɨkatɨretsie meta'ikwewatɨ.35Yuri nekanaineni, kemɨ'ane mɨnetsikaxeiya, tukari kanikaxeiyamɨkɨ,metatsiere Yawé 'aixɨa kaniyurimɨkɨ.36Kemɨ'ane mɨkanetsitanaki'erieni, mɨkɨ yɨkɨmana kaniyutsewiximamɨkɨ,kemɨ'ane mɨnetsitixani'erieni, mɨkɨ mɨɨya pɨta kaninaki'erieka».
expand_more
Search