Temaiwawemete4hch_wb2

Mɨtimaiwenikɨ mɨ'ayumieme matsi 'aixɨa kani'aneni

1Temari nemɨxenaki'erie, xekeneneu'eni rapaapa kemɨtiyu'ɨxatsitɨwa hepaɨ,xekeneyuwaɨriyani waɨkawa xemɨtemaikakɨ.2Ne nepɨxeyetuirieni 'ɨxatsi 'aixɨa manɨyɨtɨka,'ayumieme ne'ɨkitɨarika xepɨkahatɨtɨmaiyani.3Kepauka ne nemununutsitɨkaitsie nepaapa hetsɨa nepukatei,meta nemaama nemuyuxewini hepaɨ pɨnetinaki'eriekai,4nepaapa 'ipaɨ pɨnetiu'ɨxatsitɨa:«'A'iyarikɨ keneu'eni 'ikɨ 'ɨxatsitɨarika,yaketinekamieni ne'aitsikatsie, 'ana mɨixa wiyari pepuyeikani.5Mɨtimaiwenikɨ mɨ'ayumieme kenekuwawa meta waɨkawa perakumaitɨ pemayanikɨ,neniuki pepɨkahatɨtɨmaiyani, meta 'aheyemekɨ kena'eriwani.6Mɨtimaiwenikɨ mɨ'ayumieme hatsuaku pepɨka'uku'e'eiriwani.Mɨkɨ pɨmatsi 'awietani,kenenaki'erieka mɨkɨta pɨmatsi'ɨwiyani.7Mɨtimaiwenikɨ mɨ'ayumieme yemekɨ peuyewetse pemɨtimaiwenikɨ 'ahetsie kenexeiyani.'Ekɨ pemeitimaitɨyeikanikɨ kenekuwaɨneni keyuri piinitɨarika.8Mɨtimaiwenikɨ mɨ'ayumieme waɨkawa keneku'eriwani, mɨkɨ matsi 'aixɨa perahɨawarɨwame kamenayeitɨamɨkɨ,kene'awaɨriyani pemɨtimaiwenikɨ 'aixɨa pekatinitamatiwamɨkɨ,9'amu'utsie witsimɨ'ane pehanakekame pumatsi'ayeitɨani,kuruna witsi'aneme kameniyetuiriemɨkɨ».
10Temaikɨ 'aku, keneu'eni neniuki,hikɨ 'ana mɨixa wiyari 'apepuyeikani.11Ne nepɨmati'ɨkitɨa petimaiwetɨ 'apemuyeikanikɨ,nepɨmetsi'uwitɨxime huye mɨheitserie pemuweiyanikɨ.12Kepauka mɨkɨ 'utɨa pemumienitsie, hawaikɨ pepɨkahekaweni,tsepa pemunautsarɨme, pepɨkahetiketamɨre.13Kenemɨmati'ɨkitɨa yuheyemekɨ kena'eriwani,'aixɨa ketine'ɨwiyani ne'ɨkitsika mɨkɨ pɨ'atukari.14'Axamemɨteyurie wahuye pepɨka'anukuweweiyani,'axamemɨteyurie wahuyeta pepɨka'umieni.15Mɨkɨ wahuye hepaɨtsita kene'a'ɨwiyani. Mɨkɨ 'utɨa pepɨka'umieni.Mana pepɨka'uyeikani, keneuku'eiri.16'Axateyuruwamete mepɨka'ukakukutsu xɨka 'akuxi 'axakatiyuriweni,mepukakukutsu kepaukake xeime memɨka'una.17'Axamɨti'ane kaniwa'ikwaitɨni,meta nanaimarika kaniwawinutɨni.
18Heitseriemekɨ yamemɨtekahu wahuye witsipɨ'ane,kepauka tau 'ɨrɨya ximeri manatinexɨaxime hepaɨ:hekɨariya waɨkawa mɨhekɨariwiexime hepaɨkepaukake hekɨariya 'aixɨa tixawatɨtɨ mayani.19Peru 'axateyuruwamete wahuye mɨpaɨ pɨka'ane,yɨriya kwinimieme mɨtiyɨwi hepaɨ pɨ'ane,'atsimepɨkatemate ketitatsie memɨtehekaxɨrɨwe.
20Temaikɨ 'aku, neniuki keneu'eni,'a'iyarikɨ keneu'ena.21Hawaikɨ neniuki pepɨkaheuyehɨpani,'a'iyaritsie yemekɨ keneye'ɨnani.22Mɨkɨ kemɨ'ane memikaxexeiya tukari kaniwapitɨaka,'Aixɨa pemɨreu'eriekakɨ 'awaiyaritsie meta 'a'iyaritsie kani'ayumiemetɨni.23Matsi 'a'iyari kene'ɨwiyani tinaime piinitɨarika hepaɨtsita,mɨkɨ hetsie tukari mayeneikakɨ.24'Atetakɨ keneyu'ɨwiyani 'axapemɨkatikuxatanikɨ,kemɨkatiheitserie petikuxatatɨ ketineuhayewa.25Heitseriemekɨ pɨta keneutaniereni,tita pemɨtixeiya mɨkɨkɨ kene'a'ɨwiyani.26'Ahuye kene'ɨwiyani kepemɨtimie,keneheitseritɨaka naime 'ahuye.27Heitserie keneumieni 'a'utata pepɨkaheukuyuyuipikeni meta 'atserieta.'Axamɨti'ane ketineuku'eiri.
expand_more
Search