Read YAASINƆ 31

YAASINƆ31bus_sim

Kí Lemuɛli yã

¹Kí Lemuɛli da lɛ́ dàa à bè:²Diamɛ, ma nɛ́? Bↄ́mɛɛ, ma nɛ́'ina?À kɛ̀ diamɛ, nɛ́ kɛ̀ ma à lɛ́ gbɛ̃̀ Ludanɛ?³Ǹton n wó dɛ nↄgbɛ̃nↄ kiiaro,ǹton zɛ́ kɛ̀ è kínanↄ yaka sɛ́ro.

⁴Lemuɛli, geepiwɛ̃ɛ dɛ kínanↄ pↄ́mina ũro,í gbãaa dɛ kpatablerinↄ pↄ́mina ũro,⁵lɛ aↄ̃ton mi, dokayãnↄ sãńgu,aↄ̃ yã gↄ̃gↄ̃ takaasideenↄnɛ faa sairo yãnzi.⁶À í gbãa kpá gbɛ̃ kɛ̀ aↄ̃ↄe mↄↄ gaanↄa,à geepiwɛ̃ kpá pↄsiadeenↄa⁷aↄ̃ mi, aↄ̃ takaasi sãńgu,aↄ̃ yã'ↄ̃amma tóngↄ̃ dↄńgu dↄro.⁸Ǹ yã o gbɛ̃ kɛ̀ aↄ̃é fↄ̃ wà yã oroonↄ gɛ̃ɛ ũ,ǹ yã sí gbɛ̃ kɛ̀ aↄ̃ↄ dↄnlɛri vĩroonↄnɛ.⁹Ǹtongↄ̃ yĩtɛnaro, ǹ yãkpaɛ kɛ a zɛ́a.Ǹ takaasideenↄ kↄ̃n wɛ̃ndadeenↄ yã nnaa kpáḿma.

Nↄ làakaridee

¹⁰Dé bé eé nↄ làakaridee ee?À bɛ̀ɛ vĩ dɛ gbɛ̀ bainↄla zã̀.¹¹À zã ègↄ̃ à náanɛ kɛɛ kↄ̃n nↄ̀sɛo domɛ,pↄ́ maa ke è kɛ̃sãaro.¹²À maaan ègↄ̃ kɛɛ a zãnɛ,èe kɛ à zaaanlo ai a wɛ̃̀ndi lɛ́n.¹³È sãkã kↄ̃n gbↄ̃̀bào wɛtɛà a ↄzĩi kɛ kↄ̃n pↄnnaao.¹⁴È gá blɛ sɛ́ zã̀lán góro'itɛ latari bà.¹⁵È fɛɛ gukɛ̃kↄ̃anao à pↄ́blee kɛ a uadeenↄnɛ,è zĩi kpaatɛtɛ a nↄkparɛnↄnɛ.¹⁶È tↄↄtɛ maaa wɛtɛ à lú,è geepi línↄ pɛ́pɛn kↄ̃n a zĩnda bↄ̀gↄ ↄↄo.¹⁷È gbãaa dↄ a pii asaa ũà gã̀sãwa bↄbↄ a zĩia.¹⁸Ègↄ̃ dↄ̃ kɛ̀ é yàra e,à fitia tɛ́ ègↄ̃ nana gwãavĩmɛ.¹⁹À ↄↄ ègↄ̃ porona àgↄ̃ buutãbↄ kũna,ègↄ̃ kɛkɛ ↄ̃ wã a ↄnɛo.²⁰È ↄ poro wɛ̃ndadeenↄnɛ,è ↄ liga takaasideenↄzi.²¹È ĩampuu gurↄↄ vĩa kɛ a bɛdeenↄ yã musuro,zaakɛ à uadeenↄ è uta didi kↄ̃amɛ.²²È daɛbↄ bisanↄ tã a zĩnda,à pↄ́kãsãanↄ nɛ́ táaru bisa kↄ̃n bisa gaarura'ideenↄmɛ.²³À zã è tↄ́ bↄ fàadibokiia,ègↄ̃ vɛ̃ɛna gu dↄ̃nkↄ̃ kↄ̃n bùsu gbɛ̃nsinↄ.²⁴Nↄgbɛ̃ pì è pↄ́dangãn kɛ àgↄ̃ yaa,è gère tã à kpá a latarinↄa.²⁵Ègↄ̃ gbãa kↄ̃n gakuio dana pↄ́kãsãa ũ,à kuuna zia yã è swɛ̃̀ kɛ̃nlo.²⁶Ɔ̃ndↄ̃yã ègↄ̃ daa à lɛ́n,è yã dańnɛ kↄ̃n yenzio.²⁷À wɛ́ɛ ègↄ̃ tɛ́ a ua yãkɛnazi,è mɛa pↄ́ blero.²⁸À nɛ́nↄ è fɛɛ wà sa maaa onɛ,à zã è à sáabu kpá à be:²⁹Nↄgbɛ̃ paridee aĩa vĩ fá,mↄde ḿbe ń dɛńla ń píngi.³⁰Kakana maaa ègↄ̃ náanɛ vĩro,nↄmaakɛɛ è gɛ̃ zɛ́lamɛ,nↄgbɛ̃ kɛ̀ Dii vĩa vĩin wè sáabu kpá.³¹Ǹ zĩi kɛ̀ à kɛ̀ àre kpáa,ǹ à tↄ́ kpá à yãkɛna musu gãalɛ.

YAASINƆ 31 / bus_sim

Kí Lemuɛli yã

Nↄ làakaridee

YAASINƆ31bus_sim