Temaiwawemete25hch_wb2
1'Ikɨta hipatɨ tawari temaiwawemete kememɨte'ɨ'ɨxatsita kanihɨkɨtɨni Tsarumuni meka'utɨa, 'Etsekiyaxi Kura kwieyaritsie ti'aitame, te'utɨwametemama kememɨteheka'ɨkixɨ.2Kakaɨyari 'aixɨa kerahɨawarɨwani tixaɨtɨ mɨti'awietakɨ,matsi witsimepɨ'itɨarie te'aitamete kepauka memikaxexeiya.3Te'aitamete kememɨteku'eriwa yu'iyaritsie 'atsitepɨkatemate,yaxeikɨa tepɨkatemate muyuawi kemeutitewa meta kwieta kemeukatewa.4'Axamɨ'ane pɨrata hetsie keneuka'iti,mɨkɨtsie payeneni tepɨakɨ tiwewiwame mɨtitiwewienikɨ.5'Axamɨtiyuriene ti'aitame hetsɨa keneupata,'ana ti'aitame yu'uweni heitseriemekɨ mɨti'aitanikɨ payeitɨani.6Ti'aitame hɨxie mariweme pepɨka'ayuyeitɨwani,meta kwinimieme pepɨka'utaineni 'ahetsiemieme.7Matsi pɨta 'aixɨa pɨyɨni ti'aitame xɨka mɨpaɨ metiutahɨawe: «'Ena 'ahurawa kenatiye'a»,teɨteri memumariwawe wahɨxie pepɨka'atewiyatsitɨaka.Tita pemɨtiuxei 'ahɨxitekɨ,8yapauka pepɨkatihekɨatani mɨrewatixanetsiwatsie,nɨka 'ahepaɨ tewi,yɨkɨ 'utayɨme metsi'utewiyatsitɨani.9'Ahepaɨ tewi hepaɨtsita 'aixɨa keneu'ayuri ke'axapemutayɨkɨ,meta xeime 'awie mɨpaɨ pepɨkarahɨaweni mɨkɨ 'axakemɨtiuyurikɨ.10Kapa xewitɨ metsi'u'enieme metsi'utewiyatsitɨani,'anari 'aixɨa pepɨkarahɨawarɨwani.11Huru manitsana pɨrata tsikɨiwitiyaritsie mɨyetei hepaɨ kani'aneni,niuki witsimɨ'ane mɨpaɨ kani'aneni xɨka 'aixɨa tiuxatsieni.12Hanira meta kuka tɨwame hurukɨ muwewiya hepaɨ kani'aneni,timaiweme matsi'utatieyu xɨka yemekɨ pe'i'enieni.13Nɨ'ariekame mɨraye'atɨwa 'aixɨa 'anemekɨ kaniwaxeripitɨaka 'ɨwi hepaɨ kepauka muxɨkanitsie,yukutsiyari puwaɨririe muyuwaɨriyanikɨ.14Haiwitɨri meta 'eka wiyeri mɨkakaxɨrɨwa hepaɨ,mɨpaɨ tewi kani'aneni kwinimime mutaine yakatikamietɨ.15'A'inɨkai pe'ikɨhɨawetɨ kemɨ'ane kwiepa mɨti'aita kemɨtiku'eriwa pepipata,meta petiu'akanaki'erietɨ petikuxatɨtɨ waɨkawa katinikemaka.16Xɨka xiete pe'ukaxeiya, kwinimieme pepɨkatikukwa'ani,nɨkahɨrixɨa waɨkawa pehenu'ieyu pe'utihayani.17'Ahepaɨ tewi kie yapepɨkatiyaneni,kapa 'utiwaɨripieme metsi'utixani'erieni.18Kemɨ'ane 'itsɨkame hɨxie mɨtikuxata ti'itawatɨ yuhepaɨ tewi hepaɨtsita,mɨkɨ 'ixipara meta titsuname meta 'ɨrɨ manuyemɨtsɨ hepaɨ kani'aneni.19Kepauka pemɨ'uximatɨariekatsie xɨka yuri peti'erieka tewi tiyukwamaname hetsie,tamé kɨmietɨ kemɨtiyukukuine meta ra'ɨka 'anumuritɨ mɨpaɨ pepɨti'amaika.20Xɨka muyuhiwerie hetsiemieme 'utakwika,winu matsina haiyatsie meuwirieni hepaɨ kani'aneni,yatɨni mawetɨ muyeikani hepaɨ kani'aneni kepauka muhaɨtɨnitsie.21Mumatsi'aye'unie xɨka yehaakamɨneni ketineumikwa,meta xɨka heuharimɨkɨni keneuharitɨa.22Mɨpaɨ petiyurienetɨ pekanitewiyatsitɨamɨkɨ ke'axamɨtiuyuri hepaɨtsita,'ana Yawé kametiniyetuiriemɨkɨ 'a'iwarika.23Tayetatsie 'eka mayeneika wiyeri kani'atɨwani,yutenikɨ 'axamemutiyuane teɨteri xeikɨa mekaniwahaxɨatɨaka.24Matsi 'aixɨa kani'aneni 'etsi'uyeukaku pemayekani,keyuri kii 'apameta 'uka mayu'eriya hamatɨa.25Haa haɨtɨme yɨkɨipitsie 'anatiwakitɨ manuhareni hepaɨ,kani'aneni niuki 'aixɨa manuyɨne 'ateewa paitɨ mieme.26Haixa muwaikarie meta haa putsuta mieme mu'uayemarie,hepaɨ kaniyɨmɨkɨ tewi heitseriemekɨ 'amuyeika kepauka 'axamɨtiuka'iyari mitaweranariyatsie.27Pɨkayɨwe waɨkawa xiete mɨkwaka,meta 'aixɨa pɨka'ane 'aixɨa pemɨrahɨawarɨwanikɨ pemɨtikuwaɨneni.28Kiekari muka'unarie kakurarutɨiyarietɨ,tewi yu'iyaritsie mɨpaɨ kani'aneni yukɨmana mɨkatiyu'aitɨawekɨ.