Read Temaiwawemete 24

Temaiwawemete24hch_wb2

Tamamata heimana 'atanauka

¹'Axateyuruwamete kememɨteyurie meta tita memɨtehexeiya pepɨkatihiwe'erieka,meta pemuwanɨkakɨ pepɨkakuwauneni,²mɨkɨ meteyukananaimatɨ xeikɨa mekaniu'uwani,meta hipame 'uximatɨarika memuwapitɨanikɨ xeikɨa mekatenikuxatani.

Xeitewiyari

³Waɨkawa rakumaitɨ pɨyɨwe kii mutsutɨani,kepemɨtiuyematekɨ kii tenarieya peputsutɨani.⁴'Aixɨa perakumaitɨ 'akiita pepɨtitahɨniya,witsimɨti'anenekɨ meta waɨkawa mɨraye'atɨkakɨ.

Xeitewiyari heimana xewi

⁵Tewi mɨtimaiwe waɨkawa kanitɨrɨkaɨyeni,meta kemɨ'ane meu'ena matsi waɨkawa tɨrɨkaɨyetɨ payeixime.⁶Kepauka pemɨ'atamieni kaneuyeweka pemɨ'atimaixɨanikɨ,meta pemɨra'a'iwanikɨ yumɨireme wa'ɨxatsi keneu'eni.

Xeitewiyari heimana huta

⁷Xewitɨ tewi 'axamutiyuriene yutemawietɨ hatsuaku timaiwetɨ pɨka'ayani,meta teɨteri wahɨxie 'aixɨa mɨtayɨni pɨkayɨwe.

Xeitewiyari heimana haika

⁸Kemɨ'ane 'axatiyurimɨtɨ muyuha'aritɨa,mɨkɨ 'axatiyuruwame katiniterɨwariemɨkɨ.⁹'Axamɨtiyuriene yutemawietɨ kemɨtiku'eriwa 'axamɨti'ane kanihɨkɨtɨni,teɨteri memɨteyukatawe'erie mekaniwaxani'erieka.

Xeitewiyari heimana nauka

¹⁰Kepauka pemu'uximatɨarietsie pemɨkayuwaɨriya,'ekɨ pepumatsiɨkɨ pemɨkatɨrɨkaɨyekɨ.

Xeitewiyari heimana 'auxɨwi

¹¹Keniwarutawikweitsitɨa kemɨ'ane memɨkwini yuheyemekɨ,keniwarukunuitɨa kemɨ'ane memɨte'uka'eniwa mekwiximetɨ.¹²Tsepa mɨpaɨ pemutaine, «Ne 'atsinepɨkatimaikai»,Kakaɨyari hɨrixɨa pɨtimaikai 'a'iyari kemɨtiyukɨhɨawekai.Meta 'atukari mɨ'ɨwiya yapɨtimate,mɨkɨ tewi 'akatinapiniyariemɨkɨ kemɨtiu'uximayataxɨ.

Xeitewiyari heimana 'ataxewi

¹³Xiete kenanu'i, 'ekɨ temaikɨ nemɨmatsinaki'erie, mɨkɨ 'aixɨa kana'aneni,yemekɨ witsikatinakakani 'anenitsie xietexi waxieteyari.¹⁴Mɨpaɨta katinakakani xɨka waɨkawa petimaiweni 'a'iyaritsie,heitseriemekɨ xɨka yapetikamieni Kakaɨyari pɨmatsiparewieka,tita pemɨtitakwewie mɨkɨ hatsuaku pɨkaka'unarieni.

Xeitewiyari heimana 'atahuta

¹⁵Heitseriemekɨ yamɨtikamie kie pepɨkahupaneni 'axatiyuruwame hepaɨ,meta kiitana pepɨkatinanaimaka.¹⁶Tewi heitseriemekɨ yamɨtikamie tsepa 'atahutamexɨa mekawe,mɨkɨ kananukukemɨkɨ,matsi 'axateyuruwamete mekanekaxɨrɨweni,matsi hatsuaku tawari mepɨka'anuku'uni.

Xeitewiyari heimana 'atahaika

¹⁷Kemɨ'ane metsi'aye'unie kepauka mekawenitsie pepɨka'atemawieka,meta pepɨka'atemawieka 'a'iyaritsie mɨkɨ mɨtiuka'eniwakɨ.¹⁸Yawé mɨkɨ pɨka'inakire 'ekɨ kepemɨtiku'eriwa,hikɨ mɨkɨ hepaɨtsita Yawé kemɨtiha'akai pɨtihayewa.

Xeitewiyari heimana 'atanauka

¹⁹'Axateyuruwamete wahepaɨtsita pepɨka'uyeha'arɨweni,meta pepɨka'awaɨriyani pemuwa'ɨkenikɨ yamemɨkatekahu,²⁰matsi 'axatiyuruwame tixaɨtɨ pɨkatitakwewie,kemɨ'ane yamɨkatikamie kɨxemeya kanitɨmɨkɨ.

Xeitewiyari heimana tamamata

²¹Temaikɨ, Yawé kenayemakaxeni meta yaketinekamieni ti'aitame hetsiemieme,Yawé memu'uxie wahamatɨa pepɨka'axewiriyani,²²yapauka xekatenika'eniexɨakuni,'atsipɨkatimatsiɨkɨ tita 'umuramie.²³'Ikɨ kanihɨkɨtɨnita tawarita kememutiyua temaiwawemete:'Aixɨa pɨka'ane hipame xeikɨa waparewietɨ kepauka 'iwaurika muwewienitsie.

²⁴'Axamɨtiuyuri xɨka hetsiena karahɨiyani kename 'atsikatiuyuri,'ana yunaitɨ nuiwarite hetsienamieme 'axameputiyuaneni mɨkɨ 'itsɨkame hepaɨtsita meta mekaniti'uxiwe'erikuni.²⁵Kemɨ'ane heitseriemekɨ mɨti'aita mɨkɨ 'aixɨa pɨtixeiyarieni,'axatiyuruwame hetsie mɨrahɨakɨ 'ayumieme pɨnaki'eriwa.

²⁶Kemɨ'ane 'aixɨa mɨtikuxata yuri mutaine,mɨkɨ witsikani'aneni 'itsiya hepaɨ.

²⁷'Awaxa meri keneukuha'arita,meta 'aixɨa ketinakuyuri pemaku'etsatsie,mɨpaɨ meri petiyurieme 'arikeketa 'akii pepɨtawewieni.²⁸Peti'itawatɨ 'ahepaɨ tewi hepaɨtsita pepɨkatikuxatani 'itsɨkame hɨxie,pepɨkatiku'itawani 'atenikɨ.²⁹Mɨpaɨ pepɨkahaineni: «Kemɨnetsi'uyuri mɨkɨ,neta yaxeikɨa nekatinekapitɨamɨkɨ».

³⁰Mɨyu'ɨraxie mati'etsatsie nekaniuyeyani,meta 'atsimɨkatimate kaxie ma'iteɨritsie 'aurie nekaniuyeyani.³¹Xuya xeikɨa naitsarie kananaye'ukaitɨni,meta tupiriya 'etsiya xeikɨa kananukanakaitɨni,tetexi kuraruyari petaxɨriyatɨkatei xeikɨa.³²Kenemɨrenierixɨ ne'iyaritsie nepika'ɨnaxɨ,netixeiyatɨ mɨpaɨ nepɨretima:³³'etsiwa peheukukutsɨtɨ,meta 'etsiwa pe'uka'uxipiwetɨ, meta 'atapa pe'awietɨ,³⁴tixaɨtɨ pekarexeiyatɨ pepayani tiyumemiwame 'ahetsɨa munuani hepaɨ pɨtiyɨni,meta pereuyehɨatɨ tinawayame 'ixipara 'akwetɨ 'ahetsɨa munuani hepaɨ pumatiyurieni.

Temaiwawemete 24 / hch_wb2