Read MAPINDA 22

MAPINDA22tap_twf

¹Kyawama kuba ni bulumba kukila kuba ni bunonsi bwingi.Ni kwitabilua kuweme kukila kuba ni mutofue pamo ni oro.

²Kintu kimo kili na munonsi ni mupabi ni keki:Yawe i Kabumba wabo.

³Mukengezi aliwamona bubi ni kufyama,inzi babipuba balibaya sie ku ntanzi mpaka baikisia.

⁴Kunakila ni kumutiina Yawekulikwaleeta bunonsi, ni mukinzi pamo ni bukose.

⁵Myunga ni tukose, bili mu nzila ya bafinine mitima,inzi olia asungile mutima wakue, alikuba wali kule nabio.

⁶Sambilizia mwana nzila i apalile kukonka,pantu anzia akakota takafumamo.

⁷Mupabi, aliwateekua na munonsi,ni mukopi, mubombi wa olia aliwakopia.

⁸Olia aliwabyala bubi, aliwazombola bwavia,ni nfimbo yakue ya kukandilanako ilikutyoka.

⁹Muntu wa buntu, aliwapaalua,pantu aliwakasania bapabi bilio byakue.

¹⁰Kumba wa kapuni ni mazibo alikupua.Ee, mazibo ni matuka, bilikupua.

¹¹Olia atonene buswesi bwa mutima ni aliwalanda bulanzi buweme,likolo alikuba kibuza wakue.

¹²Menso akua Yawe alialabukila maano,inzi aliwalovia twebo twa mupoti.

¹³Munanghani aliwalanda nangue, “Panze pali ni nkalamu!Ndikwipailua mu kisaakaanino kya bantu.”

¹⁴Kanua ka mwanakazi mukambue, kiina kizikile.Olia asuulilue na Yawe, aliwaponenamo.

¹⁵Bupuba bukakiliilue mu mutima wa mwana,inzi nfimbo ya kumukanda iliyabukumbila kule.

¹⁶Olia aliwabiibikizia mupabi pakuti avuzie bunonsi bwakue,ni aliwapeela munonsi byabupe, bonse babili balibapeleela ku bupabi.

Bulanzi 30 bwa mulangue

¹⁷Twilizia unvue bulanzi bwa balia bali ni mulangue,ni kupooza maano ku bindimukusambilizia.¹⁸Pantu kuti kyawama kine wasunga masambilizio mukati mobe,ni ku-apitulukamo kubalua musita.¹⁹Evi maswapi obe aye ali muli Yawe.Ni wewe wenka, nakusambilizia lelo.²⁰Eba, nsikulembeele bulanzi 30,bulanzi bwa nsokezi ni bwa maano,²¹Evi bukusambilizie kuba wa kiine ni wa kulanda kisinka,pakuti ubwezie mpunda ya kiine ku balia bakutumine?

Bulanzi bwa mambo

²²Tekupompola mupabi bunonsi bwakue pantu ye ni mupabi,Ni mu kilie tekubiibikizia nsambu muntu abulilue.²³Pantu Yawe aliwabalandila,ni kubiibikizia bwikazi bwa balia balibababiibikizia.

Bulanzi bwa bubili

²⁴Tekukita bukibuza na olia ali ni kipuki kikata,ao kwenda pamo ni muntu asiliwakokola kufiitua.²⁵Ukeeza kusambilila mibeele yakue,ni kulengia kukwatua we mwine mu muteo.

Bulanzi bwa butatu

²⁶Tekuti ube umo wa pa balia balibalaya,ao kwitabila kulipa mizia nghwana.²⁷Kine teuli na kinge kya kumulipa,wene kuti watwaminamo bulita bobe.

Bulanzi bwa buna

²⁸Tekutelulula kalangi ka mipaka ya kale,mipaka yaabiikilue na babikolue bobe.

Bulanzi bwa busaano

²⁹Kubako umwene muntu amanine bwino mwilo wakue?Alikubomba ntanzi ya makolo.Takaba kubombela babiloolo basipalile.