Read Nongezi 22

Nongezi22kdc_pbt

¹Vinoga kuwa na sifa inogile kubanza ugoli,unogelwa unoga kubanza shaba na zahabu.

²Mgoli na mkiwa wose kinhu kimoja,wose wabili Mndewa Imulungu ayo yawalumbile.

³Munhu mbala yahagona gehile koifisa,lakini mizozolo olawa kunze wakalumile.

⁴Wahamdumba Mndewa Imulungu na kuwa muhole,kopata nhunza na kutogoligwa na ugima.

⁵Nzila ya wanhu wehile imema miba na mitego,heyo yoika goya loho yake kokuwa kutali nayo.

⁶Mfunze mwanago viilondeka kukala goya,na heyo honda yaisemwe nzila ayo muuvele.

⁷Tajili komtawala mkiwa,munhu yokopa, mtumwa wa munhu yokopesha.

⁸Yonogelwa na gehile kosenga magazo,na udahi wake wa kusang'hana gehile omala.

⁹Munhu yeli na moyo wa kulava komweda,kwavija kowagwaa wakiwa ndiya yake.

¹⁰Muwinge munhu yeli na bezi na ndwagi yosegela,ugomvi na maligo vokuwa habule.

¹¹Yonogela moyo unogile na mbuli zake zogala ganogile,kokuwa mbwiga wa mndewa.

¹²Mndewa Imulungu kokaliza kutanga vinhu,lakini kozigwisa mbuli za wanhu wavizi.

¹³Munhu mnyeke kolonga,“Sidaha kulawa kunze,kuna simba ako konikoma.”

¹⁴Mulomo wa mgoni kolongo tali,yokwihiligwa na Mndewa Imulungu kotumbukila mumo.

¹⁵Mwana konogelwa na mbuli za kibozi muumoyo wake,lakini wahamzuma kwa mbalati komsegesela gago.

¹⁶Yowadununza wakiwa ili yongeze ugoli wake,na yowagwaa nhunza wagoli, wose wabili ohelela muukiwa.

Mbuli za wanhu weli na ubala

¹⁷Tega gwiti uhulike mbuli za wanhu weli na ubala,vugula moyo wako utange vinhu vangu.¹⁸Vinoga kamba kogeka mgati ya moyo wako,na kugeka mmulomo wako.¹⁹Ili tamanilo jako diwe kwa Mndewa Imulungu,lelo nikufundiza gweye gano, ona gweye.²⁰Nikwandikila nongezi malongo madatu,ulonzi wa magesa ganogile na kutanga vinhu,²¹ili kukufunza mbuli za ukweli,umbwezele munhu yakutumile mbuli za ukweli.

Nongezi ya 1

²²Sikuumzulumu mkiwa kwavija heyo mkiwa,na sikuumwime haki munhu yelibule kinhu mkitala.²³Kwavija Mndewa Imulungu kowagombela,kowaboka ugima wao awo owadununza.

Nongezi ya 2

²⁴Sikuutende umbwiga na munhu yogundumuka himahima,na sikuuilumbe na munhu yogundumuka ng'hani,²⁵sambi uifunze nzila zake,na kuinamata mumtego.

Nongezi ya 3

²⁶Sikuuwe imoja wa kuika zamana,hebu kuika lahani kwa madeni ga wanhu,²⁷kamba kwabule kinhu cha kuliha,hata lusazi lwako luuwasila olusola.

Nongezi ya 4

²⁸Sikuusegese zimbaka za umwaka,zikigwe na iwahenga zako.

Nongezi ya 5

²⁹Tanhu mulole munhu mwene nzewele mzisang'hano zake.Ayo kowasang'hanila wandewa, hawasang'hanila wasumbwa.