Temaiwawemete21hch_wb2
1Ti'aitame 'iyarieya 'aki'utua haa muhane hepaɨ kani'aneni Yawé yatinɨ'akaku,'itanɨ'awakaku mɨkɨ hakewa meinake.2Yunaitɨ teɨteri 'aixɨa meteyuriekame mekaniyu'erieka,matsi Yawé pɨtatsixeiya ta'iyaritsie ketemɨteyuriku.3Kepauka teɨteri kemɨtiheitserie yamemɨteyurie,mɨkɨ Yawé pinake keyuri mawari.4Kemɨ'ane mɨtiyukatawe'erie yu'iyaritsie meta timaiweme muyu'erie,meta 'axateyuruwamete wahepaɨ xɨka tiyurieneni mɨkɨ 'axamɨti'ane pɨtihɨkɨ.5Kepauka 'aixɨa mɨtiuyu'iyaritɨani: 'aixɨa pɨtiyɨni,kepauka mexɨiwa mɨtiuyurieni: 'axapɨtiyɨni.6'Itarikakɨ xɨka tiukaxeiya waɨkawapɨtiparike yapauka haiwitɨri hepaɨ peru pɨmɨya winiyari hepaɨ.7Memɨteyukananaima yɨkɨmana mekaniyuka'unakuni,memɨkayuwaɨriyakɨ heitseriemekɨ yamemɨteyuriekakɨ.8Kepauka tewi 'aixɨa mɨkatiuyeika huyeya tunitɨ payani,matsi kemɨ'ane heitseriemekɨ 'amuyeika huyeya kanixeuraɨyeni.9Matsi 'aixɨa kati'ane 'etsi'uyeyeukaku mayekani,keyuri kii 'apameta 'uka mayu'eriya hamatɨa.10'Axatiyuruwame 'axamɨti'anetsie xeikɨa kaniyu'iyaritɨaka,hatsuaku 'aixɨa tiyurienetɨ pɨka'ayani yuhepaɨ tewi hetsiemieme.11Kepauka 'axamɨtiuka'iyari mɨtika'enitɨarieni,'ana mɨtiyukatawe'erie yapɨretimani,kepauka mɨtimaiwe mɨ'ɨxatsitɨarie,'ana mɨkatimaiwe yapɨretimani.12Heitseriemekɨ yamɨtikamie 'axatiyuruwame kiiya kanixeiyani,meta kemɨtika'unarieni kanixeiyani.13Kemɨ'ane tixaɨtɨ mɨkarexeiya mɨka'enieni ra'iwawakaku,mɨkɨtatsiere yaxeikɨa petatsuani 'anari xewitɨ pɨka'ita'eiya.14'Awie 'imikieri xɨka pe'utuituarieni haxɨa kaninɨtɨaweni,'ana kwitɨwa pekaninɨtɨarieka kepemɨtiha'akai.15Tewi heitseriemekɨ yamɨtikamie pinake muyutemawieka kepauka hipatɨ hepaɨna memɨteyurie,matsi 'axatiyuruwame kanimaka xeikɨa.16Kemɨ'ane mɨtihayewa 'aixɨa tiyurienetɨ yuhuyeta,mɨkɨ yapauka mɨkite watsata kaniyuhayewamɨkɨ.17Kemɨ'ane 'ixɨarari minake tixaɨtɨ karexeiyatɨ payani:winu xeikɨa mɨnaki'eriekɨ meta witsimɨtiu'ɨatɨka mɨkɨ hatsuaku waɨkawa rexeiyatɨ pɨkahayani.18'Axamɨtiyuriene 'aixɨa mɨtiyuriene hetsiemieme katinayukatuamɨkɨ,tiyumiekame meta tinawayame mepɨtehayukatuani teɨteri 'aixɨa memɨte'u'iyari wahetsiemieme.19Matsi 'aixɨa pɨ'ane makumawetsie pemukani 'axaɨta,matsi 'aixɨa pɨka'ane 'uka mɨha'a meta mayu'eriya hamatɨa pemukanikɨ.20Timaiweme kiitana waɨkawa witsipɨtiuye'ɨa meta xikutɨriya pɨtihɨne,matsi mɨkayuwaɨriya muwaparewienikɨ hipame katinitsewiximaka.21Kemɨ'ane heitseriemekɨ yamɨtikamie meta mɨtiyukanaki'erie,mɨkɨ tukari kanikaxeiyamɨkɨ, 'aixɨa ti'aneme pɨtikaxeiya meta 'aixɨa pɨraxaxatsiwani.22Mɨtimaiwe memɨtɨrɨkawi wakiekaritsie kaniye'amɨkɨ kaniwara'iwamɨkɨ,meta wa'ixumeri kananuta'unaxɨamɨkɨ ka'uniweme mɨkɨ memɨ'eriekai.23Kemɨ'ane mɨyukweriwayurie kemɨtikuxatakɨ,mɨkɨ hatsuaku hipatɨ mepɨka'i'uximatɨani.24Mɨtiyukatawe'erie mɨkɨ puwatewiyatsitɨa hipame meta pɨtiyuyuriya,meta kemɨtiyuta'ɨrekɨ xeikɨa hipame 'axapuwayurie.25Mɨyu'ɨraxie hiwe'erikakɨ kanimɨmɨkɨ,mɨkati'uximayatamɨkɨkɨ,26tukarikɨ xeikɨa kanaka'iyuniwani tihiwe'erietɨ,matsi heitseriemekɨ yamɨtikamie katiniyetuaka 'iyarieya ya'anekaku tixaɨtɨ katiwakweririetɨ.27Yawé 'axateyuruwamete wamawari pɨxani'erie,meta tsiere kepauka 'axa'anemekɨ mawari memɨyetua mɨkɨ pɨxani'erie.28Kemɨ'ane 'uniereme muyuxata ti'itawatɨ mɨkɨ kanika'unariemɨkɨ,matsi kemɨ'ane yuri mɨtikuxata kemɨtiunierixɨ pupitɨarieni yamɨtayɨnikɨ kemɨtiunierixɨ.29'Axamɨtiuka'iyari kemɨtiyuhɨawixɨ kename 'aixɨa 'ane putaine,matsi tewi heitseriemekɨ yamɨtikamie kemɨtiuyeikakɨ kaniyuti'eriexɨamɨkɨ.30Tewi kemɨtimaiwe Yawé hɨxie tixaɨtɨ pɨkatihɨkɨ,meta tiuyemaitɨ, 'ɨxatsitawetɨ tixaɨtɨ pɨkatihɨkɨ kemutaine.31Yukawayu kanikuha'aritɨwani kuyaxa 'imieriyari tukaritsie mieme,matsi kemɨ'aneta mɨrayu'iwa Yawé yatipitɨakaku pɨrayu'iwani.