Temaiwawemete20hch_wb2
1Xɨka winu 'anu'ieni ka'uka'iyaritɨ payani,yaxeikɨa nawa xɨka 'anu'ieni teɨteri pɨwaxamurieni,xewitɨ 'ietɨ timaiweme hepaɨ pɨkatiku'eriwa.2Ti'aitame kepauka mɨha'a maye muyutahaxɨatɨwa hepaɨ kani'aneni,kemɨ'ane miyehaxɨatɨani tukarieya pukweriwa'aneni.3Kemɨ'ane haxɨa mɨnɨtɨawe 'aixɨa pɨrahɨawarɨwa,matsi 'axamɨtiyuriene yutemawietɨ pitsutsutɨwame.4Mɨyɨ'ɨraxie kepauka mɨkatakwietsana pɨkaka'eni,kepauka 'itsanaxa maye'ani pɨreuyehɨaka peru pɨkarexeiyani.5Tewi kemɨtiku'eriwa haa 'ameukateewa hepaɨ pɨ'ane,matsi kemɨ'ane mɨtimaiwe yapauka peitimaitɨyeika.6Yumɨiretɨ mɨpaɨ meputiyuane kename 'ahetsie metewiya,¿kemɨ'ane pɨyɨwe tewi 'aixɨa mɨtiuka'iyari mɨtaxeiyakɨ yuri mɨti'eririekakɨ?7'Aixɨa katinixeiyarieka kemɨ'ane 'aixɨa 'anemekɨ 'amuyeika,Niwemama yupaapa hepaɨ meteyurietɨ 'aixɨa mekani'itɨarieka.8Kepauka ti'aitame yu'uwenitsie 'amayerɨni wataxanetake,mɨkɨ 'ana xeinieriyarikɨ tinaime 'axamɨti'ane katinaku'itiwani.9¿Kemɨ'ane mɨpaɨ pɨtayɨni:«Ne'iyari kani'itiyaka 'axamɨti'ane katiniumaweni»?10Tiwɨwɨtɨwame 'axamɨ'ane meta 'inɨaritsie mɨtiyukwamana:mɨkɨ tihutame Yawé pɨtixani'erie.11'Ikɨ temaikɨ kemɨtiyuriene teɨteri yamepɨtemate,kemɨtiyuriene yemekɨ xɨka 'aixɨa ti'aneni yatɨ hawaikɨ.12Tanakatekɨ temeu'enanakɨ meta tahɨxitekɨ temeunenierenikɨ,mɨkɨ tihuhutame Yawé katiniutiwewieni.13Pekunetɨ xeikɨa tixaɨtɨ perexeiyatɨ pepɨka'ayani,matsi pɨta peti'uximayatɨ 'ikwai pekanexeiyakamɨkɨ 'anayuhayewame.14Tinaweme mɨpaɨ kanaineni: «Tixaɨtɨ pɨkatiyunaki'erie 'utaitɨ»,matsi 'arikeketa mɨpaɨ kanainemɨkɨ 'aixɨa pɨ'ane.15Huru waɨkawa kanixuaweni meta tetexi witsi'anenetɨ,matsi waɨkawa pɨraye'axe timaiweme 'ɨxatsieya kemanɨyɨne.16Xɨka xeime hetsiemieme pera'akatuani kemɨ'ane pemɨka'imatetsiemieme,tixaɨtɨ pepɨtitawawiyarieni pemɨtiyetuanikɨ 'akamixa 'emutsuye paitɨ pekaneuyehɨamɨkɨ.17Tewi mɨti'itawa witsira'anekame pɨtikwa'a xeime tiu'itaiyaka,matsi 'imatɨrieka mɨkɨ tewi kanitahɨnimɨkɨ xiekari 'axamɨ'ane tetana meutawiwieni hepaɨ.18Kepemɨti'a'ɨwiyanikɨ kene'enieka memɨtemaiwawe wa'ɨxatsika,matsi pemɨyɨwekaxɨanikɨ waɨkawa mɨrayukwitɨnetsie.19Kemɨ'ane niukiperai mɨhɨkɨ tinaime pɨraxatawe teɨteri memɨtehetimanikɨ,kemɨ'ane waɨkawa memutiniuka wahamatɨa pepɨka'axewiriyani.20Kemɨ'ane yupaapa yumaama wahepaɨtsita 'axamutaine,mɨkɨ kanimɨmɨkɨ yemekɨ yɨwipa kaniyuhayewakɨ.21Tita pemɨra'iwaxɨ pekati'uximayatɨ,'imatɨrieka temawierika pepɨkahexeiyani.22Hatsuaku mɨpaɨ pepɨkahaineni: «Yanepɨrekapitɨani mɨkɨ 'axamɨnetsi'uyurikɨ».Yawé yuri ketine'eririeka mɨkɨ pumatsiparewieni.23Yawé tiwɨwɨtɨwame 'axamɨ'anene meta 'inɨaritsie mɨtiyukwamana,mɨkɨ tihutame Yawé pɨtixani'erie.24Tewi kemɨtimie Yawé kaniwitɨximeni.¿Tewi yukɨmana yuhuye keretimani?25Pukweriwa'ane xɨka Yawé hɨxie kename petiyetuani hetsɨana timieme pehaitɨ,matsi 'arikeke xɨka yapekatikayani kepemutayɨ 'aixɨa pɨka'ane.26Ti'aitame mɨtimaiwe tɨriku manuyexɨrɨwa hepaɨ pɨtiyuriene,mɨkɨ 'axateyuruwamete murinata hepaɨ kaniwareuyetɨxɨni.27Tewi 'iyarieya Yawé kɨxemeya kanihɨkɨtɨni,temɨtemaiwawenikɨ tahetsie ketemɨ'anene meta tataɨta.28Nenimayatsika meta tita yuri mɨraine ti'aitame kanitɨrɨkariyani,mɨkɨ tiyukanenimayatɨ xeikɨa yu'uwenitsie kanayeixani.29Temari witsikememɨteheu'erie mɨkɨ kaniwatɨrɨkariyatɨni,meta 'ukirawetsixi yamemɨtekahu mɨkɨ wamutuxaiya mɨixa wiyari memu'uwa kaniwa'inɨaritɨni.30'Iwaɨyɨ mɨtiyukukuine pu'uaye meta 'aixɨa kamaniyurimɨkɨ,xɨka pekuweiwani matsi 'aixɨa pekaniyɨmɨkɨ 'a'iyaritsie.