Temaiwawemete18hch_wb2
1Kemɨ'ane yuxaɨtame xeikɨa mayu'eriwa yuhetsiemieme xeikɨa pɨtikuwaune,naime 'ɨxatsi 'aixɨa mɨ'ane hepaɨtsita puyeha'arɨwe.2Mɨkayuwaɨriya teɨteri muwaparewienikɨ pɨka'inake meitimaitɨyeikanikɨ,pinake xeikɨa 'etsiwa kemɨtiuyemate mɨtikuxatani.3'Axamɨtiuka'iyari 'axapɨraxaxatsiwa xeikɨa,tewinɨarikaya xeikɨa hetsiena puxuawe.4Tewi mɨtimaiwe niukieya haramara 'amatiyewa 'emeukatewa hepaɨ kani'aneni,meta haa 'aki'utɨa muhane hepaɨ kani'aneni kemɨ'ane mɨtimaiwe.5'Aixɨa pɨka'ane xɨka hetsiena mɨrahɨiwa 'uxɨna,meta 'aixɨa pɨka'ane xɨka heitserie mexeiya hetsie pɨta rahɨiwani.6Mɨkayuwaɨriya teɨteri muwaparewienikɨ 'axa'anemekɨ xeikɨa putaniuka,yutetakɨ xeikɨa 'axaputaine mɨtamierienikɨ.7Tewi kenametimate mutaine mɨkɨ yuwiniyaritsie puyutahɨani,yutenikɨ kemɨtikuxata mɨkɨ yakɨ xeikɨa pɨrayani.8'Axaniuki witsikatini'eniɨriɨkɨni 'aixɨa ma'aneni hepaɨ,mɨkɨ rataɨta paitɨ kaniye'axeni.9Kemɨ'ane mɨyɨ'ɨraxie mɨkati'uximaya,kaniyutaxewireni xeime mɨraka'una hamatɨa.10Yawé kawi 'amutewi hepaɨ kani'aneni,hetsɨana mekaniutinanautsani heitseriemekɨ yamemɨtekahu memɨtawikweitsitɨarienikɨ.11Kiekari mɨtɨrɨkaɨye mukurarutɨarie hepaɨ katinimaika xiku tita waɨkawa mɨrexeiyakɨ,meta kuraru 'amatitɨtɨ mɨkayu'unanɨa hetsiena nunuwame kani'erieka kemɨrexeiyakɨ mɨxiku.12Muyuta'ɨre yukɨmana kaniyutaxɨtɨamɨkɨ,kemɨ'ane tixaɨtɨ mɨkarayuyeitɨa 'aixɨa tixeiyarietɨ kanayeitɨariemɨkɨ.13Mɨka'uka'iyari kaniyutewiyatsitɨmɨkɨ,xɨka 'aixɨa kati'enawetɨ waruta'eiya.14Yuwaɨriyatɨ kemɨtiuka'eniwa kananayewemɨkɨ mɨtikuye,¿matsi kemɨ'aneta mukayuwaɨriya keranayeweni yuhiwerietɨ?15Kemɨ'ane mɨtiuyemate yu'iyaritsie katinimaiweni,memɨtemaiwawe mɨtiuyemaikakɨ mekanikuwaɨtɨweni.16'Imikierikɨ naitsarie kitenietsie katineuyepierikeni,meta yaxeikɨa teɨteri memɨmamariwawe yukitenietsie mepɨmeteheuyepirieni.17'Itsɨkame hɨxie kemɨ'ane matɨari mieme maniuka kename 'axakatiuyuri 'utaitɨ,peru hipatɨta mekani'axɨakuni memunenierixɨ yame'utiyuatɨ kename 'axatiuyuri.18Kakaɨyari 'imieri mayetɨrɨkaɨye kaneutiparitɨwani,'imatɨrieka pɨhekɨare kemɨ'ane heitserie mexeiya.19Matsi pukwaniwe ta'iwa temɨnɨtɨanikɨ keyuri kiekari naitsata heunatɨkaime,kepauka tewi mɨtiyuxaneta tepɨa 'itupari warita mutuika hepaɨ 'aneme kanexeiyani yu'iyaritsie.20Tewi pɨhɨne tita mɨtikuxatakɨ,meta putahuxarɨwa yatikuxatatɨ.21Neni tɨrɨkariya kanexeiyani tukari mɨrapitɨanikɨ meta mɨranawairienikɨ,'apepɨrapiniyarieni 'atenikɨ kepemutayɨ.22Kemɨ'ane yu'ɨya mukaxei temawierika kanikaxeiyamɨkɨ:Yawé 'inaki'erietɨ mɨtiyetuirikɨ.23Tixaɨtɨ mɨkarexeiya katiniku'iwawani,xikuta kanita'eiyamɨkɨ 'ihekatɨ.24Mekanixuaweni hipatɨ hamikutsixi 'axamɨraku'anetsie memumatsi'atɨanikɨ,hipatɨta hamikutsixi mekanixuaweni 'aixɨa mete'u'iyaritɨ keyuri 'a'iwa.