Read YAASINƆ 14

YAASINƆ14bus_sim

¹Nↄgbɛ̃ ↄ̃ndↄ̃dee è ua káɛ,à faasaidee sↄ̃ è ua fãakↄ̃a.²Gbɛ̃ kɛ̀ è yã kɛ a zɛ́a Dii vĩa vĩ,gbɛ̃ kɛ̀ è zɛ́ sɛ́ súusuroo sↄ̃ è kya kán.³Faasaide lɛ́n à gbɛ̃bↄ ũ,ↄ̃ndↄ̃dee yã'ona è à bↄ.⁴Tó zù kuuro, pↄ́ble gbà ègↄ̃ da korimɛ,wè àre bíta e kↄ̃n zùnↄ gbãaao.⁵Sèeda yãpuradee è ɛgɛɛ toro,sèeda ɛgɛde yã ègↄ̃ mↄnafiki vĩ.⁶Fabori è kpáɛ kɛ ↄ̃ndↄ̃ↄzi à korazi,yãdↄ̃na aaga làakarideenɛ.⁷Ǹ kɛ̃ yↄ̃nkↄↄa zã̀azã,zaakɛ nɛ́ dↄ̃na earo.⁸Ɔ̃ndↄ̃ↄ è tó làakaridee laasuu lɛ́ a zɛ́a,yↄ̃nkↄↄ faasaikɛɛ è à sãsã.⁹Faasaideenↄ è kya ká taari kúɛkɛnan,gbɛ̃ maaanↄ ègↄ̃ nna kↄ̃o.¹⁰Baade a zĩnda yã'ↄ̃amma dↄ̃,gbɛ̃ pↄnnaa ègↄ̃ dɛ gbɛ̃ pãnde pↄ́ ũro.¹¹Gbɛ̃ zaaanↄ ua é mì dɛ,gbɛ̃ maaanↄ bɛ é ↄ tá.¹²Zɛ́ ke kuu è kɛ gbɛ̃nↄnɛ maa,mↄde à mìdɛkii nɛ́ gaamɛ.¹³Baa yáadↄna guu nↄ̀sɛ è yaka,pↄnnaa kuu kɛ̀ è mì dɛ kↄ̃n pↄsiaao.¹⁴Bↄrukpɛɛde yãkɛna è wí à musu,gbɛ̃ maaa è a yãkɛna gbɛ̀ e.¹⁵Laasuusaidee è yã píngi símɛ,làakaridee è yã náanɛ kɛ laasuulɛna sairo.¹⁶Ɔ̃ndↄ̃dee ègↄ̃ zaakɛna vĩa vĩ è pãnɛ,yↄ̃nkↄↄ è náanɛ kpá a zĩndaa ègↄ̃ wãna.¹⁷Pↄfɛ̃ri è yã futaa kɛ,mↄnafikidee è zangu i a zĩndanɛ.¹⁸Ɔ̃ndↄ̃saideenↄ è gↄ̃ faa sai,làakarideenↄ è dↄ̃na kú fùra ũ.¹⁹Gbɛ̃ zaaanↄ é mì siɛ gbɛ̃ maaanↄnɛ,zaakɛrinↄ é kúɛ nↄ̀sɛpuradeenↄ kpɛɛlɛa.²⁰Takaasidee, baa à gbɛ̃daaa è zan,mↄde auzikide gbɛ̃nnanↄ ègↄ̃ pari.²¹Kyakana n gbɛ̃daaan nɛ́ durummɛ.Aubarikadeen gbɛ̃ kɛ̀ è wɛ̃nda dↄ̃ takaasideenↄnɛ ũ.²²Zaalɛkpakↄ̃sↄ̃rinↄ sãsãnaroo?Maawaariparinↄↄ sùu vĩ kↄ̃n náanɛo.²³Mɛ̀kpana zĩia ègↄ̃ àre vĩ,yãbↄɛna pãa è mↄ́ kɛ̃sãnao.²⁴Ɔ̃ndↄ̃deenↄ auzikimɛ ń fùra ũ,yↄ̃nkↄↄnↄ faasaikɛɛ è mↄ́ kↄ̃n faasaiyão.²⁵Sèeda yãpuradee è gbɛ̃ mì sí,mↄde sèeda ɛgɛdee yã mↄnafiki vĩ.²⁶Vĩakɛna Diinɛ nɛ́ gbãa'eki náanɛdeemɛ,à dɛ mìsikii ũ à nɛ́nↄnɛ.²⁷Vĩakɛna Diinɛ nɛ́ íbↄki wɛ̃̀ndideemɛ,è tó wà bↄ ga bàn.²⁸Tó kína gbɛ̃nↄↄ pari, ègↄ̃ gakui vĩ,bùsugbɛ̃saikɛɛ nɛ́ kpatableri mↄ́nzimɛ.²⁹Gbɛ̃ kɛ̀ è pↄ fɛ̃ kpaaro wɛ́ɛ kɛ̃na,pↄfɛ̃ri è a futakɛɛ sɛ́ lezĩ.³⁰Làakarikpaɛna nɛ́ mɛ̀ aafiamɛ,zangu è mɛ̀kɛkpɛtɛ kpáńzi.³¹Wɛ̃ndade wɛ́ɛtãmmari è à Kɛ̀ri kpɛ bↄ,takaaside wɛ́ɛgwari è à Kɛ̀ri kpe da.³²Tó kisia gɛ̃̀ zaakɛrizi, è à nɛmɛ,baa tó gbɛ̃ maaa gà, à utɛkii vĩ.³³Ɔ̃ndↄ̃ↄ è vɛ̃ɛkii e làakaridee nↄ̀sɛn,mↄde wè e yↄ̃nkↄↄaro.³⁴Yãzɛdee è bùsu sɛ́ lezĩ,durun sↄ̃ è wí da gbɛ̃nↄa, baa démɛ.³⁵Zↄ̀bleri làakaride yã è ká kínanɛ,mↄde è a pↄfɛ̃ bↄbↄ à wídammaria.

YAASINƆ 14 / bus_sim

YAASINƆ14bus_sim