Read Engero 11

Engero11lug_bib

¹Minzaani eteri ya mazima ya muzizo eri Mukama,naye ebipimo ebituufu bye bimusanyusa.

²Amalala bwe gajja, ng’obuswavu butuuse,naye obwetoowaze buleeta amagezi.

³Obwesimbu bw’abatuukirivu bubaluŋŋamya,naye enkwe z’abatali beesigwa zibazikirizisa.

⁴Obugagga tebugasa ku lunaku olw’okusalirwako omusango,naye obutuukirivu buwonya okufa.

⁵Obutuukirivu bw’abalongoofu bubatambuliza mu kkubo eggolokofunaye abakozi b’ebibi bagwa olw’ebikolwa byabwe ebibi.

⁶Obutuukirivu bw’abagolokofu bubawonya,naye abatali beesigwa bagwa mu mutego olw’okwegomba ebibi.

⁷Omukozi w’ebibi bw’afa, essuubi lye libula,ne byonna bye yasuubira mu maanyi bikoma.

⁸Omutuukirivu aggyibwa mu mitawaana,naye jjijjira omukozi w’ebibi.

⁹Akamwa k’oyo atatya Katonda, kazikiriza muliraanwa,naye olw’okumanya, abatuukirivu bawona.

¹⁰Abatuukirivu bwe bakulaakulana ekibuga kijaguza;abakozi b’ebibi bwe bazikirira wawulirwawo amaloboozi ag’essanyu.

¹¹Omukisa gw’abatuukirivu gukulaakulanya ekibuga:naye olw’akamwa k’abakozi b’ebibi, ekibuga kizikirizibwa.

¹²Omuntu atalina magezi anyooma muliraanwa we,naye omuntu ategeera akuuma olulimi lwe.

¹³Aseetula olugambo atta obwesigwa,naye omuntu omwesigwa akuuma ekyama.

¹⁴Awatali kuluŋŋamizibwa eggwanga lidobonkana,naye abawi b’amagezi abangi baleeta obuwanguzi.

¹⁵Eyeeyimirira omuntu gw’atamanyiko alibonaabona,naye oyo akyawa okweyimirira aliba bulungi.

¹⁶Omukazi ow’ekisa aweebwa ekitiibwa,naye abasajja ab’amawaggali bakoma ku bugagga bwokka.

¹⁷Omusajja alina ekisa aganyulwa,naye alina ettima yeereetako akabi.

¹⁸Omukozi w’ebibi afuna empeera ey’obukuusa,naye oyo asiga eby’obutuukirivu akungula empeera eya nnama ddala.

¹⁹Omuntu omutuukirivu ddala alifuna obulamu,naye oyo akola ebitali bya butuukirivu alifa.

²⁰Mukama akyawa abantu abalina emitima emikyamu,naye ab’amakubo amagolokofu be bamusanyusa.

²¹Mutegeerere ddala ng’abakozi b’ebibi tebalirema kubonerezebwa,naye bazzukulu b’abatuukirivu tebalibaako musango.

²²Ng’empeta ya zaabu mu nnyindo y’embizzi,bw’atyo bw’abeera omukazi omulungi atalaba njawulo wakati w’ekirungi n’ekibi.

²³Abatuukirivu bye beegomba bivaamu birungi byereere,naye abakozi b’ebibi bye bakola bisunguwaza.

²⁴Omuntu agaba obuteerekereza, yeeyongera bweyongezi kugaggawala;naye akwatirira kye yandigabye, yeeyongera kwavuwala.

²⁵Omuntu agaba anagaggawalanga,n’oyo ayamba talibulako amuyamba.

²⁶Abantu bakolimira oyo akweka eŋŋaano mu kiseera eky’obwetaavu,naye oyo agitunda mu kiseera ekyo afuna emikisa.

²⁷Oyo anyiikira okukola obulungi afuna okuganja,naye oyo anoonya ekibi, kimujjira.

²⁸Oyo eyeesiga obugagga bwe aligwa,naye abatuukirivu banaakulaakulananga ne baba ng’amalagala amalamu.

²⁹Omuntu aleeta emitawaana mu maka g’ewaabwe, alisikira mpewo;era n’omusirusiru aliba muddu w’oyo alina omutima ogw’amagezi.

³⁰Ekibala ky’omutuukirivu muti gwa bulamu,era n’oyo asikiriza emyoyo gy’abantu ne balokoka wa magezi.

³¹Obanga omutuukirivu alifuna ekimusaanidde ku nsi kuno,oyo atatya Katonda n’omwonoonyi balirema obutafuna ekibasaanidde?