Temaiwawemete10hch_wb2
1Tsarumuni niukieya kemɨtimaiwekai:Nunutsi mɨtimaiwe yupaapa pɨtemawieritɨa,nunutsi mɨkayuwaɨriya teɨteri muwaparewienikɨ yumaama kanihiweritɨaka.2Tumini 'axa'anemekɨ 'iwariekame nitixaɨtɨkɨ pɨkatiyunaki'erie,matsi tewi heitseriemekɨ yamɨtiyuriene pɨkamɨni.3Kemɨ'ane heitserie yamɨtiyuriene Yawé pɨka'ihayewa heuhakamɨkɨme,peru kemɨ'ane 'axamɨtiyuriene tita mɨreukwaimɨkɨ mɨra'inɨatakɨ pɨka'ipitɨa.4Xɨka pe'a'ɨraxieka tixaɨtɨ pekarexeiyatɨ pepayani,xɨka peti'uximayaka waɨkawa perexeiyatɨ pekanayeimɨkɨ.5Kemɨ'ane mɨtimaiwe 'itsanaxa katiniuti'utani,kemɨ'ane 'itsanaxa mukutsu puyutitewiya 'arike.6Tewi heitseriemekɨ yamɨtikamie waɨkawa 'aixɨa kani'itɨarieka,'axatiyuruwame witsipɨtikuxata matsi katiniyukananaimaka.7Heitserie memu'uwakai tewara'eriwatɨ 'aixɨa tepɨ'itɨarie,mɨkɨ 'axamemɨte'u'iyarikai kwitɨwa mepatɨmaiyarɨwa.8Kemɨ'ane yu'iyaritsie mɨtimaiwe mɨkɨ yapɨtikamie kemɨti'aitɨarie,peru 'axamɨtiyuriene yutemawietɨ meta 'axamɨtiniuki kanika'unariemɨkɨ.9Kemɨ'ane heitseriemekɨ 'amuyeika, 'aixɨa 'iyari 'apuyeika,'axatiuka'iyaritɨ 'amuyeika teɨteri mepɨtehetimani kemɨtiyuriene.10Yɨhɨxikɨ yu'iwa putitaxatɨani meta waɨkawa 'uximatɨarika pɨtixuawitɨani,'axamɨtiyuriene yutemawietɨ meta 'axamɨtiniuki pɨka'unarieni xeikɨa.11Tewi heitserie 'amuyeika niukieya tukari tiyupitɨwame kanihɨkɨtɨni,'axamɨtiuka'iyari witsipɨtiuxaxata peru katiniyukananaimaka.12'Uxiwe'erika matsi waɨkawa 'imieri kaninetɨaweni,peru naki'eriya naime mɨtareuyehɨwirienikɨ kaniyɨweni.13Mɨtimaiwe teta mɨtimatenikɨ niukiyari payeneika,kemɨ'aneta yakɨ xeikɨa mɨtiyuriene kaneuyeweka yuwaritsie mukuweiwanikɨ.14Kemɨ'ane mɨtimaiwe kemɨtimaiwe kani'utani,peru 'axamɨtiyuriene yutemawietɨ kemɨtiuxaxata yapauka katinaka'unamɨkɨ.15Xiku xikutɨriyaya hetsiena kaninuaka,peru tewi tixaɨtɨ mɨkarexeiya hetsiena nitixaɨtɨ pɨkatitanuani.16Tewi 'aixɨa mɨtiyuriene tukari kanipitɨariemɨkɨ,'axamɨtiuka'iyari 'iwarikaya 'axamɨti'ane katinihɨkɨtɨni.17Kemɨ'ane muyuwaɨriya mɨtaheitseritɨarienikɨ tukari kanikaxeiyamɨkɨ,kemɨ'ane mɨka'enu'eni mɨkɨ peuyeweni.18Kemɨ'ane 'uxiwe'erika mɨ'awieta mɨkɨ katini'itawani,kemɨ'ane mɨkayuwaɨriya muwapariewienikɨ teɨteri hipame wahetsiemieme kananiuweni.19Kemɨ'ane kwinimieme mɨraniuwe, waɨkawa 'axakatinikuyuruwani,kemɨ'ane mɨtimaiwe 'atsipɨka'utaine.20Heitseriemekɨ yamɨtikamie niukieya pɨrata mɨ'itiya hepaɨ kani'aneni,matsi 'axamɨtiuka'iyari kemɨtiku'eriwa tixaɨtɨkɨ pɨkatiyunaki'erie.21Heitserie 'amuyeika niukieya hipame waɨkawa kaniwaparewieka,yakɨxeikɨa 'axamemɨteyurie meyutemamawietɨ kememɨteyurie yuwiniyaritsie mekanixɨrɨweni.22Yawé hetsɨa katinayeneikani waɨkawa mɨrexeiyanikɨ,yu'iyaritɨatɨ tixaɨtɨ pɨkara'iwa.23Mɨkayuwaɨriya teɨteri waparewienike yɨkɨmana puyutemawieritɨa 'axatiyurienetɨ,peru mɨtimaiwe puyutemawieritɨa kemɨtiuyematekɨ.24'Axamɨtiuka'iyari ketita mɨtimakaxe, mɨpaɨ yapɨtipitɨarieni,tewi heitseriemekɨ 'amuyeika tita mɨreuyehɨwa, mɨkɨ pɨraye'ani hetsienamieme.25Kepauka wiyeri mumariwe mukuyani pukumawere 'axatiyuruwame,peru kemɨ'ane heitseriemekɨ yamɨtikamie yuheyemekɨ pɨtseɨyeni.26Mɨratsiwi rakwame ratametsie 'axapɨrayurieni meta kɨtsi rahɨxita kemɨtiyukukuine,mɨpaɨ kani'aneni mɨyɨ'ɨraxie kemɨ'ane mɨti'aitɨa hepaɨtsita.27Kemɨ'ane Yawé mayemakaxe tukari mɨireme kanipitɨariemɨkɨ,peru kemɨ'ane 'axamɨtiyuriene tukarieya pɨkamɨire.28Yamemɨtekahu temawierika mekanikaxeiyakuni,'axamemɨteyurieta tita memɨtetakwewie pɨkahaye'ani.29Yawé huyeyatsie yamemɨtekahu kaniwa'ɨwiyani,kaniwaka'unanita 'axamemɨteyurie.30Heitserie yamemɨtekahu hatsuaku mepɨkahekaxɨrieni,'axamemɨteyurie hatsuaku kwiepa mepɨka'u'uwani.31Heitserie yamemɨtekahu 'aixɨa 'anemekɨ mepɨtekuxata memɨtemaiwawekɨ,peru 'axamemɨteniniuki mepɨkapitɨarie memɨtiniunikɨ.32Heitserie 'amemu'uwa witsimepɨte'uniuka,peru 'axamemɨteyurie 'axa'anenemekɨ xeikɨa meputiniuka.