Salomonka nuikiartukmauri chicham ainau
1Uchi pengkerka aparin waramtikui. Antsu uchi nintinchauka nukurin wake mesemtikui.2Aints chikich aintsun anangka kuikiarin achiawa nuka waraschatnuitai. Antsu anangmichu ainauka tuke jakatniunmaya uwemrartin ainawai.3Apu Yus pengker nintinniunka tsukajai wait wajakti tusangka tsangkatkashtinuitai. Turasha pase nintiniuka ni wakeramurinak najanati tusa suritkatnuitai.4Naki aints takatan nakitakka kuikiartichu wajastinuitai. Antsu nakichuka nukap takakmawa nuka ni takatrijai kuikian achiktinuitai.5Aints nintip esat aing ajan takakmak pujakka ni araamurin ukunam juuktinuitai. Antsu chikich aints esati ni araamuri tsamak yanchuk juukmin aing, tsawai kanú tepa nuka natsanpiakuitai.6Aints pengker nintiniun Yus ni pengkerin susatnuitai. Antsu pase aints tuke maanitan wakerau asa wait wajastinuitai.7Aints pengkeran turina nuna turamurin pachisar chikich aints ainau kajinmatsuk chichau ainawai. Antsu pase aintsu naarin pachisar chikich aints ainauka namang kaurua nunisarang kajinmaktasar wakerinawai.8Aints paan nintimua nuka chikicha akupamurin umirkatnuitai. Antsu aints nintinchau nangkami chichaa nuka itiurkachminnum jeatnuitai.9Aints tumaashmiatsuk pujauka chikich ainaun shamtsuk: Akirkata turutiarti tusangka pujatsui. Antsu aints pase nintimias pujauka wait wajaktinuitai.10Aints pase nintimias mitsuma nuka chikich ainaun pase nintimtikratnuitai. Tura aints nangkami chichaa nuka itiurkachminnum jeatnuitai.11Aints pengker chichaa nuka entsa pukuni tuke pujutan sukartinua tumawaitai. Antsu aints pase chichaa nuka maaniatniun jukitnuitai.12Aints chikich aintsun kajerak pujauka maanitan wakerawai. Antsu aints chikich ainaun aneakka, chikicha tunaari untsuri au wainiat tsangkurui.13Aints paan nintimua nuka pengker nintimias chichastinuitai. Antsu aints paan nintimtsuk pujuinaunka nintimrarti tusar awatrartinuitai.14Aints paan nintimina nuka nekau aints ainawai. Antsu aints nintimchau chichaina nuka itiurkachminnum jeartinuitai.15Kuikiartin ainauka ni kuikiarijai ayamrumakartinuitai. Tura kuikiartichu ainauka itiurkachminum jear yamrumichu ainawai.16Aints tunaun takachu ainauka tuke iwiaaku pujusartin ainawai. Antsu tunaun takau ainauka ni tunau takasmaurijai metek wait wajakartin ainawai.17Aints chikich aintsun chicharkam, nekas pengker antukka jinta tuke iwiaaku pujustinnum jeatnuitai. Antsu chikich aints chikich aintsun chicharkamsha, pengké antichua nuka jinta mengkakatniunam wetinuitai.18Waitrin ainauka nintijai kajeenayat, ni jangkejai pengker chichau ainawai. Tura chikich ainaun nangkamiar tsanurmina nuka nintimchau ainawai.19Aints nukap chichauka nukap nuwaktinuitai. Antsu aints paan nintimias pujauka jumchik chichastinuitai.20Pengker nintiniu chichamengka kuikian nangkamasang pengkeraitai. Antsu pase aints ainau nintimina nuka pengké nangkamiar nintiminawai.21Pengker nintintin ainauka untsuri aintsun nuininawai. Antsu nintinchau ainauka paanka nintimtsuk pujuinau asar, jakatniunam weenawai.22Apu Yus ni pengkerijai aints ainaun nekas pengker awajsatnuitai. Tura wake mesekmaunka susashtinuitai.23Aints nintimchauka pase takatan takaakka waraawai. Tura aints paan nintiniuka ni nekaamurijai warastinuitai.24Sapij aints ainauka tuke sapijmiakar pujuinau asar, sapijjai wait wajakartinuitai. Antsu tunaun takachu ainaun Yus ni wakerina nunaka susatnuitai.25Katurang wári nangkaamawa nunisang pase aints ainau wári mengkainawai. Antsu Yusen umirin ainauka tuke pujusartin ainawai.26Aints nakia nuka akupkamaitiat wetan nakitau asa, churinun apawa nunisketai. Tura ji mukuntiuri jiinam engkema najamniua nunisang niin akupniuka itit nintimui.27Yusen umirin ainauka untsuri musach pujusartin ainawai. Antsu pase aints ainau musaach nukapka pujuschartin ainawai.28Pengker nintimin ainauka tuke warasar pujustiniun nakainawai. Tura pase aints ainauka ni wakerina nunaka nangkamiar nakasar wait wajaktinnum weartinuitai.29Apu Yus pengkeran turinaunka ayamruktinuitai, antsu pasen turinaunka mengkaktinuitai.30Yusen nintimsar pujuinauka mengkakachartin ainawai. Antsu pase ainauka ni nungkarin tuke pujuschartin ainawai.31Yusen nintimsar pujuinauka tuke paan nintimsar chichainawai. Tura pase nintintin ainau tuke pase chichainau asaramtai, chikich aints ainau inajin charinawa nunisarang itiatkataram tusar, ni chichamen antutan nakitinawai.32Yusen nintimsar pujuinauka antujamniaun chichainawai. Tura pase nintitin ainauka aya pase chichamnak chichainawai.