Temaiwawemete1hch_wb2

1Tsarumuni 'ɨxatsiteya Rawiri nu'aya, 'Ixaheri kwieyaritsie ti'aitame:2petimaiwetɨ pemayanikɨ meta 'aixɨa 'anemekɨ pemuyeikanikɨ,meta mɨtiuyemate niukieya pemetimaitɨyeikanikɨ,3mɨtaheitseritɨarienikɨ yamɨtimaikakɨ tita 'aixɨa mɨti'ane tita 'axamɨti'ane,heitseriemekɨ yamɨtikamienikɨ hepaɨtsita, heitseriemekɨ 'aixɨa mɨtiyurienenikɨ meta yunaime 'aixɨa mɨtiwaxeiyanikɨ,4'aixɨa 'anemekɨ pɨtiwapitɨa kemɨ'ane 'atsimemɨkatemate, meta temari mete'uyemaitɨ memakɨnekɨ,kemɨtiuyurieni hepaɨtsita.5Mɨtimaiwe 'ikɨ ke'u'enieni, matsi waɨkawa mɨretimanikɨ,matsi heitserie kaneti'enatɨyeimɨkɨ,6meitimanikɨ tita 'ɨxatsi 'inɨariyari mɨtixata mɨkɨ pɨtimaika,temaiwawemete waxatsika mɨkayumainɨa.
7Yawé 'ayemakatɨ mɨtiuyemaikakɨ kanitsutɨni,'atsimemɨkatemate mɨtimaiwenikɨ mɨ'ayumieme mepɨxani'erie meta memɨtaheitseritɨarienikɨ.8Temaikɨ, keneu'eni 'apaapa kemɨmatiku'ɨxatsitɨwa,meta 'amaama kemɨmati'ɨkitɨa pepɨkahetɨtɨmaiyani.9Mɨpaɨ xɨka yapetikamieni 'amu'utsie witsimɨ'ane pemanakeka hepaɨ pepɨ'aneni,meta kuka pematitɨkɨni hepaɨ pepɨ'aneni.
10Temaikɨ, xɨka 'axateyuruwamete memateku'itaiyani,wahamatɨa pepɨkaheyeikani.11Xɨka mɨpaɨ memetehahɨaweni:«Kɨmɨ tahamatɨa kenemie.Xeime tepuhupieni tsepa 'atsimɨkatiuyuritepeimieni yakɨxeikɨa.12Tepeitakwani naime 'ayenierememɨki teukiyata teɨteri kemɨtiwakwa'a hepaɨ,yaxeikɨa meukatewatsie meukahɨiya naimitɨ hepaɨ.13Tetetinawame naime piinitɨarika tetehexeiyatɨ tepakɨne,'Ana 'inawari tinaime takiita tekatenitihɨniyakuni.14Teyunaitɨ teyutinɨme tepɨtekunawatɨweni,tita temɨtenawani teyunaitɨ tahetsiemieme pɨrayeikani».15Peru neuxei temaikɨ, pepɨkawareu'enieka mɨkɨ.'Axamemɨteyurie wahuye keneuku'eiri.16Mɨkɨ mepuyuwaɨriya 'axamemɨteyuriekakɨ,mekaniyumexɨitɨaka xuriya memɨtayeurienikɨ xeikɨa.17Xɨka winiyari 'anutawieni yakɨ xeikɨa pɨrayeika,wikixi yunaitɨ me'ixeiyakaku.18Peru mɨkɨ 'axamemɨte'u'iyari yɨkɨmana yutukari mepɨwiniyatɨwe,mɨpaɨ mekateniyuka'unakuni.19Mɨpaɨ mepɨtetakukuwe kemɨ'ane yuhetsiemieme xeikɨa memutekuwautɨwe,mɨpaɨ yutukari mepɨtetatɨmaiya.

Mari'itɨarika mɨtimaiwenikɨ mɨkayuwaɨriya hepaɨtsita

20Mɨtimaiwenikɨ mɨ'ayumieme 'uka hepaɨ kaye 'utɨa kanahiwani,yuwaɨkawatɨ teɨteri memaxuawetsie waɨkawa kanahiwani.21Kaye 'itsikinayaritsie waɨkawa mɨranuyekɨkatɨretsie kanahiwani,kiekari mɨranutahakitɨretsie yurikɨ katinikuxatani:
22«Xeme temari 'atsixemɨkatehetimaiwawe 'akuxi,¿kepaukake xepɨtehayewa mɨyaxeteyurietɨ?Xemeta xeteyukatawe'erietɨ xemutiwaweriyarie,¿kepaukake xepɨtehayewa xeyutemawietɨ kexemɨte'u'iyarikɨ?Xemeta 'atsixemɨkatemate,¿kepaukake xepɨtehayewa 'aixɨa mɨti'ane xete'uxiwe'erietɨ?23Xekeneneu'eni kenemɨxerahɨawe,ne nepɨnewaɨriya nemɨtixetaxatɨanikɨ 'iyaritsie miemekɨ kenemɨtiyumate netaɨta,yanekatinixepitɨamɨkɨ kenemɨtiku'eriwa yaxemɨtehetimanikɨ.24Kepauka nemɨxekɨhɨawekaitsie xeme xepɨkanetsi'u'eni,kepauka nemɨxe'u'iniwakaitsie nehetsɨa xepɨkahakɨ,25Matsi pɨta naime ne'ɨxatsitɨarika xeputixani'eri,meta kenemɨtixeha'imaiyakai xemɨkanetsi'anu'enikɨ,26'Ayumieme neta 'ana neputanaweni xehetsiemieme,kepauka xemɨ'uximatɨariekatsie.Ne nepɨhɨkɨtɨni nemutanaweni xehepaɨtsita,kepauka marika mɨxe'axenitsie,27kepauka marika xehetsie munuani 'eka mɨtɨrɨkaɨye hepaɨmeta kepauka 'uximatɨarika mɨxe'anuhapani haikɨri kwinimieme mɨtitɨrɨkaɨye hepaɨ.
28»Hikɨ 'ana xekanenitahɨawikuni, peru ne nepɨkaxeta'eiya,'ana xepɨnetsitiwauni, peru xepɨkanetsitaxeiya.29Xemɨtemaiwawenikɨ xeputixani'erimeta Yawé xe'ayemakatɨ xemɨkahakɨkɨ,30Neniuki ne'ɨxatsi xemɨkahanu'enikɨ,kenemɨtixeku'imaiyakai xemɨka'anu'enikɨ,31Tita tewi mɨtiuka'e mɨkɨ katinika'itsanamɨkɨ,pɨtitimɨiriya tita yuhetsie mɨtiupitɨa pɨka'ikemakaxɨani,32Kememɨteheuyexɨri meta tita 'atsimemɨkatematekɨ mɨkɨ puwakwini,watemawierika tixaɨtɨ mɨkatiyunaki'erie puwareuyehɨani.33Matsi kemɨ'ane mɨnetsi'anu'enieni 'aixɨa 'iyari 'apuyeikani,meta tixaɨtɨ pɨkareumakaxeni».
expand_more
Search