2Mi yii ñaah Ewodi na Sintik ne ɓa kerhiɗoh ŋ niki ɓa nik ŋ Heɗi.3Te fu yi ɓaah ho keeh-keeh ngaŋ pangki, mi yii kiim ɗa ne fu ɓaatɗoh ɓitiɓ ceem, ɓa ɓaahee na so hiñohi ŋ ini kaɗ ŋ Yegɗohiŋ Muci, ɓeɗ na Kelema na huntoh ciŋ ngo ɓinooɓi. Tiik ciŋ ɓa fiisuuɗ ŋ teerndiŋ kipes ki.4Genaat sum ŋ niki ɗu nik ŋ Heɗi ; ŋ woyisa, sumaat !5Ɓooɓi jen inhaat baah kiŋ ɗu. Heɗi reɓiɗ.6Kinaat jaahiɗ ŋ ali in ; waaye ŋ in nu wa min nik ɗah, kiimaat Kooh, woyaat ɗe etoh ciŋ ɗu, te wa hun na corkiɗ ɗe.7Te jamiŋ Kooh, wi cootuk liiɓ nu nik, wa hey niiɗe keeñ ciŋ ɗu na liiɓohaaɗ ciŋ ɗu ŋ niki ɗu nik ŋ Kiristaani Yeesu.8Ɓaah ciŋ ngo, ini tas weɗ ne : In nu nik keeh, na in nu nik eɗaah cir, in nu yurah, in nu hool, in nu nik waaɗaah, in nu nik baahiɗ ŋ hot-hotkiŋ ɓooɓi, in nu nik nawaah, na in nu nik ƴeekaah ɗah, ceɗ nikaat ŋ liiɓ ciŋ ɗu.9In ci ɗu jang nga so, ɗu rahassa ca, ɗu kerahha ca te ɗu hotta ca nga so, tumaat ca, te Kooh yi na onohe jam hey nike na ɗu.
Pool corkiɗiɗ ɓi Filippi ŋ onohiŋ ɓa
10Ŋ niki ŋ nik ŋ Heɗi ŋ sumiɗ lool ŋ ini ɗu min teeɓohis yegi ɗu yeg go kotii. Te yegi ɗu yeg go weem wa moos moos nik. Ɗu raakeeɗi raakeeɗi waasi ɗu min ndo wa teeɓoh.11Nikɗi haa ne ŋ raak etoh weɗ tah ho woo ineem ; laam ŋ jangiɗ pes ngaŋ neɓu ŋ in nu nik.12Ŋ inhiɗ ini nik ŋ ñak, ŋ inhiɗ ini nik ŋ raak. Ŋ in nu nik na ɗisik nu nik, ŋ jangiɗ pes na kap, ŋ jangiɗ pes na aɗuk, ŋ jangiɗ pes ngaŋ raak-raak na ɓangtu.13Ŋ miniɗ in nu in ŋ niki ŋ nik ŋ Yi on ndo hatil.14Waaye ɓaahi ɗu ɓaah na so miskiɗiŋ ngo, wa in baahiɗ.15Ɗu ɓi Filippi, ɗu inhiɗ ŋ haf ɗu ne ŋ cambiŋ Yegɗohiŋ Muci ŋ ndeem, wa ŋ puloh Maseduwaan, ali Jangu ambtiɗoheeɗi na so ŋ ini kaɗ ŋ kopor, ɗal ɗu.16Wa ŋ nik ŋ Tessalonik sah, ɗu woosohiɗ to ini ŋ etohe, te wa waas yino haa.17Wa nikɗi haa ne onohiŋ ɗu mi na rahse, weɗ nikiɗ to, waaye mi na waaɗe ne onohiŋ ɗu tum po ini kipes kiŋ ɗu rimɗan ɗu, ɓaatuk.18Ŋ rahsiɗ in ci ɗu woosoh jen, ɗiski ŋ nik, ŋ raakiɗ po ca uupiɗ ini ŋ etoh, Epaforodit eɗiɗ to in ci ɗu woosoh. Ini ɗu eɗ to, Kooh teyɗukiɗa findi seeƴuk eeñiɗ neɓiɗ te a sumiɗ nga.19Koohiŋ ngo hey ɗu paƴɗe etoh ciŋ ɗu jen ŋ raak-raak kiŋ ɗe na yaki a yak taamboh ŋ Kiristaani Yeesu.20Koohiŋ ɓoo yi nam nik Baabiŋ ɓoo, a yakɗaah po faw ! Amiin !
Askohi
21Kañɗaat ɓo'-Kooh ci nik ŋ Kiristaani Yeesu jen. Ɓaah ci nik na so ɓa ɗii kañiɗ ɗu.22Ɓo'-Kooh ci jen ɓa ɗii kañiɗ ɗu, ɓi nik ŋ kahan buuri yakkiŋ Rom ɓeɗ uup ɗu kañiɗ.23Baahohiŋ Yeesu Kiristaa Heɗi nikaat na ɗu !