1Ini tas ɓaah ciŋ ngo, weɗ ne ɗu sum ŋ Heɗi. Ŋ woyis ɗu wa, wa in ɓitiɗ nga so haa, te weɗ ngisoh nga ɗu.
Inah Yeesu Heɗi weɗ uup in ci jen
2Kon, wortukaat tumoh baahaaɗiici, ɓuu ceem, wortukaat ɓi na nguɗe cir ciŋ faan ciŋ ɗu.3Laam e ɓoo nguɗkiɗ ci keeh-keeh, ɓoo ɓi na ñaamke Kooh taamboh ŋ Fuuɗsiŋ ɗe, ɓoo ndamkohee Kiristaani Yeesu te ɓoo oolkohɗi ini kaɗ ŋ faan.4Moona mi, ŋ mineen oolkoh ini kaɗ ŋ faan. Nik ne a ɓum oolkoh ini kaɗ ŋ faan ɗah, ŋ woyisɗi ɗa mi :5Ŋ nguɗuk ŋ mbeha yasna-kaahayɗoh, ŋ rimkaŋ ngo poyi ŋ ɓo' Israayel, ŋ ɓaah ŋ cuuɓiŋ Benyaamin, ŋ Heber, ŋ rimu Heber. Ŋ ini kaɗ ŋ waasiŋMusaa, ŋ Farisen.6Ŋ ini kaɗ ŋ sawar, ŋ kaɗeen po ŋ tolfiɗeeɗa ɓi Janguuni. Ŋ ini kaɗ ŋ yurhiɗi puloh ŋ nakoh ciŋ waasi, ɓo' raakeeɗi woyaah nga so.7Waaye ini ŋ ambee ne wa raak-raak wuu so, woti ŋ amb ne wa ñak sagu Kiristaani.8Te ɓaat nga, ŋ amb ne in ci jen ca ñak, laam in ceem jen, inhi ŋ inah Kiristaani Yeesu Heɗ to, uup ca fuuf. Saguuce tahiɗ po ŋ teyɗukiɗ faɗ in ci jen, ca mbalit nga so kotii, ne ŋ raak Kiristaani.9Ini ŋ waaɗ weɗ ne ŋ hotuk nga ɗe, maanaam ŋ raakuu kiyurhiŋ ngo haf fo, wi puloh ŋ nakoh ciŋ waasi, waaye ŋ raak kiyurah taamboh ŋ kosi ŋ kos Kiristaani, wi puloh ŋ Kooh te wa gaƴukka ŋ kos.10Ini ŋ waaɗ weɗ ne ŋ inah Kiristaani na hatiliŋ hultiŋ ɗe te ŋ raak ɓak ngaŋ miskiɗ ciŋ ɗe, ŋ mand na ɗe ŋ ini kaɗ ŋ kakaan kiŋ ɗe,11ne findi wa min nikoh ɗah, ŋ nam min rahas hulti.
Pool waaɗ nup po a ree ɗiski na kaɗse
12Wa nikɗi haa ne ŋ rahsiɗ ineem jen po ƴutiɗ, wala ŋ reyiɗ ŋ mit ; waaye mi yii nup ne ŋ amba, findi mi ŋ haf fo Kiristaani Yeesu amboh ho.13Ɓaah ciŋ ngo, ini kaɗ nga so, ŋ ambɗi ne ŋ rahsiɗa waaye, raakiɗ ini mi na tume : Mi na alkohe alkoh ini ŋ cootuk te ŋ ndengɗukee ŋ ini ŋ fikiiri.14Mi yii nup nup yurhiɗ ngaŋ ɗiski na kaɗse ne ŋ min rahas aafi, aafi tah Kooh ɓeeɗuk ko taamboh ŋ Kiristaani Yeesu ne ŋ kaɗ ŋ ɗafka.15Mbaa, ɓoo ɓi nikisɗi komaaki jen ŋ kosi ɓoo kos, ɓoo ambaat liiɓeem ; te ɗu raak ini ɗu hunɗi na so nga ɗah, Kooh hey ɗu wa name inhiɗ.16Waaye ŋ ɗiski ɓoo ree ndii, ɓoo hunaat, ɓoo taalndiɗ.17Ɓaah ciŋ ngo, ɗu jen, altiɗkohaat to, te ɗu taamb ŋ kot ciŋ ɓi na taambɗe kot ciŋ ɓoo.18Laam, ɓi ɓo' laayiɗ, tumohaaɗ ciŋ ɓa teeɓohiɗ ne ɓa sangiɗ ciŋ kurwaaniŋ Kiristaani ; ŋ meeɗeen ɗu woo ŋ ini kaɗ nga ɓa, te woti mi woyis ɗu wa na muhun.19Ɓooɓeem, ɓa mirndohan ngaŋ ɗumbu ; rook ciŋ ɓa ceɗ koohiŋ ɓa, ɓa amb ne kaci ndam ; liiɓ ciŋ ɓa jen, ca in ciŋ kehƴi.20Ini kaɗ nga ɓoo nak, ɓoo ɓo' Asamaan, ɗiski Yeesu Kiristaa Heɗi pulohan, Mucɗohi ɓoo na seke na seesuk.21A hey ɓoƴsohe faan ciŋ ɓoo miskohiɗ cii ne a tum ca findi wiŋ ɗe, wi hun na siñaar, a tumana taamboh ŋ hatili a minoh in ci jen.