Read Filipénses 2

Filipénses2plu_wbt

Ikawnay Ke Wotbe Yis Pahapwiwatbe Hiyeg Pawtak

¹Yis keh nah batek nnaktin kaayhsima henneme nupewkan muweke yit aynessa yihiyakemni adahan yis keh nah batek nubetkiapriknawa. Ba ik adahan nah yikebyi Jesus gihiyega ikene yihiyakemni aynessa akiw? Kibeyne, wixwiy Jesus gihiyegapu iwenekwiye wawaygyiy giwntak Cristo. Wixwiy darihnekwiye gamnihra. Wixwiy darihweknekwiye gikak Uhokri Gitip. Wixwiyweke amnihak pawtak. Inneki keh nah ayá yit numawkan yis ikaw pahatwowa yihiyakemni, pahatwowa yibetki pawtak, ke wotbe yis pahapwiwatbe hiyeg pawtak.³Nah ayá yit numawkan yis ka mapihpak pawtak. Numawkan yis ka ikaw pi kiyattema giw pahapwi. Henneme ikawnabay ke wotbe yis yumahbe yikiythani. Ikiynabay nawenépwi hiyeg ku igkis pi kiyatte yiw.⁴Ka ba yi muwaka kiyé kabayka yidahanyekatnama. Kiyenabay hawwata kabayka gidahankis nawenépwi hiyeg.

Jesus Ikewpi Warikap Ke Wotbe Ig Yumahbe Gikiythani

⁵Iwinabay Cristo Jesus gihiyakemni ku samah ig ka kiyé gipit aynesnima.⁶Ignewa Uhokri henneme ig ka ipeg apitit ini gibunuga ku samah ig Uhokri.⁷Giwnteknewa ig madiptiswe adahan ig humaw kewa ibuktibe. Ig kinagsaw ig humaw hiyeg amadgaya inin.⁸Ig hiyeg amadgaya inin, ig ikewpi ke wotbe ig yumahbe gikiythanibe aynesnima. Ig ihpatrune giwn Wigwiy he ig umahkiswe. Pi mbayte akiw ig umahkiswe amin giyakni.

Madikte Hiyeg Paberetusawnek Gititput Jesus

⁹Inneki keh ig Uhokri keh ig humaw pi kiyatte mapiy madikte hiyeg. Ig keh giw pi kiyathakahte ariw madikte hiyeg giwkis.¹⁰Nikwe aysawnemenek madikte hiyeg inugikyenepwi, gikakkis madikte hiyeg amedgenepwi inin, gikakkis madikte hiyeg miyarapye anapi wayk, igkis kiyathenekwiye Kiyapwiye Jesusnek. Apim ini igkis paberetusaw ta gitiputnek adahan igkis kumadukasewpiye ta git.¹¹Igkis madikte awnenekwiye: ―Jesus Cristo iggi Ukiparawiy. Inneki keh Wigwiy Uhokri ig kabayhaka.

Igwa Uhokri Wawayghetniwiy

¹²Nukebyupwi kibeynepwi, yis apanenekwa iha nuwnhu ku aysaw nah ayge yibet. Kuri nah pi muwakate yis iha nuwnhu ku aysaw nah yuma ayge. Kuwis ig Uhokri keh wixwiy isamtaw ariw mbayka. Nikwe uyay ka isaksaw arit mbayka akiw. Uyay keh kabaykanen. Ihpanay Uhokri giwn akak madikte yikiythani akak madikte yapisni ku nawenétke yis tarakse.¹³Mmanawa ignewa Uhokri keh wixwiy kehkere gibetki. Ig hawwata ikene wawaygyiy adahan wixwiy apanenekwa kehnenekwa ini gibetki.

Humawnay Ke Abukribe Giwtrikkis Hiyeg

¹⁴Nah ayá yit adahan apanenekwa yis ka amtaw adahan yis ka karatonaw.¹⁵Marihwa yis yumahwa yitaraksan giwtrikkis hiyeg, iné ay apit yiyakni. Ikawnabay Uhokriyanbetnawa ay gibetkis hiyeg. Ka yi muwaka keh aynesnima mbayka. Hiyawa yis msakwa ay gibetkis hiyeg kanegipathawnikisima kane wadityepwima, yisme amawka yis ikaw kabayhtiwa yuma yipathawni. Humawnay ke abukribe giwtrikkis hiyeg adahan yis uguhne gihiyakemnikis akak¹⁶yuwit kibeyne ku pariye keh igkis aymuhwa gimun Uhokri adahan apanenekwa. Ku yis wew henne, nikwe nah batek kaayhsima apim ini hawkri ku aysaw Cristo ayta adahan hiyekne gikakkis hiyeg. Apim ini nikwe nah batek kaayhsima ku samah nannipwi numapuswan ayge yibet in ka waditnepyenenma.

Bateknabay Ke Nahbe

¹⁷Nukebyupwi, ini yikamaxwan ku samah yis kamaxwene gipitit Kiyapwiye Jesus ini humaw ke nukanhube ta git Uhokri. Nawenétke nah umehpika apatra ku samah nah ekkene ginetni yit, henneme in ka sam nuthu. Ku nah umahkiswa yidahan, in batekka nuthu. Nah muwaka ibekhe ini batekka yipuriw.¹⁸Numawkan yis hawwata batek ke nahbe adahan yis batek payak nukakhu.

Nah Awahkis Timótyu Atere Iwasapyi

¹⁹Gikak Kiyapwiye Jesusnek nah awahkis kiyapwiye Timótyu kiberemin atere yimin adahan nah timepne yak ku samah yiwskawni ayge kahadbe nah batek nnaktin.²⁰Ig kiyapwiye Timótyu ig inyerwa batekye yikak ig wakaymni yidahan hawwata ke nahbe. Yuma hiyeg kema igma.²¹Mmanawa madikte hiyeg aharit kabayka gidahankisnen, gidahanme Jesus Cristo ignes ka aminama.²²Igme kiyapwiye Timótyu ka hennema. Yis kuwis hiyak ku samah ig kibeyne kabipwiye. Ig ekkene Uhokri ginetni payak nukakhu kewa ikamkayhtibe gikak igtibe.²³Nikwe pase nah hiyak ku pariye arikna danuh nuthu ay, nah awahkisri atere yimin.²⁴Gikak Kiyapwiyenek nah hawwata danuhpene atere yit kiberemin.

Kuri Nah Awahkis Epafroditu Atere Yimin

²⁵Ke nuthube nah awahkis kiyapwiye Epafroditu diyuh atere yit pisenwate. Kibeyne, yis awahkisri atan nuthu adahan nayapetni nukapriwten. Nah batek gikak ke wotbe ig nukebyibe. Ig kannipwiye mpiksaw payak nukakhu.²⁶Henneme kuri nah awahkiswig ig diyuhe yit mmanawa ig kadni yiharit madikte. Ig wakaymni ku samah yis timé gak ku ig kakahrip.²⁷Hennewa ig kakahripwa ig. Kabá miyá. Henneme, kibeyne, Uhokri amnihpig ig hawkemnihwa akiw. Hawwata akakwata ini ig Uhokri amnihpen adahan nah ka kiyimwih nnaktin akiw.²⁸Nah awahkisri yimin kibentenwa kahadbe yis hiyapri yis batek yinaktin akiw. Ini mpiyesa madikte kiyimwihwaki nnaktintak.²⁹Amapanigbay akak batekka akak kabayhaki gidahan Uhokri. Kiyathanigbay ku samah akisyi gidahan.³⁰Mmanawa ig ka kapigsa gipit adahan ig kannipwiye gidahan Cristo ay he ig kakahrip. Ig kabá umahkiswa awaku ku samah ig nayapetni yidahan.

Filipénses 2 / plu_wbt