1Bho, ughome gwino mu kulombana na Kilichitu kumpela likakala? Bho, upalo gwake ghumpepecha? Bho, nnombine na Uhuke gwa Chapanga? Bho, mukolelana kiya na kubhehe na ungolongondi mabhene kwa mabhene?2Bhahe, nnenganikiye kuhangana kwango kwa kubhehe na liwacho limo, upalo ghumo, mwojho ghumo na uhwachi kilebhe chimo.3Nkoto kuhenga chochoha kwa mwojho gwa nginyika amu kwa kuloka, mme na unyenyekeho mabhene kwa mabhene, na kila mundo annola nnyake jwamaha kuliku jwenio.4Kila mundo akoto kukipalakiya ilebhe yake jwenio tugha, nambo helahela alolekeye na ilebhe ibhapala bhange.5Mme na mwojho ghogholaghola gwabhii nako Kilichitu Yecho.6Kilichitu kwa chakaka akibha Chapanga,nambo akawejhe kubhehe lenga na Chapanga ndi kilebhe cha kuchokolekeya.7Nambo kwa kupala jwenio,ajhakulekekeya gheniya ghoha ghughabhii ghake, ajhakubhehe ngita chabhehe mmanda,akalelilwe ngita bhando bhange chibhalelilwe,akabhonikine ngita mundo.8Ajhakukinyenyekeya na kunnyokanikiya Chapanga ade kuwe,yenio ade kuwe pa nchalaba.9Nhwalo gwenio Chapanga ajhakunhobhowa ade kunane hake,peniya ajhakuntina liina likolongwa kuliku mahina ghoha.10Ndi kwa ukolongwa gwa liina lya Yecho,ilebhe yoha ya kunane, na ya pannema na ya ku kilambo cha bhando bhubhawile,yoha itame makilikite palonge jhake,11na kila mundo ajheketele kubhehe Yecho Kilichitu ndi Bhambo,kwa unga'licho gwa Chapanga Tate.
Nnangale ngita ndondwa
12Yene akakoche bhango, ngita chiunyokanikiya kila machiko punikibha na mangota, ngohe mangota ndi mbone kujhendelela kunyokanikiya pamonga na kubhehe kutale na mangota. Uhenge mahengo kwa kujhoghopa na kwa kulendema nhwalo gwa ughombokeko gwino,13nhwalo machiko ghoha Chapanga ihenga mahengo nkate jhino, na antenda uhenge kwa kupala kuhenga ghala ghapai jwenio.14Uhenge kila kilebhe changakokoleka na changa mitaho,15ndi mme yana ya Chapanga mmii bha mbone na bhangabhehe na ulemo, bhibhitama pannema gwanganandela na bhando bhubhabhii na ulemo. Mangota mitama pakate jhabhe ngita ndondwa jhilangala kunane,16kongo mulikamulii mbone Lilobhe lilileta ughome. Anda ntei yenio nangola kilebhe cha kukilokela mulichiko lela la Kilichitu, nhwalo nalangiya likakala lyango na lihengo lyango likibha lya jhajhe jhe.17Nambo ata ngita mohitwe kubhehe litambiko anda chakunywegha pamonga na kihobholelo chino libhii litambiko kwa Chapanga, nenga nihangana, helahela nihangana pamonga na mangota mabhoha.18Helahela na mangota uhangane na peniya uhangane pamonga na nenga.
Timocheyo na Epafilodito
19Anda Bhambo Yecho apahile nihobholela nanintuma Timocheyo kwino ankangamalichwa mwojho kwa kujhoha malobhe ghino.20Ngweti ndeka mundo jhonge ngita jwenio, jwakakalakana mambu ghino kwa mwojho.21Nhwalo bhando bhange bhikukulukana na mambu ghabhe tugha, nambo bhakukulukana jhe na mambu gha Yecho Kilichitu.22Nambo mangota mabhene mimanya Timocheyo pahengita lihengo na nenga, ngita mwana na tate gwake, kwa nhwalo gwa Lilobhe lya Mbone.23Yene nihobholela kuntuma kwino kajhombe kwa ghala ghunimanya ghighapala kupitila.24Na nenga nihobholela kwa kulombana na Bhambo na nenga namwete mmi pahina kuhika kwino.25Nambo nibhona mbone kuntuma Epafilodito, nnongo gwango na uhenga lihengo nnyango jwaikengalile pamonga na nenga, helahela ndi ntumiche gwino jhumbekiwe andangatile.26Nhwalo anogwi hake kukongana na mangota mabhoha, na nibhona lipyanda nhwalo mukajhohine atenda kulwalwa.27Akibha tepekatepeka abhandikila kuwegha. Nambo Chapanga ajhakumone kiya, ankolii jhe kiya kanjika helahela akangoli kiya na nenga, ngota kubhehe ngolongondi hake.28Yene nipala hake kunntuma kwino, ndi pimipala kummona kabhele uhangane kabhele.29Mupokele kwa luhangano ngita nnongo gwino kwa kulombana na Bhambo. Mipalwa kwajhokanikiya bhando ngita jhonjo.30Nhwalo jwenio akabhandikii kuwegha kwa nhwalo gwa lihengo lya Kilichitu, na jwenio akibha mukuhandahanda jha kuwegha kwa kundangatila nenga pala mabhene mukahotwii jhe kundangatila.