ምድያመ ቦላ ደንድዳ ኦላ
1ጎዳይ ሙሰኮ፥2“እስራኤለ አሳ ቆህዳ ግሾ ምድያመ አሳ ኦላዳ ሀሎ ከያ፤ ሄሳፈ ጉየ፥ ኔኒ ሀይቃዳ ነ ማይዛታ ጋካና” ያግስ።3ሄሳ ግሾ፥ ሙሰይ አሳኮ፥ “ምድያመ አሳ ኦልድ ጎዳ ሀሎ ከያና መላ ህንተ ግዶፈ ጉ አሳ ኦላስ ዳንጭስተ።4እስ እስ እስራኤለ ኮቻፈ እስ ሙኩሉ አደ አሳ ኦላስ የድተ” ያግስ።5ሄሳ ግሾ፥ እስ እስ እስራኤለ ኮቻፈ እስ እስ ሙኩሉ አሳይ ከይድ፥ ታማነ ናምኡ ሙኩሉ ኦላንቾት ኦላስ ጊግዶሶና።6ሙሰይ ካህንያ አላዛራ ናኣ ፕንሃሳ አዋተን፥ እስ እስ ኮቻፈ እስ እስ ሙኩሉ አስ ዶርድ ኦላስ የድስ፤ ፕንሃስ ብሸ ጌሻ ሚሸታነ ማላስ ፑንያ ዛየ ኤክድ ብስ።7ጎዳይ ሙሰ ኪትዳይሳዳ፥ ኤንቲ ምድያመ አሳ ኦልድ አደ ኡባ ዎዶሶና።8እቻሹ ምድያመ ካዎታ፥ ኤዋ፥ ረቄማ፥ ዙራ፥ ሁራነ ሬባ ጌተትያ አሳታ ዎዶሶና፤ ቃስ ብኦራ ናኣ ባላማካ ማሻን ዎዶሶና።9እስራኤለ አሳይ ምድያመ ማጫሳነ ናይታ ድእዶሶና፤ ኤንታ መህያ፥ ዶርሳነ ዴሻ ዉድያነ ኤንታ ሚሸ ኡባ ድእዶሶና።10ኤንቲ ደእያ ካታማታነ ኤንታ ጉታታ ኡባ ፁግዶሶና።11አሳ መህያነ ደእዳባ ኡባ ኤክድ ብዶሶና።12ኤንቲ ድእዳ አሳ፥ መህያነ ሻሎ ኡባ እያርኮፈ ሄፍንን፥ ዮርዳኖሰ ሻፋ ማታን ደእያ ሞአበ ደንባን ዱንካንዳ ሙሰኮ፥ ካህንያ አላዛራኮነ እስራኤለ ማባራኮ ኤህዶሶና።13ሙሰይ፥ ካህነያ አላዛርነ ማባራ ሀላቃት ኡባይ ዱንካንዳ ጉታፐ ጋፃ ከይድ ኤንታና ሞክዶሶና።14ሙሰይ ኦላፐ ስምዳ ቾራ ሞጮናታ፥ ሻላቃታነ ማቶ ሀላቃታ ቦላ ሀንቀትስ።15ሙሰይ ኤንታኮ፥ “ማጫሳ ኡባ አይስ ዎቤከቲ?16ኤንቲ ባላማ ዞርያ ስእድ፥ ፐኦራ ጌተትያ በሳን እስራኤለ አሳይ ጎዳ አግድ፥ ቦሻን ሀይቃናዳ ኦዳይ ማጫሳ ግደይሳ ዶግደቲ?17ሄሳ ግሾ፥ ሀእ አደ ናይታነ አደራ አቅዳ ማጫስ ኡባ ዎተ።18ሽን አደራ አቅቦና ማጫ ናይታ ኡባ ህንተዉ አሽተ።19ህንተ ግዶፈ አሰ ዎዳ አስ ዎይኮ አሀ ቦችዳ ኦንካ ጉታፐ ጋፃን ላፑን ጋላስ ኡቶ፤ ሄን ጋላሳንነ ላፑን ጋላሳን ህንተናነ ህንተ ድእዳ አሳ ጌሽተ።20ሄሳዳካ ማኦ ኡባ፥ ጋልባፈ፥ ዴሻ እክሰፐነ ምፈ ኦሰትዳባታ ኡባ ጌሽተ” ያግስ።21ካህነይ አላዛር ኦላፐ ስምዳ ኦላንቾታኮ፥ “ጎዳይ ሙሰስ እምዳ ህግያ ማራይ ሀይሳ፤22ዎርቃ፥ ብራ፥ ናሰ፥ ብራታ፥ ቆርቆሮ፥ እርሳሰ፥23ታማን ሜተቶናባት ኡባይ ታማን ጌያናዉ በሴስ። ሽን ታማን ሜተትያባት ጌሾ ሃን ጌያናዉ በሴስ።24ላፑን ጋላሳን ህንተ ማኡዋ ሜጭተ፤ ህንተና ጌሽተ። ሄሳፈ ጉየ፥ ጉታ ገልተ” ያግስ።ድእዳባ ሻከትዶሶና
25ጎዳይ ሙሰኮ፥26“ኔራ፥ ካህንያ አላዛራራነ እስራኤለ ማባራ ሀላቃት ድኤትዳ አሳነ መህያ ታይብተ።27ኦላ ብዳይሳታስነ ቦናይሳታስ ናምኡ ከስድ ሻክተ።28ኦላ ብዳይሳታ ግሹዋፐ አሰ ግድን ሚዝ ግድን ሀረ ግድን ዶርሰ ዎይኮ ዴሸ ግድን እቻሹ ፄታፐ እስኖ ጎዳስ እምተ።29ኤንታ ግሹዋፐ ኤክዳ ጎዳ እሞታ ካህንያ አላዛራስ እምተ።30ሀንኮ እስራኤለታ ጋክዳ ግሹዋፐ፥ አሰ ግድን ሚዝ ግድን ሀረ ግድን ዶርሰ ዎይኮ ዴሸ ግድን እሻታማፈ እስኖ ኤክድ ጎዳ ዱንካንያ አዋተን አይስያ ሌወታስ እምተ” ያግስ።31ሙሰይነ ካህነይ አላዛር ጎዳይ ኪትዳይሳዳ ኦዶሶና።32ኦላንቾት ባንታዉ ኤክን አትዳ ድኦይ 675,000 ዶርሳታ፥ 72,000 ሚዛታ፥ 61,000 ሀረታነ 32,000 ጌላኦ ማጫ ናይታ።36ኦላ ብዳይሳታ ጋክዳ ግሾይ 337,500 ዶርሳታ፤37ኤንታፈ ጎዳስ እመትዳይ 675.38ሚዛት 36,000፤ ኤንታፈ ጎዳስ እመትዳይ 72.39ሀረት 30,500፤ ኤንታፈ ጎዳስ እመትዳይ 61.40ማጫሳት 16,000፤ ኤንታፈ ጎዳስ እመትዳይ 32.41ጎዳይ ሙሰ ኪትዳይሳዳ ጎዳ እሞታ ካህንያ አላዛራስ እሚስ።42ኦላ ቦና እስራኤለ ማባራ ጋክዳ ግሾይ ኦላ ብዳ አሳ ግሹዋራ እስ ግና፤ እካ 337,500 ዶርሳታ፥ 36,000 ሚዛታ፥ 30,500 ሀረታነ 16,000 ጌላኦ ማጫ ናይታ።47እስራኤለ ማባራ ጋክዳ ግሹዋፐ እሻታሙ አሳፐነ መህያፐ እሶ እሶ ከስድ ጎዳይ እያ ኪትዳይሳዳ ጌሻ ዱንካንያ አዋተን አይስያ ሌወታስ እሚስ።48ሄሳፈ ጉየ፥ ቶራ ሞጮናት፥ ሻላቃትነ ማቶ ሀላቃት ሙሰኮ ሺቅድ፥49“ኑኒ ነ አይለት ኑ አዋተ ጋርሳን ደእያ ኦላንቾታ ታይብን እሶይካ ፓጭቤና።50ጎዳይ ኑ ሸምፑዋ አሽዳ ግሾ፥ ኑ እሶይ እሶይ ኤክዳ ዎርቃ አሌቆታ፥ ሳጋዮታ፥ ቶሆ አልቦታ፥ ምግዶታ፥ ሀይ ዎርቃታነ ቆ ዎርቃታ ጎዳስ እማናዉ ኤክድ ይዳ” ያግዶሶና።51ሙሰይነ ካህነይ አላዛር ዎርቃ አሌቆታ ኡባ ኤንታፈ ኤክዶሶና።52ሻላቃትነ ማቶ ሀላቃት ጎዳስ እምዳ ዎርቃይ ናምኡ ፄቱ ክሎ ግራመ ግድስ።53ሀንኮ ኦላንቾት ኤህዳ ድኡዋ ባንታዉ ኤክዶሶና።54ሙሰይነ ካህነይ አላዛር ሻላቃታፐነ ማቶ ሀላቃታፐ ኤክዳ ዎርቃ ጎዳ ስንን እስራኤለ አሳ ሀሳይስያባ ኦድ ጌሻ ዱንካንያ ግዶ ኤህዶሶና።