Di Řexřa23rif_lti
Balɛam ibarek Israil
1Xenni inna Balɛam i Balak: “Bna sebɛa n iɛalṭaren danita i necc uca sewjed ayi sebɛa n ifunasen imeẓyanen d sebɛa n icarriyyen.”2Balak igga am mammec d as inna Balɛam uca Balak d Balɛam qeddmen ijj n ufunas ameẓyan d ijj n icarri x kuř ijj n uɛalṭar.3Xenni Balɛam inna i Balak: “Bedd din zzat i tɣarṣt n wecmaḍ nnec, xenni necc ad raḥeɣ. Ad taɣ ad kidi imsagar SIDI uca mammec ma igga wawař nni d ayi ɣa isscen, necc ad ac t-i-dd-ssargbeɣ.” Xenni iruḥ Balɛam ɣar tqiccat d taqeccart n wedrar.4U immeřqa AREBBI ak-d Balɛam uca netta inna as: “Aqa sswejdeɣ sebɛa n iɛalṭaren uca qeddmeɣ ijj n ufunas ameẓyan d ijj n icarri x kuř ijj n uɛalṭar.”5Xenni igga SIDI ijj n wawař deg uqemmum n Balɛam uca inna: “Dweř ɣar Balak uca siweř akides ammu.”6Uca umi ɣares-dd idweř, xzar, ibedd zzat i tɣarṣt n wecmaḍ nnes, jmiɛ ak-d marra řḥukkam n Mu’ab.7Xenni ibda iqqar awař nnes iweznen, inna:“Zi Aram indeh ayi-dd Balak, ajeǧid n Mu’ab, zeg idurar n ccarq, inna: ‘As-dd, nɛeř ayi Yaɛqub, as-dd, zawar Israil!’8Maca mammec ɣa neɛřeɣ, wenni war ittwaneɛřen zi Arebbi, u mammec ɣa zawareɣ wenni war izawar SIDI?9Minzi zi tqiccat n tṣuḍar twařiɣ t, uca zi tiwririn xezzareɣ dayes. Aqa wa d ijj n řgens izeddɣen weḥḥdes u war iḥesseb ixef nnes jar řegnus.10Wi ɣa iḥesben acař n Yaɛqub niɣ wi i ɣa iḥesben řqedd n ijj n arbeɛ zi Israil? Ejj ad immet řeɛmar inu řmewt n imseggaden u ejj ɛawed ad yiři uneggar n tudart inu ad imqudda akides!”11Xenni inna Balak i Balɛam: “Min d ayi teggid? Necc iwyeɣ cek ḥima ad tneɛřed řɛedyan inu, maca xzar, aqa nican tbarked i-ten!”12Netta yarra-dd, inna: “Ma war ittxeṣṣi ad ḥḍiɣ maḥend ad ssiwřeɣ min igga SIDI deg uqemmum inu?”13Xenni inna Balak: “Ttzawgeɣ cek ad dd-tased akidi ɣar ijj n wemcan nneɣni zi manis ɣa tẓared řgens ɛawed. Ad tẓared ṭṭrufa nnes waha, war t tẓarred marra. Ssenni ad t tneɛřed di ṭṭweɛ inu!”14Uca yiwyi i-t ɣar řewḍa n Ṣufim x tqiccat n Fisja uca ibna din sebɛa n iɛalṭaren uca x kuř ijj n uɛalṭar iqeddem ijj n ufunas ameẓyan d ijj n icarri.15Netta inna i Balak: “Mařa cek ad tbedded da zzat i tɣarṣt nnec n wecmaḍ, xenni necc ad kis mmsagareɣ din.”16Uca imsagar SIDI ak-d Balɛam uca igga ijj n wawař deg uqemmum nnes, inna: “Dweř ɣar Balak uca ini as ammu.”17Uca netta yusa-dd ɣares, u xzar, netta tuɣa ibedd zzat i tɣarṣt n wecmaḍ nnes uca řḥukkam n Mu’ab bedden zzates. Inna as Balak: “Min inna SIDI?”18Xenni ibda netta awař nnes iweznen, inna:
“Kkar, Balak, sḥess! Seř ɣari, cek, mmis n Ṣiffur!19Arebbi war iǧi d mmis n bnadem, maḥend zeɛma ad issxarriq, niɣ d mmis n bnadem maḥend zeɛma ad t iřqef wendam. Ma ad yini uca war tt ittegg, niɣ ad issiweř uca war tt ittkemmiř?20Xzar, aqa ṭṭfeɣ řumur ḥima ad barkeɣ. Umi ibarek Netta, necc war zemmareɣ ad dd-arreɣ aya.21War ittwiři řmuɛṣiyyet n Yaɛqub u řeɣben n Israil war t iẓar. SIDI, AREBBI nnes, aqa-t akides uca asuḍi s wesruddeḥ di řbuq di ṭṭweɛ n Ujeǧid aqa-t dayes.22Arebbi issuffeɣ i-ten-dd zi Miṣra. Netta i nitni am waccawen iziraren n iɣayḍ n řexřa.23Aqa zeɛma war din aɛezzem di Yaɛqub u war din tagezzant di Israil. Ta d řweqt i di tᵉttwanna x Yaɛqub d Israil: ‘Aqa xzar, min igga Arebbi!’24Aqa da, řgens ad ikkar am teyradt u ad dd-igeɛɛed am weyrad. War issezzeř ixef nnes ař ɣa yecc taymart nnes uca ad issu idammen n min imezzeq.”25Xenni inna Balak i Balɛam: “Mařa xenni war texsed qaɛ ad t tneɛřed, war t ttbarak ca ɛawed.”26Balɛam yarra-dd, inna i Balak: “Ma war d ac nniɣ: ‘Marra min d ayi ɣa yini SIDI, ad t ggeɣ?’”27Xenni inna Balak i Balɛam: “Ttzawgeɣ cek ad dd-tased, ad cek awyeɣ ɣar ijj n wemcan nneɣni. Ad taɣ ad yiři nican di tiṭṭawin n AREBBI mařa ad t tneɛřed ssenni di ṭṭweɛ inu.”28Uca Balak indeh Balɛam ɣar tqiccat n Faɣur nni ixezzaren ɣar tnezruft.29Xenni inna Balɛam i Balak: “Bna danita sebɛa n iɛalṭaren uca sewjed ayi danita sebɛa n ifunasen imeẓyanen d sebɛa n icarriyyen.”30Balak igga am mammec d as inna Balɛam uca x kuř ijj n uɛalṭar iqeddem din ijj n ufunas ameẓyan d ijj n icarri.