DAGALENE23hui_png

1Balama ibugua Balagahondo lalu, Bo lomabu delaga dabu karia biaha. Biai howa nogo bulumaga wangabe kariabi nogo sibi wangabe kariabi haru ibalu bia, lene.2Balamahanda bia layadagua biai hene. Ani buwa Balama Balagala libu harume nogo bulumaga wangabebi nogo sibi wangabebi dabu mbira mbira biagoria ta howa bo lomabu delene.3Ani buwa Balama ibugua Balagahondo lalu, I̱na Anduane Homogo lola harabe hondole poro tagi í̠na í̠naga mbirale bo lomabu delarigoriani hondo habe. Ibugua mo walia harago damene bibahende langiai holebero, lene. Ani lalu ibugua hari hombene mbira wiagoria ibuni hangu pene.4Ogoriani pu hearia Ngode Datagaliwabe ibalu Balama lola hene. Ani lola hayagola Balama ibugua Ngode Datagaliwabehondo lalu, Lomabu delaga dabu karia biarunaga nogo bulumaga wangabebi nogo sibi wangabebi mbira dege dege karia bo delaru, lene.5Anduane Homogohanda ogodagua labe laya handala Balama ibu Balaga hearia lamule dai bini.6Dai buwa handalu hearia Balaga ibu mbirale bo delayagoria Moabali haguane biaru heba habe layagoria hearia hendene.7Balama ibugua mbiwia halu bi ogodagua lalu,
Moabalinaga Kini Balaga ibugua i̱ haru ibini ko.I̱ Siria dindini ni ibiragohayagi harini hewaria haru ibuwa lalu,I̱naga bi lahole íbu, lene.Isaraele wali agali ha habe laya, lene.8Ngode Datagaliwabe ibugua ha nahe ngagoha i̱na ha agua holiyabe.Anduane Homogohanda mo ko nahe ngagobi i̱na agua mo ko holiyabe.9Ege to̱le̱ daliga wiagoria howa i̱na ti de hendedo.Hari nene wiagoria howabi ti de hendedo.Wali agali hameigini ti habagi haga ka.Ti wali agali tara tara kagobi ndo ti mo bayaleore henego mandabi ka.10Isaraelenaga aguanene abalu ngaligobi nga.Isaraele wali agali dewaliore ti dagala mibe nahe ka.Ngode Datagaliwabenaga wali agali horo hamaro biagadagua i̱ hoa ho ko.Mini tigabi karume mo palia holeneyi homaradagua i̱ homolene hamelo ko,lalu, Balamahanda mbiwia halu lene.11Ani layagola Balagahanda Balamahondo lalu, Í̠na i̱hondo agi biribe. I̱ ogoria haru halu ibirugo i̱naga waitigi agali karu ha habelonaga haru ibirugo í̠na ani nabi howa ti baya helo mo bayale holene bi hangu larigoni, lene.12Ani layagola Balama ibugua ladai bialu lalu, I̱na Anduane Homogo ibuninaga bi la larago hangu labehe kogoni, lene.

Balama ibugua mbiwia halu mende henego ogo

13Balagahanda Balamahondo lalu, Isaraele wali agali dindi mendehayagi maru hangu karu handabeheni mbaliya íbu. Ogoriani howa ha habelo, lene.14Ani lowa ibugua Balama haru halu Sobimunaga dindi hari hombene Pisiga wiagoria haru pene. Ogorianibi bo lomabu delaga dabu karia buwa nogo bulumaga wangabebi nogo sibi wangabebi mbira mbira dege dege dabu biaru ta howa karia bo delene.15Balama ibugua Balagahondo lalu, Mbirale bo lomabu delarigoria hondo habe. I̱na Ngode Datagaliwabe lola hole naina porogo, lene.16Anduane Homogohanda Balama lola howa, Bi ogodagua labe, lalu, Ai Balaga karia lama dai bia, lene.17Balama ibu dai bialu hearia Balaga ibu mbirale bo lomabu delene biagoria Moabali haru haga maru heba hayagoriani ngadagua heneyane hendene. Balama daibiyagola Balaga ibugua, Anduane Homogohanda agua layabe, lalu hale hene.18Ani layagola Balamahanda mbiwia halu lalu,Sibo igini Balaga-o hale hole íbu.I̱na bi larogo hale hole íbu.19Ngode Datagaliwabe ibu ke̱ haga agali ale ndo ka.Ibu mini iriari biaga wali agali ale ndo kagoni.Ibugua mbirale mbira bule lo winigo biagaore.Ibugua bime laragola binidane handaga ka.20Ti bayale helo bi bayale labe i̱hondo laya.Ngode Datagaliwabe ibugua mo bayale henego i̱na mo beregedabe nahe.21I̱na de gandeba hondowa hondo bolangua halu koriaIsaraele ti mani holebiragoria ko mbira nahondolebira.Anduane Homogo tinaga Ngode Datagaliwabe ibu ti heba ka.Tigua lalu, Ibu inanaga Kini ka, lalu latagi haga.22Ngode Datagaliwabe ibugua ti Iyibi dindi howa haru tagira ibini.Ibugua nogo bulumaga gabuame hongo hagadagua Isaraelenaga wai bia hole hongo haga ka.23Isaraele baba wai bulenaga hubibi bulenebi dama ndilalu bolenebi nakarulapeore holebira.Wali agali tarame Isaraele hondowa lalu,Ngode Datagaliwabehanda bia hayada handadaba, lolebira.24Isaraele wali agali gabua laiono ale hongo gibihe ka.Laiono ibu abale ha̱lo nabiraga ka.Ibugua dére ale mbira balu lerelabaga buwabayagonaga mbirini darama heba nai haluore ha̱lo biraga ka,lalu Balamahanda mbiwia hene.25Ani layagola Balagahanda Balamahondo lalu, Ha nahole larigonigo ti mo bayale holeneyagi nalabe, lene.26Balama ibugua ladai bialu, Anduane Homogohanda bia larago ale biai hole larugo piganengi nalangiruyabe, lene.

Balama ibugua mbiwia halu tebone henego ogo

27Ani layagola Balagahanda Balamahondo lamialu lalu, Dindi teboneni howa agi larabe hondole mba íbu. Ngode Datagaliwabehanda í̠na dindi ogoriani howa ha haregola hale holebira badago, lene.28Ani lalu ibugua Balama haru halu Hari Peronaga neneni howa dindi ko iba dalu naibaga wiago handa gimbu bulene wiagoria haru pene.29Balama ibugua Balagahondo lalu, Bo lomabu delagane dabu karia biaha. Ani buwa nogo bulumaga wangabe karia nogo sibi wangabe karia lowa ogoria haru halu ibabe, lene.30Ani layagola Balaga ibugua Balamahanda layadagua bo lomabu delagane dabu karia biyagoria ta hai howa bo lomabu delene.
expand_more
Search