Read Naokɛa 23

Naokɛa23bqc_sim

Balaaũ yã́ sɛ̃́ia pↄ́ a è oa

¹Balaaũ ò Balakiɛ: Gbagbakĩi bomɛɛ la mɛ̀n sopla, ní mↄmɛɛ ń gáaeↄ mɛ̀n sopla ń sãsaↄ mɛ̀n sopla.²Balaki kɛ̀ lá Balaaũ òɛwa, ↄ̃ aa sa'ò ń gáaeↄ ń sãsaↄ gbagbakĩipiↄwa píi.³Ɔ̃ Balaaũ òɛ̀: Zɛ n sa'obↄi. Má gɛ́ mà gwa tó Dii a mↄ yã'omɛɛ, mí yã́ pↄ́ a omɛɛ onɛ. Ɔ̃ à gɛ̀ zɛ̀ gbɛ̀ misonawa.⁴Lua mↄ̀ aà lè, ↄ̃ Balaaũ òɛ̀: Ma gbagbakĩi bò mɛ̀n sopla, ↄ̃ ma sa'òmá píi ń gáaeↄ ń sãsaↄ.⁵Dii yãdàɛ̀, ↄ̃ à mɛ̀: Ɛa gɛ ǹ Balaki le, ní oɛ̀ màa.⁶Kɛ́ à ɛ̀a gɛ̀ aà lè zɛa a sa'obↄi ń Mↄabu kíaↄ píi,⁷ↄ̃ à yã́ pↄ́ á è ònɛ́ à mɛ̀:Mↄabuↄ kí Balaki ma sisi Sili bùsuu,ↄ̃ ma bↄ gukpɛ gbɛ̀sĩsĩↄ musu ma mↄ.À mɛ̀ mà bↄɛ Isailiↄ kpɛ,mà mↄ savãi'oɛ Yakↄbu buipiↄnɛ.⁸Kpelewa má gbɛ̃́ pↄ́ Lua i ń kaoↄ kai?Kpelewa má bↄ gbɛ̃́ pↄ́ Dii i bↄ ń kpɛoↄ kpɛi?⁹Za gbɛ̀ misonaa málɛ ń e,za gbɛ̀sĩsĩ musu málɛ wɛsińlɛ.Gbɛ̃́piↄ kua ńdoa,aa dodoa kↄ̃ɛ ń buipãleↄɛ.¹⁰Yakↄbu buiↄ dasi lán ũfãawa,wa fↄ̃ Isailiↄ nao wà ń lɛ́ dↄ̃o.Lua to mà ga a gbɛ̃́ↄ gaawa,mà láa an láaawa.¹¹Ɔ̃ Balaki òɛ̀: Ń kɛ̀mɛɛ kpelewan wei? Ma mↄnnↄ ǹ ma ibɛɛↄ kamɛɛ, ↄ̃ samaa ń ònɛ́a?¹²A wèwà à mɛ̀: Yã́ pↄ́ Dii dàmɛɛ ma lɛ́u ↄ̃ má oo lò?

Balaaũ yã́ plaade pↄ́ a è oa

¹³Balaki òɛ̀: Mↄ wà gɛ́ gupãlei, gu pↄ́ ńyↄ̃ ń eu, ní ń kámɛɛ we, asa an kpɛdo ń è, ni ń e píio.¹⁴Ɔ̃ à gɛ̀aànↄ gudↄ̃anaↄ bua Pisiga gbɛ musu. À gbagbakĩi bò mɛ̀n sopla, ↄ̃ à sa'òmá píi ń gáaeo ń sãsao.¹⁵Ɔ̃ Balaaũ òɛ̀: Zɛ n sa'obↄi la, mí gɛ Dii le we mà gwa.¹⁶Ɔ̃ Dii mↄ̀ à yãdàɛ̀, ↄ̃ a òɛ̀: Ɛa gɛ ǹ Balaki le, ní oɛ̀ màa.¹⁷Ɔ̃ à ɛ̀a gɛ̀ à aà lè zɛa a sa'obↄi ń Mↄabu kíaↄ. Balaki aà là à mɛ̀: Dii mɛ̀ kpelewa ni?¹⁸Ɔ̃ à yã́ pↄ́ á è ònɛ́ à mɛ̀:Zipoo nɛ́ Balaki,swã́kpa ǹ ma yãma!¹⁹Luaá gbɛ̃nazĩnaɛ kɛ́ aà gbasa ɛɛtoo,ìli lɛlilɛ lán gbɛ̃nazĩnawao.Ìli yã́ pↄ́ á ò kɛo lé?Ìli zĩkɛ lɛ́ pↄ́ á gbɛ̃̀wao lé?²⁰A òmɛɛ mà samaa'onɛ́ɛ.À báaadàńguɛ, má fↄ̃ gio.²¹Mi yã'ĩae e Yakↄbu buiↄwao,mi yã'ↄ̃mae e Isailiↄwao.Dii an Lua kúńnↄ,Kía kúkua dↄ ń guu.²²Lua ń bↄ́lɛ Egipi,aa gbãa vĩ lán zùsɛ̃lɛwa.²³Wa fↄ̃ pↄda Yakↄbu buiↄwao,wa fↄ̃ àsi bɛ̃̀ɛ kpaaĩ ń Isailiↄo.Za gbã waↄ o ń yã́ musu,yã́ pↄ́ Lua kɛ̀n we.²⁴Buipi ì fɛlɛ lán nↄ̀ↄmusuwa,ì azĩa sɛ lán gbɛaanawa.Ìli wúlɛo e à gɛ pↄ́ kũ soò,e à gɛ pↄ́ pↄ́ a dɛ̀ↄ au miò.²⁵Balaki òɛ̀: Ńsu ǹ ń kao. Ńsu samaa'onɛ́ sↄ̃o.²⁶Balaaũ òɛ̀: Mi onɛ yã́ pↄ́ Dii dàmɛɛ ↄ̃ má oo lé?

Balaaũ yã́ àaↄ̃de pↄ́ a è oa

²⁷Balaki ò Balaaũɛ: Mↄ, má gɛnnↄ gupãleiɛ sa. Wìliↄ dↄ̃o tó a maa Luaɛ ǹ gbɛ̃́piↄ kamɛɛ we sa.²⁸Ɔ̃ Balaki gɛ̀aànↄ Peoo gbɛ musu bↄaa ń guwaiwaio.²⁹Balaaũ òɛ̀: Gbagbakĩi bomɛɛ la mɛ̀n sopla, ní mↄmɛɛ ń gáaeↄ mɛ̀n sopla ń sãsaↄ mɛ̀n sopla.³⁰Balaki kɛ̀ lá a òɛwa, à sa'òmá ń gáaepiↄ ń sãsapiↄ.

Naokɛa 23 / bqc_sim

Balaaũ yã́ sɛ̃́ia pↄ́ a è oa

Balaaũ yã́ plaade pↄ́ a è oa

Balaaũ yã́ àaↄ̃de pↄ́ a è oa

Naokɛa23bqc_sim