አራዳ ፆነተ
1ካናነ ቢታን፥ ነገበ መላ ቢታን ደእያ አራዳ ካዎይ፥ እስራኤለ አሳይ አታርማ ኤፍያ ኦግያራ የይሳ ስእዳ ዎደ እስራኤለ አሳራ ኦለትድ ኤንታፈ ጉ አሳ ድእዶሶና።2ሄ ዎደ እስራኤለ አሳይ፥ “ኔኒ ሀ አሳ ኑ ኩሸን አዳ እምኮ፥ ኑኒ ኤንታነ ኤንታ ካታማታ ኩመ ይሳና” ያግድ ጎዳስ ቃንግዶሶና።3ጎዳይ እስራኤለ አሳ ዎሳ ስእድ፥ ካናነታ ኤንታ ኩሸን አድ እምን፥ ኤንቲ ካናነታነ ኤንታ ካታማታ ኩመ ይስዶሶና። ሄሳ ግሾ፥ ሄ በሳይ ሆርማጌተትድ ሱንትስ።ናሰ ብራታፐ ኦሰትዳ ሾሹ
4እስራኤለ አሳይ ሆራ ዙማፐ ደንድድ፥ ኤዶመ ቢታ ዩሹዋራ ባናዉ ዞኦ አባኮ ኤፍያ ኦግያራ ብዶሶና፤ ሽን ኦገ ቦላ አሳስ ዳንዳአይ ዉርስ።5አሳይ፥ “ኑኒ መላ ቢታ ሀይቃና መላ ግብፀፈ ኑና አይስ ከስደቲ? ካ ባዋ፤ ሃ ባዋ፤ ሀ ኢታ ካይ ኑና ሻትስ” ያግድ ፆሳ ቦላነ ሙሰ ቦላ ዙዙምዶሶና።6ያትን፥ ጎዳይ አሳ ግዶ ማርዘራ ደእያ ሾሽ የድን፥ እስራኤለ አሳፐ ዳሮት ዱከትድ ሀይቅዶሶና።7አሳይ ሙሰኮ ይድ፥ “ኑኒ ጎዳ ቦላነ ነ ቦላ ዙዙምድ፥ ናጋራ ኦዳ። ጎዳይ ሀ ሾሻታ ኑፐ ሃሳና መላ ኑስ ዎሳርክ” ያግዶሶና። ያትን፥ ሙሰይ አሳ ግሾ ዎስስ።8ሄ ዎደ ጎዳይ ሙሰኮ፥ “ናሰ ብራታፐ ሾሽ መዳ፥ ኤንታ ስንን ም ቦላ ካቃ፤ ሾሻን ዱከትዳ ኦንካ እያ በእኮ ፓፃና” ያግስ።9ያትን፥ ሙሰይ ናሰ ብራታፐ ሾሽ መድ፥ ም ቦላ ካቅስ። ሾሻን ዱከትዳ አሳ ኡባይ ናሰ ብራታ ሾሻ በእድ ፓፅዶሶና።ሆራ ዙማፐ ሞአበ ጋካናዉ
10እስራኤለ አሳይ ሆራፐ ደንድድ ኦቦታ ጌተትያ በሳን ዱንካንዶሶና።11ኦቦታፐ ደንድድ፥ ሞአበፐ ስን ባጋን ደእያ መላ ቢታን፥ ዶሎሀ ባጋን አባሪማን ዱንካንዶሶና።12ያፐ ደንድድ፥ ዛሬዳ ዛንጋራን ዱንካንዶሶና።13ያፐ ደንድድ፥ አሞረታ ቢታ ጋፃ ጋካናዉ ደእያ መላ ቢታን አርኖና ሻፋፐ ሄፍንን ዱንካንዶሶና። አርኖና ሻፋይ ሞአበ ቢታስነ አሞረ ቢታስ ግዶን ደእያ ዛዋ።14ሄሳ ግሾ፥ ጎዳ ኦላ ታርክያ ኦድያ ማፃፋን፥ “ሱፋ ሄራን ደእያ ዋሄባ ካታማነ አርኖና ሻፋ ዛንጋራ፥15ኤራ ካታማነ ሞአበ ቢታ ዛዋ ጋካናዉ ደእያ ዛንጋራ” ያገትድ ፃፈትስ።16ኤንቲ ያፐ ደንድድ፥ ጎዳይ ሙሰኮ፥ “አሳ ሺሻ፤ ታ ኤንታዉ ሃ እማና” ያግድ ኦድዳ ቤራ ጌተትያ ሃ ኦላኮ ብዶሶና።17ሄ ዎደ እስራኤለ አሳይ ሀ ማዝሙርያ የፅዶሶና።“ሃ ኦላዉ፥ ፑልታ፤ህንተካ የፅተ።18ሀላቃት ቦክዳ ሃ ኦላስ፥ካለይሳት ካዎተ ፃምአንነ ባንታ ፃምአንቦክዳ ሃ ኦላስ የፅተ” ያግስ።ኤንቲ ሄ መላ ቢታፈ ደንድድ ማታና ጌተትያ በሳ ብዶሶና።19ማታናፐ ናህልኤላ፥ ናሀልኤላፐ ባሞታ ጌተትያ በሳ ብዶሶና።20ባሞታፐ ደንድድ፥ ሞአበን ደእያ ዛንጋራ ብዶሶና፤ ሄ ዛንጋራይ ፕስጋ ዙማፐ ጋርሳን ባዙዋ ግናን ደኤስ።ስሆናነ ኦገ ፆነተ
21ሄሳፈ ጉየ፥ እስራኤለ አሳይ አሞረ ካዋ ስሆነኮ ሀይሳዳ ያግድ ኪታ የድዶሶና።22“ሀያና፥ ኑ ነ ቢታራ ካንድ አና መላ ኦርክ፤ ኑኒ ኦገፐ ጋፃ ከዮኮ፤ ነ ጎሻ ዎይኮ ዎይነ ጋደ ግዶ ገሎኮ፤ ኑኒ ሃ ኦላፈ ሃ ኡዮኮ። ኑኒ ነ ቢታራ ካንድ አና ጋካናዉ ሀድርስ ዎይኮ ኡሻች ጎኮ” ያግስ።23ስሆነይ እስራኤለ አሳይ ባ ቢታራ ካንና መላ ድግስ። እ ባ ኦላንቾታ ኡባ ሺሽድ፥ እስራኤለ አሳ ኦላናዉ መላ ቢታ ብስ፤ ያሃፃ ጌተትያ በሳ ብድ እስራኤለ አሳራ ኦለትስ።24እስራኤለ አሳይ ኦላን አሞረታፐ ዳሮታ ማሻን ዎድ፥ አርኖና ሻፋፐ ዶምድ፥ አሞነታ ዛዋን ደእያ ያቦቃ ሻፋ ጋካናዉ ኦይክስ። አሞነ አሳ ቢታ ዛዋይ ግምበትድ ደእያ ግሾ፥ ኤንቲ ያ ገልቦኮና።25እስራኤለ አሳይ አሞረታ፥ ሀሰቦናነ እያ ዩሹዋን ደእያ ካታማታ ኡባ ፆን ኤክድ ያን ኡትዶሶና።26ሀሰቦና ካታማይ አሞረታ ካዋ ስሆነ ኡትያ ካታማ። ስሆነይ ካሰ ሞአበ ቢታ ካዋ ኦልድ፥ አርኖና ሻፋ ጋካናዉ ደእያ ቢታ ኡባ ኤክስ።27ሄሳ ግሾ፥ ሌምሶን ሀይሳዳ ያግዶሶና፤“ሀሰቦናኮ ሃይተ፤ሀ ካታማይ ዛሪድ ኬፀቶ፤ስሆነ ካታማይካሰ ባ በሳ ስሞ።28ታም ሀሰቦናፐ ከይስ፤ላጮይ ስሆና ካታማን በንትስ፤ሞአበን ደእያ ኤራ ይስስ፤አርኖና ቃ በሳታ ምስ።29ሞአበ፥ ነና አየ!ካሞሻ አሳይ ይደታ።ህንተ አደ ናይት ባቃታናዳ፥ህንተ ማጫ ናይት ድኤታናዳ፥አሞረታ ካዋ ስሆነስ እሚስ።30ኑኒ ህንተ ኮቻታ ሀሰቦናፐ ዶምድ፥ድቦና ጋካናዉ ኩመ ይስዳ።መደባ ማታን ደእያ ኖፋ ጋካናዉደእያ ኡባ ታም ይስስ” ያግዶሶና።31ያትድ፥ እስራኤለ አሳይ አሞረታ ቢታን ደእዶሶና።32ቃስ ሙሰይ ዎቸይሳታ ያእዜራ ካታማ የድን፥ እስራኤለ አሳይ ሄ ካታማነ እያ ሄራን ደእያ ጉ ካታማታ ኦይክድ፥ ያን ደእያ አሞረታ ከስድ ጎድዶሶና።33ሄሳፈ ጉየ፥ እስራኤለ አሳይ ስሚድ፥ ባሳነ ኤፍያ ኦግያራ ከይዶሶና። ባሳነ ካዎይ ኦገይ ባ ኦላንቾታራ ኤድራአ ካታማን ኤንታራ ኦለታናዉ ከይስ።34ሽን ጎዳይ ሙሰኮ፥ “ሀ ኡራስ ባቦፋ፤ ህዛ፥ ካዋ ኦገ፥ እያ አሳነ እያ ቢታ ኡባ ነ ኩሸን አዳ እማስ። ሀሰቦናን ኡትድ ሃርዳ አሞረታ ካዋ ስሆነ ቦላ ኦይሳዳ ኔኒ እያ ቦላ ኦና” ያግስ።35ሄሳ ግሾ፥ እስራኤለ አሳይ ኦገ፥ እያ ናይታነ እያ አሳ ኡባ እሶይ አቶና ዎድ እያ ቢታ ላትዶሶና።