Nehemiyaxi9hch_wb2

'Ixaheritsixi kememɨteyetua 'axakememɨte'uyuri

1Xeitewiyari heimana nauka tukariyaritsie mɨkɨ metseriyaritsie mekaniuyukuxeɨrieni 'ixaheritsixi meyuhakienike, hiwerika kamixayari mekananakatɨxɨani meta naxi yumu'utsie meneutiwiwiexɨani.2Teewatari wahetsɨari me'ayekɨneka meniuyutihekɨata 'axakememɨte'uyuri yumɨireme wahɨxie meta watewarima ke'axamemɨte'uyuri,3hikɨ yamekaniutiyuani yuhetsie mekatenahɨani. Haika hurayari mekaniuyurieni 'inɨari niukiyari meterɨwatɨ Yawé yukakaɨyari hetsɨa mieme, meta haika hurayari mekaniyuhekɨatakaitɨni ke'axamemɨte'uyuri, 'imatɨrieka hɨxiena mekaniukahɨxima'uni.4Hikɨ rewitsixi Ketsuha, Wanihi, Karimieri, Tsewaniyaxi, Wuni, Tserewiyaxi, Wahani meta Kenani wapaitɨ mekaneuti'uni karima mekaniuyutanenewieni Yawé Kakaɨyari mehahɨawetɨ.5Rewitsixi Ketsuha, Karimieri, Wanihi, Katsawiniyaxi, Tserewiyaxi, Huriyaxi, Tsewaniyaxi meta Petahiyaxi mɨpaɨ mekaniutiyuani karima:«Hikɨmɨtɨka, Yawé hetsiemieme 'aixɨa xekeneutiyua takakaɨyarihikɨ mɨtiyehane meta yareuyuhanemekɨ.'Aixɨa peke'itɨarieka Tati'aitɨwame.Pekenɨawarieka witsikepemɨ'ane kepemɨtitewa,'aixɨa pɨ'ane pemɨnɨawarieka 'aixɨa pemɨ'itɨariekakɨ.
6»'Ekɨ xeikɨa Yawé pepɨhɨkɨ.'Ekɨ muyuawi peputawewi,naime muyuawi kemɨyewaxurawetsixi warexeiyakame.'Ekɨ tukari pepɨwapitɨa tita pemɨtiutawewi:kwie meta haramarayunaime mana memɨtexuawe.'Ayumieme xurawetsixi muyuawitsie miemete 'ahɨxie mepukahɨxima'uwe.
7»'Ekɨ, Yawé meta Kakaɨyari,'Apɨrami pemanayexei pepɨhɨkɨ.'Ekɨ 'Uxi karireutsixi wakwieyaritsie paitɨ pepiyewitɨ,'Apɨrahami pepɨtiterɨwaxɨ.8Hetsiena pepikaxei 'iyari heitserie yamɨtikamie'ayumieme tɨratu hamatɨana pepuwewi.Mɨpaɨ pepɨtitahɨawixɨ kename nuiwarimamakananeutsixi wakwie pewayetuirienikekai,meta 'etitsixi, 'amuxeutsixi meta peretseutsixi,kewutseutsixi, keriketseutsixi wakwie.Pepɨraye'atɨa kepemutayɨheitseriemekɨ yapemɨtikamie pemɨhɨkɨkɨ.
9»'Ekipitu tatewarima wa'uximatɨarika pepu'eni,Haramara Mɨxeta 'aurie kememɨteyuhiweriekai pepuwaru'eni.10Mariweme pepɨtiuyuri waɨkawamexɨaParahuni hetsɨa, 'iparewiwametemama meta yunaitɨ teɨteri,penieretɨ kememɨtewananaimakai'ateɨterima kememɨwayuriekai.Mɨpaɨ petiuyuriekuhikɨ pepukuxaxatsiwa naitsarie.11Wahɨxie haramara pepanutayepi,mepanukɨ 'ayewakikaku.Peru memɨwaruweiyakaiharamara 'ameukatewatsie pepɨwareukaxɨri,tetexi wahepaɨ tetɨata paitɨ.12Haiwitɨri 'a'uwemekɨ pepɨwaruwitɨximekai tukarikɨ,tai 'a'uwemekɨ tɨkarikɨ pepɨwaruwitɨximekai:memuhunikɨ wahuye pepɨhekɨariwiekai.
13»Tsinahi hɨriyaritsie pepunua,muyuawitsie paitɨ pepuwarutahɨawixɨ.Ketitamɨtiheitserie pepɨtiwarutaxatɨa meta 'inɨari niukiyari yuri maine,'aitsika 'aixɨa mɨ'anene.14Pepɨwarutaxatɨa Xawati tukariyari mɨpatsie,Muitsexi ti'a'uximayatsiriwame mɨhɨkɨtɨkaitsie'aitsika 'inɨari niukiyari pepɨwayetuiri.
15»Meheuhaakakwikukaku paa muyuawitsie miemekɨ pepɨwarutihuxaitɨa,meheuharikukaku pepɨwaruharitɨa haa 'aitsie mieme.Kwie pepɨwayetuiripemɨwayetuirienikekai pemainekai.16Tatewarima ta'ukiyarima mepuyuta'ɨrixɨ,yamemɨtekakɨne mepɨka'uyuwaɨri 'a'aitsika hetsie.17Mematsi'enienike mepɨkayuwaɨri,mariweme kepemɨtiuyuriwahetsiemieme mepɨkahaye'eri.Waɨkawa mepɨtsetse'ikai meta mepɨkaheu'enanakai'atsita xeime mepanuyeyemuwarakunuitɨanikɨ 'Ekipituwaɨriyarika memɨteha'uximayakaitsie.Peru 'ekɨ pepɨkawaruku'eiriKakaɨyari pemɨtareuyehɨwirie pemɨhɨkɨkɨ,pemɨtiuyukakwewimɨkɨ meta pemɨtiuyukanenimaya,haxɨakɨ pekayumexɨitɨatɨ, peru waɨkawa petiuyukanaki'erietɨ.
18»Tsepa tsikeru memutawewitepɨakɨ wewiyakame,mɨpaɨ memutiyua: “'Ikɨ kani'akakaɨyaritɨni'Ekipitu matsiyewitɨ”,tsepa yemekɨ kwinimieme'ahɨxie 'axamemɨte'uyuri,19'ekɨ pepɨkawaruku'eiri makumawetsie'ekɨ kwinimieme pemɨtiuyukanenimayakɨ.»Hatsuaku pɨkawaruku'eiri hai 'amuwekaitukarikɨ mɨwaruwitɨximekai huyeta,meta pɨkatiuhayewaxɨ wahekɨariwiyatɨ tai 'a'uwemekɨtɨkarikɨ mɨwa'inɨaritɨkai kememɨteheuyune.
20»'A'iyari 'aixɨa mɨ'anekɨ memɨtemaiwawenikɨ pepɨwarupitɨa.Manana pepɨkawarunawairi me'ikwakaku,haa pepɨwaruharitɨa memɨkaheuharikunikɨ.21Huta tewiyari wiyari makumawetsie pepɨtiwamikwakai.Tixaɨtɨ reuyewetɨ pɨkaratɨa wahetsiemieme.Wakamixate pɨka'utitsanixɨmeta wa'ɨkate pɨka'utihai.
22»Pepɨwayetuiri te'aitamete meta kiekari,yuxexuime kwie pepɨwaruxatɨa.Te'aitamete mepɨwara'iwaxɨ 'Uhuki meta Tsikuni,memɨte'aitakai Hetsiwuni kwieyaritsie meta Watsani kwieyaritsie.23Waniwema pepɨwarutimɨiriyaxɨxurawetsixi muyuawitsie miemete wahepaɨ,kwietsie pepɨwa'atɨawatewarima pemɨwaraxaxatɨwakaitsie.24Waniwema mɨkɨ kwieyaritsie mepu'axɨa.Wahɨxie pepɨtiwaruta'aitɨa kananeutsixi mana memu'uwakai,te'aitamete pepɨwayetuiri meta teɨteri mana kiekatari,kemɨtiwanake wahetsie yamemɨteyurienikɨ.25Kiekarite kuraruyari 'amatitetewa mepɨwara'iwaxɨ metakwie 'aixɨa mɨ'anene,kiite yukii mepayeitɨaxɨa piinitɨarika tihɨpɨneme,meta putsute muyewawaki, kaxie haraweriyarite meta huriwu,metatsiere waɨkawa 'iteɨrite 'ikwaxi mɨrexeiyatɨka.Meteniutikwani meta meniutihuxani metatsiere meniutiwaiyata,mepɨteha'inɨataxɨ waɨkawa ke'aixɨa pemɨwaruyuri.
26»Peru mekaheu'enanatɨ mepakɨ:menetsi'aye'unietɨ mepakɨ,'a'aitsika meputixani'eri,'aniukamete 'ahetsɨa miemete mepɨwarukwimemɨwa'iniekai memɨ'axɨanikɨ 'ahetsɨa,yemekɨ 'ahɨxie 'axamepɨte'uyuri.27'Ayumieme memɨwaraye'unie hetsɨa pepɨwayetua,mɨkɨta mekaniwaru'uximatɨani.'Uximatɨarikatsata memanahiwiwakaitɨni,muyuawitsie paitɨ peniwaru'enieni,pemɨtiuyukakwewimɨkɨkɨ pekaniwareyenɨ'ani memɨwatawikweitsitɨanimemɨwaxɨnakɨ memɨwaraye'unie wahetsɨa.28Peru kepauka memuxɨnarie,yaxeikɨatsiere mepɨteyuriekai,'ekɨta pepɨwayetuayakai memɨwaraye'unie wahetsɨa,mɨkɨ mekateniwaruta'aitɨwakaitɨni.Hekwamekɨ mekameniutahiwiwakaitɨni pemɨwaparewienikɨ,hikɨ muyuawitsie paitɨ pekaniwaku'eniwakaitɨni.Waɨkawa pemɨwanaki'eriekaikɨmɨixa peniwarutawikweitsitɨani.29Pepɨwaraye'eritɨa 'a'inɨari niukiyaritsie memanuaxɨanikɨ,peru mɨkɨ mepuyuta'ɨrixɨmeta 'a'aitsikatsie yamepɨkatekakɨ.'Axamepɨte'uyuri 'a'aitsikate hepaɨtsita,tukari mɨtiyupitɨwa kemɨ'ane meye'atɨwa.Mekaheu'enanatɨ mepɨmatsi'uku'eiri,metsetse'itɨ mepayuyeitɨa meta mepɨkayuwaɨri memɨmatsi'enieni.
30»Mɨixa wiyari pepɨwanewiekai,'a'iyarikɨ pepɨwaraye'eritɨwakai'aniukamete yame'utiyuanekaku,peru mɨkɨ mepɨka'u'enana.'Ayumieme pepɨwayetua mɨkɨkwieyaritsie memɨtama wahetsɨa.31Peru 'ekɨ, waɨkawa pemɨtiuyukanenimayakɨpepɨkawarukwi meta pepɨkawaruku'eiri,Kakaɨyari 'aixɨa pemɨtiuka'iyari meta pemɨti'akanenimaya.
32»Hikɨta, takakaɨyari,Kakaɨyari pemɨmariwe, pemɨmakaxiwa meta pemɨtɨrɨkaɨye,tɨratu pemaye'atɨwa meta yapepɨtikamie,'etsiwa tiuyɨme pepɨka'erieka kememɨte'ukwinitɨarie,tate'aitɨwamete,kuwexinaruritsixi, mawari wewiwamete meta 'aniukamete,ta'ukiyarima meta teyunaitɨ 'ateɨteri,te'aitamete 'Atsiriya kiekatari memɨtatsi'a'iwaxɨtsietɨtɨ 'atsita hikɨ.33'Ekɨ heitserie pepɨtiyurienekaitame kemɨtatiuyuri,'ekɨ yapepɨtikatɨa.Tame 'apɨta 'axatepɨte'uyuri.34Tate'aitɨwamete meta kuwexinaruritsixi,tamawari wewiwamete meta tatewarima,'a'inɨari niukiyaritsie yamepɨkatekakɨmeta mepɨka'i'eni 'a'aitsikatemetatsiere kepemɨtiwaraye'eritɨwakai.35Mɨkɨ, kepauka memɨte'aitakai,mepɨka'uyuwaɨri memɨmetsi'ayexeiyanimeta mepɨka'uyuwaɨri 'axakememɨteyuriekai memuku'eirienikɨ,tsepa waɨkawa petiwarumikutɨtɨmeta kwie pewayetuirieku 'ayeukame tiuxuaweriweme.
36»'Ayumieme hikɨ waɨriyarika te'uximayatamete tepɨhɨkɨ,waɨriyarika te'uximayatamete 'ikɨ kwieyaritsiepemɨwayetuiritsie tatewarimamana timieme 'ikwaxi memɨtekwakakɨ meta memɨte'ukaxexeiyanikɨ.37Waɨkawa kemɨtiutixuxuawere hikɨ te'aitamete wahetsiemieme katinihɨkɨtɨni'axatemɨte'uyurikɨ tahetsie pemɨwarupitɨa.Tɨrɨkariya memexeiyakɨ, kemɨtiwanake mepɨtatsiyurietame meta tatewama.Waɨkawa tepu'uximatɨarie.38»Naimekɨ mɨkɨkɨ, tame tɨratu tepɨwewieni meta tepɨte'aka'utɨani, kuwexinaruritsixi, rewitsixi meta mawari wewiwamete mepitseyumani».
expand_more
Search