ናህመ ቦላ መትዳ እፆ
1ሳንባላፅ፥ ፆበይ፥ አራበ ቢታ አስ ግድዳ ጌሳመይነ ሀንኮ ኑ ሞርከት ኑኒ ግምብያ ኦድ ፖልዳይሳነ ዶያ በሲ ባይናይሳ ስእዶሶና። ግዶሽን፥ ታ ግምበ ፐንገታስ ሳንቃ አብከ።2ሳንባላፅነ ጌሳመይ፥ “ኦኖ ደምባን ደእያ ጉታታፐ እሱዋን ያዳ ኑራ ጋሄታ” ያግድ ኪታ የድዶሶና። ሄስ ኤንቲ ታና ቆሀናዉ ማቅዳ ማቆ።3ታኒ ኤንታዉ፥ “ታዉ ግታ ኦሶይ ደእያ ግሾ ሄሳ አጋዳ ህንተ ግዳ በሳ ባናዉ ዳንዳእከ። ታኒ ያ ብን፥ ኦሶይ አይስ በቲ?” ያጋዳ ዛራስ።4ሄ ኪታ ዛር ዛር ኦይዱ ቶሆ ኪትዶሶና፤ ሽን ታኒ እስ ቆሞ ዛሮ ኤንታዉ እማስ።5እቻሻን ሳንባላፅ ባ አይለታፐ እሱዋ ዶያ ደእያ ዳብዳበ ኦይድ ታኮ ኪትስ። ዳብዳበይ ሀይሳዳ ያግድ ፃፈትስ፤6“ኔንነ ነ ኮቸ ግድዳ አይሁደት ማካላናዉ ቆፕዳይሳነ ሄሳ ጋሶን ግምብያ ግምበይሳ ሾሮ ቢታን ደእያ አሳ ኡባይ ኦደተይሳ ጌሳመይ ታዉ ኦድስ። ቃስ ኔኒ ነና ካዎ ከሳናዉ ኮየይሳነ7ኔኒ ይሁዳ ካዎ ግደይሳ የሩሳላመን አዋጃና መላ ናበ ዎዳይሳ ታዉ ኦድስ። ሀ ዎርያ ካዎይ ስአናይስ አተና። ሄሳ ግሾ፥ ታራ ጋሄታዳ ዞረታናዉ ሃያ” ያጌስ።8ታኒ፥ “ሀ ኔኒ ግያ ኦዳ ኡባይ ቱማ ግዶናባነ ነ ኔፐ መዳባ” ያጋዳ ዛራስ።9ኑ ኦያ ኦሶይ ፖለቶና መላ፥ “ኤንታ ኩሸይ አርጋጫና፤ ኦሶይካ ፖለቶና ኤቅ አታና” ያግድ ኑና ያሽሳናዉ ቆፕዶሶና። ሽን ታኒ፥ “ፆሳዉ፥ ሀእ ታ ኩሽያ ምን” ያጋዳ ዎሳስ።10ታኒ እስ ጋላስ ሶፐ ከዮና መላ ጎርድ ዎዳ ማሄፃቤላ ናኣ ናኣ ዳላያ ናኣ ሻማያኮ ባስ። እ ታኮ፥ “ቃማ ይድ ኤንቲ ነና ዎናዉ ዳንዳእያ ግሾ ኔራ ታራ ፆሳ ኬ ገልድ፥ ፐንግያ ጎርድድ ቆሰታና” ያግስ።11ሽን ታኒ፥ “ታ መላ አስ ያይድ ቆሰቲ? ዎይኮ ታና ዳንያ አስ ባ ሸምፑዋ አሻናዉ ፆሳ ኬ ገሊ? ታ ሄሳ ሀንከ” ያጋስ።12ታ ቆፓ በእያ ዎደ ሻማየይ ፆሳይ ኪትዳ ናበ ግዶናሽን ፆበይነ ሳንባላፅ እያ ሚሸን ሻምድ የድን ታ ቦላ ዎርዶ ትንብተ ኦደይሳ አኬካስ።13እ ሚሸን ሻመትዳ ጋሶይ ታና ያሽሳናሳ፤ ታ ሄሳ ኦዳ ናጋራን ገላና መላነ ታና ቦርስያባ ደምድ ታና ካዉሻናሳ።14ታኒ፥ “ታ ፆሳዉ፥ ፆበይነ ሳንባላፅ ኦዳባ ኡባ በአ። ኖኣዶ ጌተትያ ማጫ ናብያነ ሀራ ዎርዶ ናበት ታና ያሽሳናዉ ኦዳባ ኡባ በአ” ያጋዳ ዎሳስ።15ግምበ ኦሶይ ዶመትን እሻታማነ ናምኡ ጋላሳፐ ጉየ ኤሉለ ጌተትያ አጌናን ላታማነ እቻሻን ጋላሳን ኦሶይ ፖለትስ።16ኑ ዩሹዋን ደእያ ካዎተታን ደእያ ኑ ሞርከት ሄሳ ስእዳ ዎደ ያይዶሶናነ ዬላትዶሶና። አይስ ጊኮ፥ ኦሶይ ኑ ፆሳ ማደን ፖለትዳይሳ አኬክዶሶና።17ሄ ዎደ ይሁዳ ሹማት ፆቢያስ ዳብዳበ ፃፍሸ ጋምእዶሶና፤ እካ ኤንታዉ ዛርሸ ጋምእስ።18ኤራ ናአይ ሳካን፥ ፆቢያ ቦሎ ግድያ ግሾነ እያ ናአይ ዮሃናን ባራካ ናኣ ማሱላማ ናእዉ ኤክዳ ግሾ፥ አይሁደታፐ ዳሮት እያራ ጫቅድ ደኦሶና።19ሄ አሳት ፆበይ ኦዳ ሎኦባ ኡባ ታ ስንን ናሽድ ሃሳዮሶና፤ ታኒ ግያባ እያዉ ኦዶሶና። ሄሳ ግሾ፥ ፆበይ ኡባ ዎደ ታና ያሽሳናዉ ዳብዳበ ፃፎ አግቤና።