Read نَاحَامْيَا 10

نَاحَامْيَا10rif_ati

ڒْعَاهْذْ ذ ثْمَارْسِيوْثْ ن ؤُشمّعْ

¹”خْ قَاعْ مَانْ أَيَا أَذْ نڭّْ إِجّْ ن ڒْعَاهْذْ إِمْثنْ ؤُشَا أَذْ ث نْزمّمْ ذِي ثِيرَا ؤُشَا ڒْحُوكَّامْ نّغْ، إِلَاوِييّنْ نّغْ ذ إِكهَّاننْ نّغْ أَذْ خَاسْ ڭّنْ أَشمِّيعْ.“²إِنِّي خَاسْ إِڭِّينْ أَشمِّيعْ ذ إِنَا: نَاحَامْيَا، ونِّي ذ لْوَالِي أَمقّْرَانْ، مِّيسْ ن حَاكَالْيَا، ذ صِيذْقِييَا،³سَارَايَا، عَازَارْيَا، إِرْمِييَا،⁴فَاشْحُورْ، أَمَارْيَا، مَالْكِييَا،⁵حَاتُّوشْ، شَابَانْيَا، مَالُّوخْ،⁶حَارِيمْ، مَارِيمُوثْ، عُوبَاذْيَا،⁷ذَانِييَالْ، جِينِّيثُونْ، بَارُوخْ،⁸مَاشُولَّامْ، أَبِييَا، مِييَامِينْ،⁹مَاعَازْيَا، بِيلْجَايْ ذ شَامْعِييَا. إِنَا ثُوغَا أَثنْ ذ إِكهَّاننْ.¹⁰ؤُشَا إِلَاوِييّنْ: يشُوعَا، مِّيسْ ن أَزَانْيَا، ذ بِينَّايْ. زڭْ أَيْثْ ن حِينَاذَاذْ، قَاذْمِييِيلْ.¹¹ؤُڒَا ذ أَيْثْمَاثْسنْ: شَابَانْيَا، هُوذِييَا، قَالِيطَا، قَالَايَا، حَانَانْ،¹²مِيخَا، رَاحُوبْ، حَاشَابْيَا،¹³زَاكُّورْ، شَارَابْيَا، شَابَانْيَا،¹⁴هُوذِييَا، بَانِي ذ بَانِينُو.¹⁵إِزدْجِيفنْ ن ڒْڭنْسْ: فَارْعُوشْ، فَاحَاثْ-مُوآبَ، عِيلَامْ، زَاتُّو، بَانِي،¹⁶بُونِّي، عَازْجَاذْ، بِيبَايْ،¹⁷أَذُونِييَا، بِيغْوَايْ، عَاذِينْ،¹⁸أَطِيرْ، حِيزْقِييَا، عَازُّورْ،¹⁹هُوذِييَا، حَاشُومْ، بِيصَايْ،²⁰حَارِيفْ، عَانَاثُوثْ، نِيبَايْ،²¹مَاجْفِيعَاشْ، مَاشُولَّامْ، حَازِيرْ،²²مَاشِيزَابْيِيلْ، صَاذُوقْ، يَادُّوعْ،²³فَالَاطْيَا، حَانَانْ، عَانَايَا،²⁴هُوشِيعَا، حَانَانْيَا، حَاشُوبْ،²⁵هَالُّوحِيشْ، فِيلْجَا، شُوبِيقْ،²⁶رَاحُومْ، حَاشَابْنَا، مَاعَاسِييَا،²⁷أَخِييَا، حَانَانْ، عَانَانْ،²⁸مَالُّوخْ، حَارِيمْ ذ بَاعْنَا.

²⁹إِنِّي إِقِّيمنْ زِي ڒْڭنْسْ، إِكهَّاننْ، إِلَاوِييّنْ، إِعسَّاسنْ ن ثوُّورَا، إِمذْيَازنْ، إِمْسخَّارنْ ن زَّاوشْثْ ثَامقّْرَانْثْ ذ مَارَّا إِنِّي ذ إِعزّْڒنْ إِخفْ نْسنْ خْ ڒڭْنُوسْ ن ثمُّورَا غَارْ شَّارِيعَا ن أَربِّي، ثِيمْغَارِينْ نْسنْ، إِحنْجِيرنْ نْسنْ ذ يسِّيثْسنْ، كُوڒْ إِجّْ ونِّي غَارْ ثدْجَا ثُوسّْنَا ذ ڒفْهَامثْ،³⁰نِيثْنِي مَارَّا ڒصْقنْ غَارْ أَيْثْمَاثْسنْ، أَيْثْ ن بُو-صُّولْطَا نْسنْ، ؤُشَا شَّارْشنْ ذِي نّعْڒثْ ذ ثْجَادْجِيثْ مَاحنْذْ أَذْ دَّارنْ عْلَاحْسَابْ شَّارِيعَا ن أَربِّي، ثنِّي إِمّوْشنْ خْ ؤُفُوسْ ن مُوسَا، أَمْسخَّارْ ن أَربِّي، ؤُشَا مَاهنْذْ أَذْ حْضَانْ مَارَّا ڒُومُورَاثْ ن سِيذِي، سِيذِيثْنغْ، ؤُشَا أَذْ طّْفنْ ذِي لْفَارَايِيضْ نّسْ ذ ثْوصَّا نّسْ.³¹عَاوذْ نڭَّا خَانغْ مَاحنْذْ وَارْ نتِّيشْ يسِّيثْنغْ إِ ڒڭْنُوسْ ن ثمُّورْثْ ؤُ وَارْ نتِّيوِي يسِّيثْسنْ إِ إِحنْجِيرنْ نّغْ ذ ثَامْغَارْثْ.³²ؤُشَا مَاڒَا ڒڭْنُوسْ ن ثمُّورْثْ ؤُسِينْ-د ذڭْ وَاسّْ ن سّبْثْ، إِوْينْ صّڒْعثْ ذ عْڒَامْ كُوڒْ إِمنْذِي حِيمَا أَذْ زّنْزنْ أَيَا، أَقَا نشِّينْ ذِي سّبْثْ نِيغْ ذڭْ إِجّْ ن وَاسّْ إِقدّْسنْ نّغْنِي وَارْ خَاسنْ نتِّيوِي وَالُو. ؤُشَا أَمُّو عَاوذْ نڭَّا خَانغْ، أَقَا نشِّينْ أَذْ نجّْ ثَامُّورْثْ ذڭْ ؤُسڭّْوَاسْ وِيسّْ سبْعَا ؤُ وَارْ نْكسِّي أَرِّيبَا زڭْ ؤُڒَا ذ يِيجّنْ.³³نڭَّا خَانغْ ڒُومُورَاثْ مَاحنْذْ أَذْ نوْشْ إِشْثْ ن تُّوڒُوثْ ن شِيقْلُو ذڭْ ؤُسڭّْوَاسْ إِ ثْسخَّارْثْ ن ثَادَّارْثْ ن أَربِّي نّغْ،³⁴إِ وغْرُومْ ن وسْشَانْ ؤُ إِ ثوْهِيبْثْ ن ڒْغِيدْجثْ نْ ڒبْذَا ؤُ إِ ثْغَارْصْثْ ن وشْمَاضْ ن ڒبْذَا ذڭْ وُوسَّانْ ن سّبْثْ ؤُ ذڭْ وُوسَّانْ ن ؤُيُورْ ن جْذِيذْ، إِ ڒعْيُوذَاثْ إِتّْوَاڭّنْ، إِ ثْمسْڒَايِينْ إِقدّْسنْ ؤُ إِ ثْغَارْصَا ن دّنْبْ مَاحنْذْ أَذْ زَّايْسنْثْ إِتّْوَاڭّْ أَصْڒَاحْ خْ إِسْرَائِيل ؤُ خْ مَارَّا ثَاسخَّارْثْ ن ثَادَّارْثْ ن أَربِّي نّغْ.³⁵نشِّينْ، إِكهَّاننْ، إِلَاوِييّنْ ذ ڒْڭنْسْ، أَمْ نتّْوَاستّفْ عْلَاحْسَابْ ڒَادْجَاثْ ن إِبَابَاثنْ نّغْ، ڭِّينْ ثَاقدُّوحْثْ إِ ثوْهِيبْثْ ن ؤُكشُّوضْ ثنِّي ثُوغَا إِتّْخصَّا أَذْ ثتّْوَاسِّيذفْ غَارْ ثَادَّارْثْ ن أَربِّي نّغْ ذڭْ وُوسَّانْ إِتّْوَاڭّنْ، أَسڭّْوَاسْ أَوَارْنِي إِ ؤُسڭّْوَاسْ، مَاحنْذْ أَذْ ثتّْوَاسّشْمضْ خْ ؤُعَالْطَارْ ن سِيذِي، أَربِّي نّغْ، أَمْ مَامّشْ إِ ثُورَا ذِي شَّارِيعَا.³⁶ؤُشَا نڭَّا خَانغْ عَاوذْ مَاحنْذْ أَذْ نَاوِي ثَامنْزُوثْ ن ثمُّورْثْ نّغْ ذ ثْمنْزُوثْ ن ڒْغِيدْجثْ ن مَارَّا ثِيشجُّورَا غَارْ ثَادَّارْثْ ن سِيذِي، أَسڭّْوَاسْ خْ ؤُمَاسْ،³⁷ؤُڒَا ذ إِمنْزَا ن إِحنْجِيرنْ نّغْ ذ ڒبْهَايمْ نّغْ أَمْ مَامّشْ إِ ثُورَا ذِي شَّارِيعَا، ؤُشَا أَذْ نَاوِي إِمنْزَا ن إِفُونَاسنْ نّغْ ذ وُودْجِي نّغْ ذِي ثَادَّارْثْ ن أَربِّي، غَارْ إِكهَّاننْ نِّي إِتّْسخَّارنْ ذِي ثَادَّارْثْ ن أَربِّي.³⁸ؤُشَا نڭَّا خَانغْ عَاوذْ مَاحنْذْ أَذْ نتَّاوِي ثَامزْوَارُوثْ ن مِينْ إِتّْوَاڭّنْ زڭْ وَارشْثِي نّغْ ؤُ زِي ثوْهِيبِينْ ن ؤُسْڭعّذْ نّغْ ؤُ زِي فْرُوثَا ن مَارَّا ثِيشجُّورَا ؤُ زِي بِينُو ن جْذِيذْ ذ زّشْثْ غَارْ إِكهَّاننْ ذڭْ إِخَّامنْ إِ ڒخْزنْ ن ثَادَّارْثْ ن أَربِّي نّغْ، ؤُڒَا ذ ڒعْشُورْ ن ثمُّورْثْ نّغْ غَارْ إِلَاوِييّنْ. ؤُشَا إِلَاوِييّنْ سِيمَانْثْ نْسنْ أَذْ طّْفنْ ڒعْشُورْ ذِي مَارَّا ثِيندَّامْ مَانِي ثُوغَا نْخدّمْ نشِّينْ خْ ثمُّورْثْ،³⁹ؤُشَا أَذْ يِيڒِي ؤُكهَّانْ، إِجّْ ن مِّيسْ ن هَارُونْ، غَارْ إِلَاوِييّنْ خْمِي غَا طّْفنِيلَاوِييّنْ ڒعْشُورْ. ؤُشَا إِلَاوِييّنْ سِيمَانْثْ نْسنْ أَذْ أَوْينْ إِشْثْ ن ثعْشَارْثْ ن ڒعْشُورْ غَارْ ثَادَّارْثْ ن أَربِّي، غَارْ إِخَّامنْ ن ثَادَّارْثْ ن ثْخُوبَايْ،⁴⁰مِينْزِي أَيْثْ ن إِسْرَائِيل ذ أَيْثْ ن لَاوِي أَذْ أَوْينْ ثَاوْهِيبْثْ ن ؤُسْڭعّذْ ن ڒْحبّْ ن يِيرْذنْ، ڒَا ن بِينُو ن جْذِيذْ ؤُڒَا ن زّشْثْ ذڭْ إِخَّامنْ إِ ڒخْزنْ. مَاغَارْ ڒقْشُوعْ ن زَّاوشْثْ إِقدّْسنْ أَقَا أَثنْ ذِينْ، ؤُڒَا ذ إِكهَّاننْ نِّي إِتّْسخَّارنْ ذ إِعسَّاسنْ ن ثوُّورَا ذ إِمذْيَازنْ. إِتّْخصَّا أَنغْ وَارْ نْسمّحْ شَا ذِي ثَادَّارْثْ ن أَربِّي نّغْ.

نَاحَامْيَا 10 / rif_ati

ڒْعَاهْذْ ذ ثْمَارْسِيوْثْ ن ؤُشمّعْ

نَاحَامْيَا10rif_ati