ናናወ አየ!
1ዳሮ አሳ ሱ ጉስዳ ናናወ ካታማ አየ! ዎርዶይ ኩምስ፤ ቦንቅ ኤክዳ ሻሉዋስ ታይቦይ ባዋ።2ናናወ ካታመን ልሶ ግርሳይ፥ ገርቶ ጎንዶርሳይ፥ ፓራታ አዳርሶይነ ፓራ ጋረታ ጉፋይ ስኤቴስ።3ፓራ አሳት ፒርፆሶና፤ ማሻይ ሎጬስ፤ ቶራይ ጶሌስ። ዳሮ አስ ሀይቅስ! አህ አሀ ቦላ ዶረትስ፤ ሀይቅዳባስ ታይቦይ ባዋ! ያራ ካንድ ብያ አስ አሀን በቴስ።4ሄስ ኡባይ ሀንዳይ ማር ባይና ናናወ ላይማተ ጋሱዋና። እ ዳሮ ሙሩኖ ኦሱ፤ ካዎተታ ባ ላይማተን፥ አሳ ባ ሙሩኑዋን አይለያሱ።5ኡባፈ ዎልቃማ ጎዳይ፥ “ሄኮ፥ ታኒ ነ ቦላ ደንዳስ! ታኒ ነ ማኡዋ ኔፐ ቃራና፤ ነ ካሉዋ አሳ፥ ነ ፖኩዋ ካዎተታ በሳና።6ታኒ ነና ፕቶ የግያ በሲ ከሳና፤ ነና ካና፤ አስ ኡባይ ነና ሚጫናዳ ኦና።7ነና በእያ ኡባይ ኔፐ ሃክድ፥ ‘ሄኮ፥ ናናወ ካታማይ ባይሳትስ፤ እያዉ አዛናናይ ኦኔ? እያ ምንያ አስ አዉፐ በንታንደሻ?’ ያጋና” ያጌስ።8ነኖ፥ ናናወ፥ ኔኒ ግብፀን ደእያ ተብሶ ካታማፐ አይ? እያ ናይለ ሻፋ ማታን ደአዉሱ፤ ሃ እ ዩሹዋ ተቅስ፤ ሻፋይ እዉ ሚፃ ግድስ፤ ቃስ ሃይካ እዉ ድርስ።9ቶጰይነ ግብፀይ እዉ ዛው ባይና ዎልቃ፤ ፑፅነ ሊበይ እዮ ማደይሳታ።10ግዶሽን፥ እያ ድኤታሱ፤ እ ጉ ናይት ደሸትድ፥ ኦገ ጋፃ ኡባን ኩንድዶሶና። እ ቦንቸትዳ አሳታ ቦላ ሳም የገትስ፤ እ ግታ አሳት ኡባይ ሳንላታን ቃሸትዶሶና።11ነኖ፥ ናናወ፥ ኔኒ ማትድ ጋንድጋርያ አሳዳ ሀናና። ነ ሞርከታ ስንፈ ባቃታዳ አትያ በሲ ኮያና።12ነ ሚፃት ኡባይ ኮይሮ ቴርዳ አይፈይ ደእያ ባላሰ ም መላ። ባላሰ ም ቃያ ዎደ ቴራይ መይሳ ዶናን ዎስ።13ሄኮ፥ ነ ኦላንቾት ኡባይ ማጫሳ መላ። ነ ዛዋ ፐንገት ነ ሞርከታስ ዳልግድ ዶየትዶሶና፤ ኮበ ም ታም ምስ።14ነ ሞርከት ነ ዩሹዋ ኡንኤያ ዎደ ኡያና ሃ ሀእ ትካ። ነ ሚፃ ምን፤ ኡርቃ የዳ ፁበ መ፤ ኦቶ ጊግሳ።15ነና ያን ታም ማና፤ ቦለይ ካ መይሳዳ ነና ማሽ ማና። ኔኒ ቦለዳ ዳራ ጎንዶዳ የለታ።16ኔኒ ነ ዛልአንቾታ ሳሎ ፆልንቶታፐ አዳ ዳርሳዳሳ። ሽን ኤንቲ ቦለዳ ኡባ ም ድግድ ፓልድ ያና።17ነ ቶራ ሞጮናትነ ነ ሞርናት ሜጎ ዎደ ድርሳ ቦላ ኡትዳ ቦለ መላ። ኤንቲ አው ከይያ ዎደ ፓልድ ዮሶና፤ ኤንቲ ደእያ በሳ ኤረይ ባዋ።18ነኖ አሶረ ካዋዉ፥ ነ ሀላቃት ስክዶሶና፤ ነ ቦንቸትዳ አሳት ኩንድዶሶና። ነ አሳይ ደረታ ቦላ ላለትስ፤ ኤንታ ሺሽያ አስካ ባዋ።19ኔኒ ዛው ባይና ኢታተፈ ከስ ኤክዳ አስ ባይና ግሾ፥ ነ መኦይ ኮለተና፤ ነ ማዱንይ ፓፀና። ነባ ስእዳ ኡባይ ነ ቦላ ኩሸ ባቃና።