Nahumi2hch_wb2

Niniwe kiekariyari kemɨtika'unarieni

1Niniwe, 'ahepa kanamieni mɨmatsika'una,'ayumieme kuyaxi wapaitɨ keniwaranutinɨ'a memɨtanenierenikɨ,huye keneta'ɨwiyani, 'akuyaxima keniwaxeɨrieka,'ahetsie titakɨ pemɨtitanuani ketineha'aritɨaka.2Karikɨ Yawé yakatiniyurimɨkɨ Kakuwu tawari witsimɨtixeiyarienikɨ,meta 'Ixaheri witsimɨtixeiyarienikɨ,teyu'unamete mekateninawatsirieni,'iteɨri mukahurukarieni hepaɨ katinanuyeyani.
3Kuyaximama memɨkamama kɨmana memeuyukunarɨma kanixetani,yaxeikɨa kuyaxi mekaneuxetani.Wakaxetate tepɨayari kaniutixawatɨreni tai hepaɨmexi meyukuha'aritɨwa meyutakwinikemeta kuyaximama yupitsikate teikɨ mekanetsetserani.4Kaxetate hau'erietɨ kaye'utɨa mekaniye'uwani,teɨteri memayukuxexeɨriwatsie mekani'axeni metewakwinitɨatɨ.Tai kɨxeme hepaɨ mekateniyuxexeiyatɨkani,meta mimierɨkari hepaɨ mekanikɨyɨaka.

Niniwe kemɨtiuka'unarie meta kemɨtiunawatsiyarie

5Niniwe kiekariyaritsie ti'aitame yukuyaxima 'aixɨa memɨ'anene kaniwaruta'inieni,mɨkɨta mexɨitɨarikakɨ mekanekaxɨrɨweni.Kuraru 'amatitewatsie meyumexɨitɨatɨ mekani'axenimana memɨte'anutananikɨ.6Peru haa manutaname kaneuyepierixɨani,paratsiyu pɨka'unirɨme.7Yakatiniu'aitsieniri:Niniwetari 'ateewa mekananuhapaniekuni.'Ukari tewa'uximayatsiriwamete kukuruxi wahepaɨ mekateniutsuanani,meta yutawitsie mekaneuyuhutsunani hiwerikakɨ.
8Niniwe kiekariyari haa manutaname mɨtari hepaɨ kani'aneni,teɨterimama mekanitayuruweni.«Xekeneukunuaxɨa» «Xekeneukunuaxɨarikɨ», mekateniuhiwieriwani,peru nixewitɨ tɨma pɨka'ukuneniere.9Pɨrata xekenewayetɨki.Huru xekenewayetɨki.Piinitɨarika mɨraye'atɨka pɨkati'inɨari,meta piinite pɨtimɨire witsimɨti'anene mɨraye'atɨka.10Kiekari katiniunawatsiyarieni, yuxaɨta kaniyuhayewa meta 'unitɨ.Wa'iyari kaniku'amɨwetɨkani,watunute niutiyɨyɨakatɨkani,wawaiyarite niutiyɨyɨakani,yuhɨxie mekanayetukwarawiniri.

'Ɨrawe mɨtiyukwa'a kanimɨmɨkɨ

11¿Mayetsi waterɨ keranuyetɨameta mayetsi tɨɨrixi waterɨ,hakewa maye 'uki, maye 'ukaratsi meta waniwemamemeyu'awietakai nixewitɨ kawa'uximatɨakakɨ?12¿Maye keranuyetɨa,yuniwema wahetsiemieme 'etsitipepeme mɨtititsanakaimeta maye 'ukaratsi hetsiemieme yuxɨ'erika kɨipitɨa mawiwierekai,yuterɨta yuxɨ'erika mɨtiutahɨniyakaimeta wai mutahɨniyakai mɨwayuti'awiwietatsie?13«Peru ne hikɨ nekaninuani nematsi'aye'unietɨ—Yawé Mɨtɨrɨkaɨye mɨpaɨ kanaineni—.'Akaxetate kuyaxa miemete naxi nekaniwarayeitɨamɨkɨ,meta 'ixiparakɨ 'aniwema mayetsi tɨɨrixi nekaniwakwimɨkɨ.'Akwieyaritsie kiekatari memɨtenawaya nekaniwakumaweriyamɨkɨ,hatsuakuri tawarita 'atupiritsixima waniuki pɨka'enierieni».
expand_more
Search