1Toi hibaye hitarare hodde, "Ãi tũwarare soiyi hoir, eṛe tũwarar butore en hozon ase zara Allar raijjo beši ḍõr šokti loi aiššede no deke foijjonto hitara hono mote moutor fiyala no fibo."
Isar dola fušak
2Iyar so din bade, Isaye Fitor, Yakub, edde Yuhanna, itarare fũwati loi ek usol faharor uwore giye, zeṛe hitara ekela aššil. Hitarar sarme hibar siyara bodoli giyegoi.3Hibar fušak en dola oi giyegoi zenneki duniyair hono dufiye hor duiyore hendilla dola gori no faribo.4Toi heṛe Musa edde Eliyase hitarare deha diyore Isa loi hota hor.5Toi Fitore Isare hodde: "Ustad, ãra eṛe aside bala oiye. Ãra tinnan bãša banai, ekkan õnolla, ekkan Musalla, ar ekkan Eliyasolla."6(Kintu Fitore ki hoibo hiyan hibaye buzi uṛi no faijjil, kiyollahoile hitarare beši ḍore doijjil.)7Toi ekkan miyula aiyore hitarare guri felaiye, edde he miyular butottu ek abaz aišše, "Iba ãr he adoijja Fut, tũwara hibar hota funo!"8Bade hehon sahabi okkole sairo mikka saiye kintu Isa sara heṛe ar honokiyore no deke.9Faharottu lami aiyedde šomot, Isaye hitarare hokum diye ze hitara zin dekkil hin Adomor Fut morattu uwafes zinda no uṛe foijjonto honokiyore no ho.10Hitara ei hokum mainne, edde morattu uwafes zinda uṛar mani ki hiyan hitara hitarar butore biyasana goijje.11Toi hitara hibare fusar goredde, "He alem okkole kiyolla ho ze Mosi aibar age Eliyasottu aiya foribo?"12Zuwabe Isaye hodde, "Oi, ei hota soiyi, Eliyase age aiyore hár kissure agor abostat firai anibo. Toile endilla kiyolla leka ase ze Adomor Fute beši duk bug goribo edde hibare batil gora oibo?13Kintu ãi tũwarare hoir, Eliyasor babute pak kitabot zendilla leka ase hiba he mozin aiššil, ar hitara hibar uwore hitarar issa mozin hár kissu goijje."
Isaye ek bute faiya fuware aram goijje
14Toi hitara zẽtte he dusora sahabi okkolor hãse firi aišše, dekedde oi sahabi okkolor sairo ḍakottu ek ḍõr manuš dol zoma oiye edde hoekzon aleme hitara loi barabari diye.15Mainše Isare deikke mottor hitara kub beši tajjuf oiye edde dũri zaiyore hibare solam zanaiye.16Toi Isaye hitarare fusar goredde, "Tũwara utara loi kiyor babute barabari goijjilade?"17Dolor butottu ekzone zuwab diye, "Ustad, ãi ãr fuware loi õnor hãse aiššide, kiyollahoile hitare ek ruhuye faiye, zibaye hitare buk gori felaiye.18Hibaye zẽtte hitare dore hetunot asari meṛit felaide. Hitar galottu fena ane ar dat loi dat goše edde ebbe doro oi zagoi. Ei ruhure dafaidibolla ãi õnor sahabi okkolore foriyad goijjilam, kintu hitara no fare."19Hetunot Isaye hodde, "Oh obiššaši manuš okkol! Ar hotokal ãi tũwarar fũwati takiyum, ar hotokal tũwarare bordaš goriyum? Tor fuware loi eṛe ai!"20Toi hitara hitare ainne. Hetunot he ruhuye zehon hibare deikke, hehon kub zure musori doijje, toi fuwawa meṛit fori giyegoi edde goijja šuru goijje, ar galottu fena ainne.21Isaye fuwar bafore fusar goredde, "Itattu endilla oiyede hotodin oiye?"Manušwaye hodde, "Šoṛo halottu loti.22Bout bar ei ruhuye hitare marifelaibolla oinot edde fanit felaidil. Kintu õne zodi kissu gori faribade oile, toile ãrar uwore doya deho edde modot goro."23Isaye hitare hodde, "'Zodi ãi gori farile mani?' Ze biššaš gore hitalla hár kissu šombob."24Hetunot fuwar bafe guzori hodde, "Ãi biššaš gori, ãr butore ze obiššaš ase hin dur gori do!"25Bout manuš okkol dũri aiyedde dekiyore Isaye he ruhure dõk diyore hodde, "Oh nafang edde buk ruh, ãi tore hokum dir, hitar butottu niyol, hitar butore ar hono din no gólis."26Hetunot ruhuye guzori fuwaware zure musori doijje edde hitar butottu niyoli giyegoi. Henot fuwawa morar ḍoil oi fori roiye edde beggune "hite morigiyegoi" boli hoiye.27Kintu Isaye hitare hate doijje edde modot goijje, toi hite uṛi tiyaiye.28Tarfore zehon Isaye góror butore giye, toi sahabi okkol hibar fũwati ekela aššil, hitara fusar goijje, "Ãra kiyolla ibare dafai no fari?"29Isaye hodde, "Endillagunore šude munazat edde ruzar duwara dafa šombob."
Isaye dusora bar hibar moron edde uwafes zindar babute hor
30Bade hitara hentu uṛi baisa diye edde Galil elehar butottu di giye ar hiyan hono kiye zani farok hibattu issa nuaššil,31kiyollahoile hibaye hibar sahabi okkolore šikka diyat aššil. Hibaye hitarare hodde, "Adomor Futore manuš okkolor hatot tuli diya oibo. Hitara hibare mari felaibo, ar tin dinor din hiba uṛi zaiboi."32Kintu hibaye ki hoiye hin hitara buzi no fare ar he babute fusar goitte o ḍoraiye.
Beggunottuwaro hone ḍõr?
33Hitara Kofornahumot aišše, toi hitara góror butore zehon oiye, hibaye hitarare fusar goijje, "Tũwara fõtot kiyor babute barabari goijjilade?"34Kintu hitara nizam oi roiye, kiyollahoile fõtot hitara hone beggunottuwaro ḍõr he babute ekzone ekzon loi hotabartra hoil.35Toi hibaye boišše edde he barozonore ḍakiyore hodde, "Zodi honokiye beggunor age oito sa toile hitattu beggunor šešottu taka foribo, ar beggunor šeba goroya owa foribo."36Bade hibaye ugguwa gura fuware loiye edde hitarar maze tiya goraiye. He gura fuwaware hibaye ãza mari loiyore hodde,37"Ze honokiye ãr name itar ḍoilla hono gura fuware gose, hite ãre gose. Ar ze ãre gose hite šude ãre gosede no, bolke hibare gose, ze ãre defeṛaiye."
Ze ãrar bifokke no hitede ãrar fokke
38Yuhannaye Isare hodde, "Ustad, õnor name ekzon mainše napak ruh saradde dekkilam, hite ãrar dolot nuaššil hetolla buli ãra hitare mana goijjilam."39Isaye hodde, "Hitare mana no goijjo, kiyollahoile ãr name ekkan keramoti ham gori bade hehon honokiye ãr babute horaf hoi no faribo,40kiyollahoile ze ãrar bifokke no hitede ãrar fokke ase.41Ze honokiye tũwarare ek kaf fani fi haito de, kiyollahoile tũwara Mosir manušde hetolla Ãi tũwarare soiyi hoir: Hite hitar enam no haraibo.
Gunar fõtot no zaibolla mojbut tako
42"Ar ze honokiye ãr uwore biššaši ei šoṛo okkolor butottu honokiyore gunar fõtot loi za, toile hitare golat ugguwa ḍõr fattor bandi di doriyar mur fanit felai diya, bolke hitalla aro beši bala oibo.43Tũwar hate zodi tũware gunat felaito sa, toile he hat haṛi felai do. Dui hat loi jahannamot, ze oin hono din no nifibo, heṛe golattuwaro, bolke tũṛa oi akeri zibonot gola tũwalla bala oibo.44(Zeṛe log okkole hitarare hár, hin no morer, edde oinor zilha no nifer.)45Tũwar ṭenge zodi tũware gunat felaito sa, toile he ṭeng haṛi felai do. Dui ṭeng loi jahannamot feli diyattuwaro, bolke tũṛa oi akeri zibonot gola tũwalla bala oibo.46(Zeṛe log okkole hitarare hár, hin no morer, edde oinor zilha no nifer.)47Tũwar ek suke zodi tũware gunar fõtot ṭane, toile hiba niyalaifelo. Dui suk loi jahannamot felaidiya oibade hiyanottuwaro, bolke ek suk loi Allar raijjot gola tũwalla aro bala oibo,48zeṛe,"'log okkole hitarare hár, hin no morer,ar oin o no nifer.'49Kiyollahoile fotti manušore oin di forikka gora oibo, zendilla kurbanire nun di pak saf gore.50"Nun bala ziniš, kintu nunottu zodi nunor moza zagoi, toile hin ken gori abar nun oi faribo? Tũwarar dilot nun rako edde tũwara ekzone ar ekzon loi šantit tako."