1Èh Haq doe ka mangai taq hŏc: “Joq qnàng Au doe ka pì, pì ma yòng ajang kô i ngai ùh cachìt adroe ka jah hnoq diac Boc Plình yŏc cwìang itai hu trùh.
Jesus hatuàng ka wa Môise wa Êli
2Atìq ka tadràu hì, Chuaq Jesus aràng Phiero, Jaco xam Jon tiaq haq tŏc ta wang haqhèq, ùh i ka mangai qnoeq ta aih, toq wì haq raq. Ta aih Haq wìh wìa enh ngèa wì piq ngai.3Eo Haq loh ka taboc camla dìq jaq, ùh i mangai leq oe ta crŏng taneh broq taboc jah qmang aih.4Êli xam Môise loh hatuàng ti Haq.5Phiero doe ka Chuaq Jesus: Rabi! Bèn oe ta kô lem joq qnàng, beq broq piq toq ranòh, moeq toq ka Ìh, moeq toq ka Môise, moeq toq hòm ka Êli.6Phiero ùh qnì qmòe đeh doe cleq, majah qmang aih dìq ka wì haq yùq crè pi ka jaq.7khoe aih i moeq cato yùc kàn glàp wì haq, enh yùc aih i bàu doe: “Kô raq Kon calô da Au, mangai Au ma loq waq dèh, thê pì tamàng bàu haq.”8Jò aih, ƀài mangai tiaq hŏc hwi ngan dudan, cadoe pi hnoq cabô, enh gùng ka moeq ngai Chuaq Jesus raq ma oe ti wì.9Jò wì loh enh wang, haq ùh lòh mangai tiaq hŏc anoe hlài ka cabô loq bài yiniq wì haq ma khoe hnoq, trùh jò leq Kon Mangai khoe rìh hlài enh cachìt.10Mangai tiaq hŏc wê bàu aih, wì bòch dabau: Cachìt rìh hlài, aih ìq haq doe cleq?11Mangai tiaq hŏc bòch haq: Hagleq ƀài mangai hnài ranenh ma doe Êli ep trùh adroe?12Chuaq Jesus padreo bàu: “Joq Êli ep trùh adroe, đòeq hu palauq hlài rìm trong. Aih ìq hagleq majah i bàu achìh Kon Mangai ep xalep bàc trong, wì halê cađac haq?13Mahaq au doe ka pì Êli khoe trùh, wì tabroq ka haq tiaq dèh manoh wì ma enh, wop troeq bàu ma khoe achìh trùh haq.”
Mangai kiac pawè
14Jò Chuaq Jesus xam piq ngai aih lam trùh ajang nòe ƀài mangai hanoh tiaq hŏc, hnoq mangai bàc pi ka jaq oe dudan ka wì aih, èh i mangai hnài ranenh tarahen ka ƀài mangai tiaq hŏc aih.15Ƀài mangai bàc aih bu hnoq haq wì khoe hamàih, wì tùh ta haq.16Haq bòch wì: “Pì rahen ka mangai tiaq hŏc au yiniq cleq?”17I moeq ngai ta aih tèu bàu: Mangai hnài! Au aràng dèh kon trùh ka ìh, kiac làu khoe pawè haq,18yac ka qnang oe taleq, jò kiac hi mùt ta haq broq ka haq loh ka troq kênh, loh toq diac hai camùh, cadrit hanenh, haq loh ka gang got hloe, au canòm đeh ka mangai tiaq hŏc drùh qnoh kiac aih, mahaq ùh jah.19Chuaq Jesus doe: “Wùih! nang noe ùh qnì lùi tau, Au oe jah oe ti pì trùh pang leq? Au ep àt ka pì trùh jò leq hòm? Qnàng kon mangai qyoh aih ka au”.20Wì hi qnàng kon qyoh aih ka haq. Kon qyoh aih bu hnoq Chuaq Jesus, kiac khoe rapôh haq, haq tacro ta taneh, cadro cadria hacùng loh toq diac hai.21Chuaq Jesus bòch baq haq: “Haq loh ka qmang kô dùnh neo?” Baq haq tèu: enh qyoh nèh raq.22Kiac khoe bàc yàng khwênh qnìh haq ta ùnh, ta diac, hu jêh đac haq, mahaq ìh broq cleq jah, ìh ha-och rai broq biaq ka ma diq!23Chuaq Jesus doe: “Hagleq ìh majah doe: Tàng ìh broq jah? Waq toq cabô hi lùi rìm yiniq dìq jah”.24Baq kon mangai qyoh aih drah doe: au lùi ìh, Waiq Chuaq! Ìh wiang biaq da au ajang kan ùh qnì lùi aih.25Jò Chuaq Jesus hnoq mangai bàc trùh, Haq lech ka kiac aih rai thê: “Kiac clìc rai làu meh, au thê gè loh enh kon mangai qyoh kô, pang kô ta èh pi jah pawè haq hòm”.26Kiac rai cajiah rai rapôh kon qyoh aih cadêh, khoe kiac hi loh, kon mangai aih tìah qmòe ka khoe cachìt, bàc ngai crè wì doe: haq khoe cachìt.27Mahaq Chuaq Jesus rùp tì dèch haq hi yòng.28Jò Chuaq Jesus khoe mùt ta hnim, mangai tiaq hŏc thia haten wì chop bòch: Gleq nhèn drùh kiac aih ùh jah?29Haq doe: “Tàng ùh waiq khàn ùh i cabô drùh qnoh kiac aih jah.”30Khoe aih Chuaq Jesus xam mangai tiaq hŏc loh enh aih, lam pagat trong Galili, Haq ùh enh dôq ka cabô loq wì haq qnang oe taleq.31Majah qmang aih haq khoe hnài dèh mangai tiaq hŏc, haq doe: “Kon mangai kô èh mùt ta tì wì, wì jêh cađac, haq cachìt piq hì khoe èh rìh hlài.32Mahaq mangai tiaq hŏc ùh tem bàu aih, wì ùh hùa bòch haq trong aih.33Wì haq trùh ta Cabênaum. Jò khoe oe ta hnim, haq bòch wì: “Jò lam ti trong ìq pì tarahen cleq ka dabau?34Mahaq wì hatinh majah qmang aih oe ti trong wì tarahen ka dabau: Taqne bèn kô cabô ma yeo kàn?35Chuaq Jesus hangui, creo dŏng moeq jàt baiq ngai tiaq hŏc, Haq doe: “Mangai leq enh broq gàu, haq aih ep oe atìq lùch, ep broq hapŏng patìh ka wì qnoeq.”36Haq yŏc moeq toq kon qyoh, tah taqne mangai tiaq hŏc, khoe aih haq caqmìn kon qyoh aih rai doe ka wì:37“Cabô jao Yiniq Au chìuq đìh moeq ngai kon qyoh qmang kô, aih haq đìh au, cabô đìh au, aih ùh xài haq đìh au, mahaq đìh Mangai ma khoe thê au.”38Jon doe ka Haq: Mangai hnài, nhèn khoe hmaq hnoq i mangai yŏc yiniq ìh đòeq drùh kan kiac, nhèn khoe ùh lòh haq, majah qmang aih wì aih ùh tiaq bèn.39Chuaq Jesus doe: “Apaq tàt dèh, ùh i mangai leq rai yŏc yiniq au broq kan halac rai tapoch qmèq ka au.40Majah qmang aih, mangai leq ùh hìaq taƀlêq ka bèn haq aih hanoh ti bèn.41Cabô jao yiniq au kô èh ma am ka pì moeq doe chrŏng diac, majah qmang aih taiq pì aih mangai da Christ, Joq qnàng au doe ka pì haq aih ùh hnhung dèh kan baha.42Mahaq mangai leq broq ka mòeq ngai taqne ƀài wì qyoh kô khoe lùi au clìh ta yiniq lui, yŏc apau hmo ma kàn kàt ranŏng haq aih lam cadram ta diac raxìq aih ùh hnau hòm.43Tàng joq tì ìh broq ka ìh loh yiniq, pot đac tì aih, yac ka moeq apah tì mahaq jah mùt ta kan rìh, ùh hnau tôm baiq apah tì mahaq taclìh ta hwinh, ta ƀau ùnh ùh pat.45Tàng jènh ìh broq ka ìh loh yiniq, pot cađac jènh aih, moeq apah jènh mahaq jah mùt ta kan rìh, ùh hnau tôm baiq apah jènh mahaq wì khwênh qnìh ta bau ùnh.47Tàng joq mat ìh broq ka ìh loh yiniq, ƀŏc đac mat aih beq, oe moeq apah mat ma haq jah mùt ta diac BocPlình, ùh hnau tôm baiq pah mat mahaq ta clìh ta hwinh,48aih la nòe i hrai ma kaq wì haq, hrai aih ùh kachìt, tanòe ùnh ùh jò leq pat.49Rìm ngai ta aih jah paqnhòq xi ùnh.50Boh aih ngè lem, mahaq tàng boh aih pi xang, aih èh yŏc cleq hu broq haq xang hlài.51Dìq ka pì ep i boh oe ta manoh, ep hatroq ti dabau”.